نۊتشە و شیمیایی! نۊتشە و زامېوی سارێژ نەبییە و پەترۆک نەبەسە!
نویستەی: هەورامان ڕۆستەمیهەورامان ڕۆستەمی
چوار ڕوېش مەنەبې پەی نۆرۊزی و سەرو ساڵې تازێ. ژیوگا و سرووشتوو نۊتشەی خەریک بې جل و بەرگوو وەیو و زەمایی وەهاری کەرۊنە و زاوڵێ پا کەل و کووجیانە ماتڵێ بېنې عەیدانە گېرا و کەیڵێ کەرا و سروودەو خوایە وەتەن ئاواکەی بواناوە!
خەڵک هەڵای خاس هەواڵوو شیمیایی و بە کۊمەڵ کۊشتەی هەڵبجەی ئازیزی نەیاوابێ گۊشش و کوت و پڕێوەنە سەدامی تەژنە بە ونەو کۊردی، سەدامی دڕڼە و سێر ناما جە جەنگ و یانە ۋېرانی، سەدامی لەعنەت کریاو ویەرین و تارېخی، بە ونەو خەڵکو هەڵبجەی دەس و دیمش تازە کەرڎەۋە و سوورەو فەتحیش وانا و سەرو مازڵۆخوو ڕسوایەوە عێبادەتوو وېش بە یاگېش ئاردو و شارو نۊتشەی ئازیزیش وەرنیشتوو کۊردەسانییەنە دا ڤەروو بۊمبی شیمیایی و گازو خەردەلیش پاشا سەرو ژەن و زاوڵەی بې تاوان و بې گۆنایەرە و واوەی سەلەمناش پەی هەوادارەکاش هەکە کێ عەلەمدارو سپاو ئێسلامی تۊنڕەوی و ڕادیکاڵین!
زیاتەر جە هەژدە هام وەڵاتیە نازاراش هەکە فرێشا خەڵکو دوې بنەیانا بېنې شەهید کەرڎې و زیاتەر جە سەڎ کەساش پەی هەمیشە کەم ئەندام کەرڎې و سەرسام و مەست جە قۆدرەتی پېسەو قارەمانو وەڵاتە عەرەبەکا گېڵاوە پەی  کاخەو زۆڵم و جەورەکەیش!
بەڵې زیاتەر جە سەد کەساش خەڵتانو ونێ کەرڎې و یانە باوانو چن کەساش وڕنا و تاکو ئەبەد پەی ئانیشایچ کە مەنێبێنی نەوەشی و سەرەتان و نەفەس تەنگی و کۊری و قۆزە و هاڕەو سینەیش پېسەو ئێمزاو هەرمانەکېیش ئاست جیا!
بە کام تاوان؟  بنەیانەو فەلاحی و بنەیانەو یاقۆبی  چ تاوانېوشا بې جگەم کورد بییەی؟خۆ تۊ تەقیەو سۆڼی بییەکەیچشا نەگېرتەت هۆ دڕندەتەرین عەرەبو سۆپاو زۆڵم و داگیرکەری!
شەڵەی کاتېوو پەتەو سێدارەیشا وستەنش ملەش یۆما چاگە بییەیا و پەرسەیاش چنە گوا نۊتشە چن ئەبووبەکر یاقۆبېش چنەش بېنې چنەت ئەسایمێ، چن دۆکتر مەحموودێ، چن تاهێرێ و چن مۆختارێ چن خاتوو سەرگۆڵێ و چن مشیۊم ویەرۆ لالۊ ئەبابەکری یاقۆبییېوتەر پا ڕەحم و دڵفرانیەوە بەینەوە دلې کۊمەڵگاو نۊتشەی؟
هۆ وەڵاتە زلهېزە درۆزنەکا!  هۆ سازمانو مێلەلی! هۆ دنیاو میدیا و ڕسانەی!
‌ بە بۊمبەکاو شمە شارو نۊتشەی بە دەسو چەتێوی بە نامې سەدام حۆسەینی زامڎار بی و دلې گۆرەیی کارەساتەکەو هەڵەبجەیەنە، تەنانەت هەواڵەکەیچش باس نەکریا و شاریاوە و بی چېرو لچاوە!
خەڵکو وەشەوېسو کوردەسانی و هۆرامانی!
کوردبییەی فرە سەختا و خوڎاکەرۊ جگەم وېما کەس کورد نەبۊ، چوون بەڕاسی هیچکەس وەرگە مەگېرۆ و وېما نەبیمی بە ورەی پۆڵایین و بە ئاوەزی بەرز و بە زانشتو ڕۊی متاومې کۊردێ بیمێ، کەستەر مەتاڤۆ!
کوردەسان بەرقەرار، ئاوەڎان هۆرامان.[1]