ڕەچەڵەک ( ڕیشە)و هۆرامییەکا
هورئەوەگېڵنای و ئاماڎەکەرڎەی: ئەسعەد ڕەشید
بەشۍ پەنجەمە
کابرای خیانەتکار، چاگە سەرپاکو بەرشییەکەیش پەی خان ئەحمەڎخانی گېڵنانۆ، پەی ئانەیچ بڕواش پەنەبکەران هېتێ پاڵێ بارام میرزابەگیش پەی سەلەمنای قسەکاش چەنی وېش بەردېنۍ، هەر چاگە خان ئەحمەڎخان فەرمانشدان بە (عەلی بەگو زەڵمی) بە یەرەسەڎ سوارۍ و تەمامو چەک و تەقەمەنی و تفاقۆ یاگەپاشان هۊربگېرۊن و هەریاگێ تۊششابییۍ دەسشان وەنە بشانان، کاتێ عەلی بەگی زەڵمی و تفەنگچیەکېش یاوێنۍ دەگاو هەرشەلی، بارام میرزابەگ و ڕەفېقەکېش گەرمەو ئیسراحەتینە بیېنې، دمای پەلامارۍ و تەقەکەرڎەی، بارام میرزابەگ زامڎاربییەن، وەرو سەختی زامەکەیش و نەزیفو ونۍ، دمای کوچێ مەردەن، بە مەردەی بارام میرزابەگی ڕەفېقەکېش پاکشېشا کەردېنەو ڕەمێنې.
ئەچېگەنە پەنەوازەن بگېڵمېوە سەرو ئانەی کاتێ بارام میرزابەگ و ڕەفېقەکېش قەڵاو هۆرامانیشان جیائاستەن، سڵېمان بەگی کوڕش چەنی دمامەنەو تفەڼگچییە هۆرامییەکا دلۍ قەڵاکېنە مەنېنێ، شەوېنە هۊتەرۍ کت و پڕېشا بەردېنۍ سەرو لەشکەرو خان ئەحمەڎخانی و زەرەری فرەشان دێنۍ وەنە، ئا پەلامارۍ بە تەمامی خان ئەحمەڎخانشان بېتاقەت کەرڎەن، ئەنجامەنە ناچاربییەن وېش جڵەوەو سەرداری لەشکرەکەیش دەس بگېرۊن، بەڵام ئانەیچ سووڎش نەبییەن و هیچش پەی نەکریان، پەوکەی ویرش جە نەخشێ تەری کەرڎەنۊ، پانەی جە ڕاو هورخەڵەتنای و پەڵانتاوە بتاوۊ بە مەرامەکەیش بیاوۊن، نامێوەش پەی سڵېمان بەگی نویستېنە و مەلا ئیسماعیلی قازیش پېسە میانجیکەری بە دیاریێ فرۆ کیاستەن پەی قەڵاو هۆرامانی و پەشیمانی وېش جە کوشتەو بارام میرزابەگی پەی سڵېمان بەگی ئاشکەراکەرڎەن، دلۍ نامەکېنە باسش چانەیەکەرڎەن گوایا ناوچەو (کەمەرە و شامیان) مەوزۊن چېرو دەسەڵاتو سڵېمان بەگی، قەسەمیچش پەی واردەن تاکو گیانش چەنەن دژمەنی هۆرامییەکا نەکەرۊن.
دمای نامەکۍ خان ئەحمەڎخانی و دڵدایۆ سڵېمان بەگی، تەشکێ ئاشتی کۆتەن میانشان، دمای ماوێ سڵېمان بەگ چەنی چن ڕیشچەرماو و پیاماقوڵا هۆرامانی بە نییەتو سەردای خان ئەحمەڎخانی ئامان پەی زەڵمی، ئانەیچ فرسەتێ خاس بییەن پەی خان ئەحمەڎخانی پەی تەمامنای پیلانەکېش. ئیتر پا نیازۆ چن کەسێش دیاریکەردېنۍ پەی پېوایی سڵېمان بەگی و پەنەش یاونێنۍ کە سیایانێ قەشەنگ بڕازناوە پەی وچاندایش، هامکات پەنەش واتېنۍ کاتێ بەرەو سیایانەکەی مەبەراش دەسبەجا زەنجیرش بکەران و بە نویسەرە تایبەتەکەو وېشەرە نامێوە پەی تفەڼگچیەکا هۆرامانی بنویسان و دلېشەنە داوابکەرۊن کە ڕۊی دمایین چەنی وەرکۆتەی مەبۊن گرڎو تفەڼچییەکۍ هۆرامانی دلۍ قەڵاکېنە وەزارەو تاکو چەمشان بە کیانیاکاو خان ئەحمەڎخانی بگنۊن. هەر بە یاوای هۆرامییەکا پەی یاگۍ دیاریۍ، لەشکەرو خان ئەحمەڎخانی هۊتەرەشان پەی بەردۍ و غافڵگیرانە هەر چاگەنە سەڎ کەسېشا چەنە کوشتۍ، دماتەر لەشکەر لوا دلۍ قەڵاکۍ و هەرکەسێ جە وەچەکانو (بەهمەن = وەچۍ حوکومڕانا هۆرامانی) جە ژەن وگەنج و پیر وجوان و زاروڵۍ گرڎشان کوشتېنۍ ، پانەیچە خان ئەحمەڎخان تاوانش دەس ملو هۆرامانیرە بگېرۊن.
7- عەباسقولی سان:
عەباسقولی سان، کوڕو بارام میرزابەگین، ئەڎاش کناچۍ ئەڵڵاوێردیخانی لوڕستانینە، دمای کوشتەی تاتەیش و (سڵېمان بەگ) برایش و قۆمەنزیکەکاش، بریان پەی یانەو بابایش جە لوڕستان، یانەو تاتەو ئەڎێش، چاگە گۆرە بییەن و یاوانپەنە، نامبریا خوڼەوارێ خاس بییەن و شارەزایێ فرەش جە لێکۆدایو قورئانی موبارەکی و فەرماییشتەکا پېخامئاوەرینە بییەن، زوانەکانو عەرەبی و فارسیش بەخاسی زانێنې، پېسە ویاری سەربازیچ کەسێ ئازا و چەنەئاما بییەن، دلۍ جەنگو مییانو دۆڵەتی عوسمانی و سەفەوییەکانە چەنی لالۊیش (شاوردیخانی دوەم)ی، شانبەشانو سەفەوییەکا دژو عوسمامنییەکا گژیان و ئازایەتیێ کەم وېنەش ئەرمانان، ئا ئازایی و چەنەئامایەش بییەن مایۍ ڕەزابییەی شا ئیسماعیلی سەفەوی، کاتێ شا ئیسماعیل خەبەرو بنەچەو عەباسقولی بەگیش پەرسان، شاوردیخان ڕازەو کوشتەی بارام میرزابەگی تاتەیش و سڵېمان بەگی برا گۊرەیش و قۆم و کەس وکارە نزیکەکاش پەی شا ئیسماعیلی گېڵنانۆ، باسو ئانەیچشە کەرڎەن چا کاتۆن ئیتر (عەباسقولی بەگ و حسێنقولی بەگی براش) ئامێنۍ پەی لوڕستانی و چېگە پەروەردەکریێنې.[1]