وېش مەی
بەشو پەنجۆمی
لوانی نزیکشوە نیشتانېرە، لاش کەردوە و تەماشاش کەردانی، زوانم لاڵ بی، سسڵام.... یەواشێو جوابش دانیوە. واتم بەخشەم ئا کاتییە نەتاوام دەس وەشیت چەنە کەروو ئەڎام ئۆرژانسەنە فرە ماتڵە کەرڎېبێ. هیچش نەوات، جە وېم مەنانیرە پاسە سەرد و سڕ بېجواب مەنانیوە. تاکو هۆرێستانیوە پەرساش نامېت چېشەنە؟
سەرەم سڕ مەنە، دلې دڵوو وېمەنە واتم ئاخر بە تۊ چېش نامېم چېشەنە؟ بەڵام یەواشێو واتم نامېم سەحەرەنە.
دەنگش دوە ڕەگە بې، واتش: سەحەر دوعای خێری کەرە پەی بابەیم. دیسان نیشتانیرە و واتم مەگەر نەوەشیش چېشەن؟
واتش: شېرپەنجە، دوکترێ تەمەشا بڕیەن و تاکو ئیسەیچ بە چەنی دەوا و دەم دەزگا دەوامش ئاوردەن. یەواشێو واتم: خوڎا گیان شفاو خێریش بڎەو. واتم ئەڎا گەورێ منیچ نەوەشی دڵیشەن. دەسم کەرد گیفانەمەرە و کلکەوانەکەم بەر ئاورد. واتم نمەزانو چن مێژۆ، بەڵام با لاتاوە بۊ تاکو پووڵەکەتا مڎەوە. خوەی گېرت و یەک ڕاس گېڵاوە لاو منوە. واتم وەی ئینە پەی چێ پێسشە کەرد؟ گۆڵێزە قووتێم کەوتەنە. واتش: من کلکەوانەکەو تۊم گەرەک نیەن بازەش پەی وېت، بەڵام یەک چېوم چەنە گەرەکەنی. دلې دڵوو وېمەنە واتم سەحەر کارت تەمامەن. هەزار دانە ۋیرێ جۊراجۊرێ داشا مەژگم. خراوتەرینش ئانە کە لاشەم چیا بیوە و موېم کرژێ بیېوە. لاڵە لاڵ واتم چېش؟
واتش مزانی قورئان بوانیوە؟ دڵم کەوتەرە و واتم: بەڵې.
واتش: قەوڵم پەنە بڎە پەی بابەیم بوانیشوە تاکو نەختێو ئێشش بسرەو، قەوڵ مڎەی؟
واتم بەڵې بە دڵنیایەوە. هۆرێستانیوە لوانیوە دلې نەوەشخانەکەی. دلې دڵوو وېمەنە واتم: خۆڵە سەرەتەرە سەحەر پەی ویریت و ۋیریت. کوڕو کابرای چېشش گەرەک بې و تۊ چېش دابېش مەژگت.
لوانی پەی یاگې نماوناکەی تاکو بە قەوڵێو دابێم عەمەڵ کەروو. یەک سەعاتێوەم پۆوەشی ئێجا ئامانێ بەر. کتووپڕ وەرو دەمیمەنە سەوز بی. کەمیە خوا و واتش: زانام نمەڎی چیروو قەوڵیتەرە.
منیچ واتم سەحەرە قەوڵش بلۊ سەرەش نمەلۊ. وەی خوڎا گییان پېچەوانە واتم. دەسش کەرد خوای منیچ فرە تەرێقەوە بیانی، فرە فرە..
واتش: نانوو وېرەگایت واردەن؟
واتم: نە
واتش: بلم دلې حەوشێ تاکو بلوو باروو پەی هەر دەویما.
نویسەر: ئارەزوو ئەمانی
هۆروەگېڵنای: گوڵزارشەریفی_بېساران.[1]