وېش مەی
بەشو دەهۆمی
گووشیم زڕیاوە، ئی جارە سڵامش وس وەڵێ سڵامەکەیم. فرە ئارام بې، واتش: بیانی مزاحێمەت مەگەر نا؟
واتم: نە ئانە چ قسیەنێ؟
واتش: سەحەر تەنیایی ئازاریە قۆرسەنە، مەگەر نە؟
واتم: ئەرې وەڵڵا فرە فرە.
واتش: تۊیچ پېسەو من بې‌ ئەڎا و بابێنی، ئەرې؟ دمای کەمیە خوا و منیچ خوای گېرتانی و واتم: ئەرې، بەڵام تۊ چەنی زانات؟
واتش: نەوەشخانەنە شکەم لوا، زانام چېشت کەرد پەی وسنای ئەڎا گەورێت. واتم ئەر بابەش بیایا ئا گرڎە داماگی نەکېشێ پەی خەرجوو نەوشخانەکەی. دلې دڵوو وېمەنە واتم ئی کوڕە چ ژیرەن.
واتش: دڵم موازۆ بلوو باموو تارانی.نمەی بلمێ، واتم وەی یا ئەڵڵا ئی کوڕە چېش ماچۊ؟! ئەویچ پی شەوەنە کە سەعاتە نزیکوو هەشتوو شەوېنە.
واتم: نە نمەتاو فرە دێر کاتەن، واتش: قەڎ نمەکەرۊ مزانوو ئەڎا گەورێت نمازۊ بەی وېم تەنیا مەلوو. ئاخرش مشۊم بە تەنیایی وېم گنوورە. دڵم پەیش سوچیا. دلې فێکروو ئانەینە بېنا چېوێو واچوو ئارامش کەرۊوە، چ واتش سەحەر کاتێ ملی ڕارە خاس سەرەت هۆربڕنە. سەرەم سڕ مەنە واتم: یانی چېش، حاڵیم نەبی؟! واتش: ئاخر هێشا دلې لەمم مېشۊ. هۊشتەن بە سەرەوە دات لەمێمەرە؟ خوەی گېرتانی، ئاڎیچ دەسش کەرد خوای. دلې دڵوو وېمەنە واتم: ئی کوڕە وەرو وېشوە بابەش مەردەن خەریکەن ویرەوەریێ ۋیەردەیم پەی مەگېڵنۆوە، واتم: خاس سەرو چەمی، ئیسەولا هاگام هەنە. واتش: ئافەرین، دەی ئێتر بلە بیاوە هەرمان و کاریتەرە با منیچ بلوو پەی باموو تارانی. خوڎاحافێزیش کەرد و گووشیش قەت کەرد.
ڕوێ ئێنێ و لوێنێ، ڕابێتەو من و پەیمانی ڕۊ به ڕۊ فرەتەر بې. ئیسە ئێتر زەنگ دای پەی یۊترینی بییەبی بە کاروو گرڎ ڕوانیما. جار جاریچ لوێنمێ بەر. هەست کەرېنا ئێتر دڵم خەتوو ئاۋەزیم نموانۆوە و خەریکەنا وابستێش بوو. ئاڎیچ هێنوو کێ؟! هێنوو کەسیە کە ئاسمان تاکو زەمین جیاوازیما هەن. وابەستەو کوڕیە کە ماشینوو چیروو پایش گرانتەر جە یانە پەنجا میتریەکەو من و ئەڎا گەورێمەن.
نویسەر: ئارەزوو ئەمانی
هۆروەگېڵنای: گوڵزار شەریفی_بېساران.[1]