وېش مەی
بەشو حەفتۆمی
دوې سەعاتێ دماتەر بە واتەو دوکتری ئەڎام تەرخیسە کریا. جلەکاو وەریش واڕەیم و سەرو تەختەکەیوە کېشنامەرە واتم: ئەڎا گیان چاگەنە بنیشەرە تاکو ئیسە مەوە. عازا لوانی تاکو لاو بابەو کوڕەکەی تاکو خوڎاحافێزیش چەنی کەروو. تەقەم دا بەرەکەی واتش: فەرماوە، لوانی ئۆ دیم، دیم سەرو سەڼەڵیوە نیشتەبێرە. سڵامم کەرد، ئارام جوابش ساناوە. واتم: بەخشەم ئامانی خوڎاحافێزی کەروو ئەڎام تەرخیسە بییێنە. دەسش کەرد خوەی و ڕوو بە من ئامە و واتش: بە سڵامەتی ئیشەڵڵا، وەشحاڵ بیانی سڵاموو منیچ بیاونە لاش. واتم: مەمنوون بېزەحمەت شمارە حەسابییەم بڎە با پووڵەکەیت پەی کیانوە. ناڕەحەت بی و واتش: ئېمە هېزی شەوې حەساوما پاک بیوە ویرت شیوە؟ واتم ئاخر پېسە نمەکریۊ، من تەرێقەوە بوو، واتش: لوە سەحەر نەوەشینەکېت چانە زیاتەر ماتڵە مەکەرە. خوڎاحافێزیم چەنە کەرد و ئامانی بەر، تاکو ئاخروو ڕاڕەوەکەی ڕوانەش کەردانی. زەینم دەرگیر بې، ئاخرش یاوېمێوە یانە. سەعات نزیک بە دەو شەوې بې، گەرەکم بې زەنگش پەی بڎەو دوو دڵە بېنې. نەزانیا چ مەرگیەمەن، بەڵام فرە حەز کەرېنێ دەنگش گنۊ گۊشم. گووشیم هۆرگېرت و زەنگم پەی دا، دمای یەرێ چوار بۊقا گووشیش هۆرگېرت. دەنگش مانیا بې، سڵامم کەرد، دیسان دەمم پېچیاوە یۆرە و لاڵە بیانیوە. ئارام جوابش دانیوە، هەواڵوو بابەیش پەرسام واتش: هەر پا شێوەنە خاس نەبییەن. قسېوەتەرم نەکەرڎە، فەقت واتم ئیشەڵڵا زووتەر حاڵش خاس بۊوە. عازا خوڎاحافێزیم چەنی کەرد و گووشیەکەم قەت کەرد. چن ڕوێ ۋیەرد، ئێتر بە وېم ئا ئێجازەمە نەڎا بنەموو تەلەفوون و هەواڵپەرسیش کەروو. ماوایەش پۆوەشی، سەعات دوانزەو شەوې کتووپڕ پەیامېوەم پەی ئامە، نەمام گووشی و سەرنجم دا.
نویسەر: ئارەزوو ئەمانی
هۆروەگېڵنای: گوڵزار شەریفی_بېساران.[1]
کوردیپێدیا جە دلېنەو ئی بابەتۍ ۋەرپەرس نېیەن، خاۋەنو/خاۋەنۊ بابەتەکۍ ۋەرپەرسیارەن. کوردیپێدیا بە مەبەسو ئەرشیڤکەرڎەی ئی بابەتېشە تۊمارە کەرڎېنە.
ئی بابەتۍ 145 جارۍ ۋینیێنە
پەیلۋاو وېت چە بارەو ئی بابەتۍ بنۋیسە!