ڕەچەڵەک ( ڕیشە)و هۆرامییەکا
هورئەوەگېڵنای و ئاماڎەکەرڎەی: ئەسعەد ڕەشید
بەشۍ چوارەمە
5- سڵېمان بەگ:
دمای کۊچی دمایینو میر سەعیدی، سڵېمان بەگی کوڕش بییەن بە حوکومڕانو هۆرامانی، سڵېمان بەگ کەسێ دەروېش مەشرەب بییەن، هەم پېسە ڕەفتاری و پېسە ڕوخساری، بە کەسێ داڎوەر و دەسوەڵا ئەشناسیان، سەروکڵاوو ژیوای ئی حوکومڕانەینە میر تەیمووری لەنگ (گورگان)، بە سوپێوە فرە گۆرېوە دلۍ هۆرامانیرە گوزەرش کەرڎەن پەی شارەزووری، سڵېمان بەگ زانانش وەرگیری جە سوپێوە چامنۍ زەبەلاحۍ نییەن تەواناو خەڵکو هۆرامانینە، ئانەش بە خاس زانان نەلۊوە گژېشەرەو چا کەین و بەینەنە هۊرامانی بە سڵامەت بازۊوە، دمای نەوەڎ و نۊ ساڵا حوکومڕانی، ساڵەو (1492ز.) کۊچی دمایینش کەرڎەن و بارام میرزابەگی کوڕش یاگېشەنە نیشتەنەرە.
شایانو واتەیەن، حوکومڕانەکۍ هۆرامانی جە ئەوەڵۆ تاکو سەردەمو (بارام میرزا بەگ)یچ هەر تەنیا بە پەرس و ڕاو شووراو خەڵکو هۆرامانی، دوور جە دەسەڵاتو داگیرکارانو کوردەسانی نریێنېرە، بەڵام دماتەر ئا هورچنییە دیموکراتییە بە دەسو (شاکانو سەفەوی، سوڵتانەکانو عوسمانی، میرەکانو ئەردەڵانی و بابانی) دەسشان وزیانەنەو ئیتر فرەو جاری بە فەرمانو ئانېشا نیارەی و لابەردەی حوکومڕانەکانو هۆرامانی ئەنجام دریان.
6- بارام میرزابەگ:
دمای کۊچی دمایینو سڵېمان بەگی، بارام میرزابەگی کوڕش بە فەرمانو شووراو خەڵکو هۆرامانی هورچنیا پەی حومومڕانی هۆرامانی، هەر ئەچا سەروبەڼەنە (شا تەهماسبی سەفەوی) یاوان بە تەختو دەسەڵاتو ئېرانی، بارام میرزابەگ وېش بە شاو سەفەوی ئەشناسان، هەر ئەچاگەیچۆ تاوانش کناچۍ ئەڵڵاوێردیخان حاکمو لوڕستانی داوابکەرۊن، ئەچا ژەنۍ یەرۍ کوڕېش بیېنۍ پی ناما: سڵېمان بەگ، حسێنقولی بەگ، عەباسقولی بەگ.
بارام میرزابەگ، سەردەمو حوکومڕانییەکەیشەنە کەسێ داڎوەر و مروڤ دۊس بییەن، هەر دەم حۆلېش دێنۍ خەڵکی وەشگوزەران بکەرۊن، بە ئایینئەشناسی و داڎوەری نامبانگش لوان.
حوکومڕانی بارام میرزابەگی هەتا ئا دەمە کە خان ئەحمەڎ خانو ئەردەڵانی جە سەفەوییەکا هورگېڵاوە بۍ گېرمەوگرفت لوان ڕاوە، بەڵام دماتەر پا تەشکە نەمەنەن.
خان ئەحمەڎخان، هەر وەرو ئانەیە فرە قینیش جە (شا ویردیخان)ی ژەنبراو بارام میرزابەگی بیېنە، ئېڎیچش تلنان قینەکېشۆ، کۆتەن قینەبەرۍ و دژمنایەتی بارام میرزابەگی و لەشکەرێ گۆرەش سازنان پەی هۊتەرە کەرڎەی سەرو هۆرامانی، ئەوەڵۆ ژمارێ فرۍ دەگایەکانو هۆرامانیش داگیرۍ کەردېنې، دماتەر تۊقەو قەڵاو هۆرامانیش دێنە، جە بارەو ئا تۊقدایە جیاوازیۍ وەرچەمۍ دلۍ سەرچەمە تاریخییەکانە هەنۍ. ئەنجامو تۊقداکەی تەمامو ڕاکا ئام و شۊی پەی دلۍ قەڵاکۍ هۊرامانی وزیێرەو گرد بارێرە فشار وزیا سەرو جەنگکەرەکا هۆرامانی، ئازوقە و پەنەوازییەکۍ ڕوانەیشان تاکو بارو تەنگانەی یاوا، پەی چارەو ئی بارەیە بارام میرزابەگ ویرش جە دوۍ نەخشا کەردۆ پی تەرزە:
1-حۆلۍ بڎان چەنی (شا وێردیخانو لوڕستانی) بلان پەی لاو (شا عەباسی سەفەوی) و داواو کۊمەکیش چەنەبکەران، دماتەر چەنی لەشکەرو شای هۊتەرە بەران سەرو لەشکەرو خان ئەحمەڎخانی.
2- یام بارام میرزابەگ چەنی ژمارێ جە دەسوپېوەڼەکاش بە دزییۆ قەڵاو هۆرامانی چۊڵبکەران و بلان پەی شارەزووری.
دمای تۊکاری هەر دوە نەخشەکەی، بارام میرزابەگ و بەشێ فرەو سەردارا هۆرامانی کە دلۍ قەلاکېنە بېنۍ ئانەشان بە خاس زانان نەخشەی دوەمی جابەجابکەران، جە بارەو چۊڵکەرڎەی و جیائاستەی قەڵاو هۆرامانی جە لاو بارام میرزابەگی و دەسێ جە هامڕاکاشۆ، پەیلوێ جیاوازۍ هەنۍ: بڕێشان پاسەمزانان پاییزو دماساڵەو تۊقداکەی، ئەڵقۍ تۊقدای کزە بیېنەن، بارام میرزابەگ و هامڕێکېش بە فرسەتشان زانان ڕوێشا دمای نماو نیمەڕۊی قەڵێکۍ جیابازان، باعزێ تەریچ ماچان شەوېنە قەڵاکېشان جیائاستېنە، ئانەی شایانو باسیەن هەر دوە پەیلوێکۍ سەرو ئانەی کۊکېنۍ ئانۍ دلۍ قەڵاکېنە زیێنېرە، جە ڕاو (کەماجەڕ)ېوە یاوێنۍ دلۍ دەگاو سەرگەتۍ، چاگەیچۆ ڕوەو دەگاو (هەرشەل) ناوچەو زەهاوی لوێنۍ، بە نیازو وچانۍ و ئیسراحەتی چاگە لاشاندان، بېئاگا چانەی کەسێ جە پیاکا بارام میرزابەگی شەوۍ کەنارو دەگاو سەرگەتۍ وېش دزیەنۆ چەنەشان و لوان پەی قەڵاو زەڵمی.[1]