کۆتا سەرەنجیە جە سەرەو پەوەندی مەراسمەو کوردە بې کوەی جە دەگاوکاو کاشانی
کۆتا سەرەنجیە جە سەرەو پەوەندی مەراسمەو کوردە بې کوەی جە دەگاوکاو کاشانی، چەنی ڕیشەو ئووستوورەیی و ویەردەشناسی و قەومشناسی کورڎی.
مەراسمەو کوردە بې کوه کە ئۍ ساڵ پەڕ ڕەنگتەر جە ساڵانی جە دەگاکاو کاشانی جە پارێزگاو ئەسپەهانینە لوا ڕاوە، بە تاییبەتتی جە دوی بارێ ئوستوورە و ویەردەشناسیوە بایەخی تاییبەتتش هەن پەی ئېمە.
یۊوەم: پەیوەندی ڕیشەیی ئی مراسمیە چەنی خواوەندەکاو فیدابییەی و خواوەندەکاو ئاوێ و زای هۆرامانی، پسەو نموونەی پیرشالیار و کۆسێ خواوەندێ و ئوستوورێ فیدابییەی و ئاوێ و زایشی جە هۆرامان تەخت و هەرپاسە پیریۆسۆ و هەسارە خواوەنداو فیدابییەی و ئاوێ و زایشی جە تەختە.
خواوەندەکاو فیدابییەی کە ڕەگەزشا نېرەن بە فەرمانەو خواوەندەو زایشی و ئاوێ کە ڕەگەزشا مان زمسانەنە مەلا چیرەو زەمینی و دنیاو تاریکی تاکو چەنی ویشا وەهار و ژیوای و گەرمای باراوە سەرەو زەمینی.
چی مەراسمەو کورده بې کوه یا کورد عەلی بە کوە کە دیارەن بەپاو زەمانی و جە کاریگەری ئایین و واڕیاو باوڕەو مەردیمینە، واڕیایش تاکو ئەندازەیە بە سەر ئامەن، پیایە مەلۆ یاڵەرە تاکو هېزمێ بارۆ پەی ئارگاکېشا، بەڵام بۊنەیی وەربێ و کڕیوەی و سەردایوە گیرمەکرۆ و دە شەوۍ و ڕوێ لێ غاریەنە مەمانوە، دماتەر ئەڎا پیرەکېش هېزمیە بە ئاوروە فڕە مەو ڕوەو یاڵ و هەر دەکە کە کوڕەکەش چەنەن تاکو سەردای چا یاڵە کەموە کەرۊ، پاسە کوڕەکە مەتاو دلێ غارەکەینە بەربەی و زەمانیە مەیوە دەگا سەردای مەبڕۊ و چەنی وەیش وەهاری مارۊوە.
دیارەن چی مەراسمەنە هەرپسەو ئوستوەرەکاو فیدابییەی و ئاوێ جە ناوچەکاو هۆرامانی، هەم ڕەگەزی نېر و هەم ڕەگەزی ما نەقشاشا هەن، چی مەراسمەنە ڕەگەز نېریە مەلو دنیاو تاریکی و دلێ غار و ئەشکەوتی و بە یارمەتی ڕەگەزیە مای کە هېزمە ئاورینەکەی فڕە مەو ڕوەو یاڵەکە سەرمای مەبڕۊ و وەهاری مارۊوە.
دوەم: خاڵیەتەریە پەڕ بایەخە چی مەراسمەنە هەر پسەو بە نامەکېشرە دیارەن نامې کورڎی مەوەرۆ، ئینە جیا چانەیە ئانەیە میاونۆ کە ئی مەراسمە جە کوردستانوە و ئوستوورە فیدابییەکاو هۆرامانیوە یاوان ئاگە، هەرپاسەچ نیشانەیەتەرەو بییەی کورڎی چا مەنتەقە و پارێزگایێن بە تاییبەتتی جە ویەردەنە.
پەی وەرچەم ڕۊشنی زیاتەرو باسەو خواوەندە فیدا بییەکاو هۆرامانی،
جە کتێوەو تەختەینە باسی وردتەرەو ئووستوورە فیدابییەکاو هۆرامانی کەرڎەن.
هەمیچ پەی وەرچەم ڕۊشنی جە سەرەو ڕېژەو کورڎی جە پارێزگاو ئیسفەهانینە، جە کتێوەو کوردانی لوڕ و بەختیارینە جە بەشەو کوردانی پارێزگای ئیسفەهان، ئېشارەیە وردتەرم بە ڕېژەیە فرە جە هۆزێ و خێڵە کوردەکا و یاگەنامې کورڎیەکاو ئا پارێزگایمە کەرڎەن.
وێنەو تاییبەتتەو ئی نووسیسیایە و مەراسمەو ئەم ساڵەو کوردە بې کوهی کە جە دەگاو وردکانی سەر بە شارەو کاشانی جە پارێزگاو ئیسفەهانی لوا ڕاوە، جە واروە.
ئیدریس پیری.[1]