وېش مەی
بەشو سېڼزەهۆمی
دڵەڕاکېم بې، پاسە بزانوو ئەویچ پاسە بې، چوون سەرەنجو پایام دا ئارام و قەرارشا بڕیا بې. دەمم لکیابێ یۆرە. دڵم خەبەرش دا بې قەرارەن هەواڵیە ناوەش بژنەو. ژەنی گرڎیما ئا هەست و ئێحساسمانە هەن. نمەزانو نامېش چېش بنیەو، بەڵام مەتاو بواچو حێسی ششۆم. چیرو چەماوە سەرەنجش دێنێ تاکو ئاخرش ئاما قسێ، سەحەر؟ واتم: بەڵې.
واتش: من گەرەکمەن ئێرانی جیا بازوو. هەناسەم کپ بی. گۆڵێزە قووتێم کەوتەنە. واتش: من تازە بە دماڕۆ ئێرانی فرە دڵسەردەنا. کەسیەیچم چی دنیای نیەن تاکو دڵم بە بییەش وەش بۊ. دلې دڵوو وېمەنە واتم، ئەی من چېشەنا بې‌ماریفەت؟ بەڵام هیچم نەوات. واتش: هەرمانە و بارم خەریکەن مەگنۊ ڕا، چاگەنە گەرەکمەن شېرکەتیە وزوو ڕا. ڕەفېقێچم بڕیارشا دان یاردەیم بڎا. گاهەز دماڕۆ من چاگەنە بۊ سەحەر. من مشۊم بلوو تاکو هەر چی ویرەوەریێ تاڵێ ئی ساڵامەنە ویرم بشاوە. دڵم ئاماجۊش، حەز کەرېنێ خۆڕو ملو دڵیمەرە و واچوو خۆڵە ملو سەرەیتەرە سەحەر دڵت دان بە کوڕیە کە خەریکەن جە ئاوات و ئارەزوەکاش چەو پەڕوو دنیای ماچۊ.
پەیمان واتش: فەقەت یەک دڵەڕاوکیەم هەنە ئاڎیچ تۊنی. تۊ گەرەکتەن چېش کەری؟ دڵوو وېمەنە واتم ئاخر بە تۊ چېش؟ 
بەڵام ئاخرش واتم من خۊ وەڵتەر پەنەم واتی، من تاکو ئەڎا گەورێم بۊ چەنیش هەنا، واتش: ئاخرش کەین!؟ واتم ئاخرش ئا کاتەنە کە ئێتر ئەڎا گەورێم نەبۊ من مانوو تاق و تەنیا، بە چەمې پەڕ هەرسێوە، تەماشاش کەردانی و واتش: قەوڵ مڎەی وەشبەختە بی؟
واتم نە، من هیچ قەوڵېوەت پەنە نمەڎەو. ناڕەحەت بی، هۆرێستوە. منیچ هۆرسانیوە. واتش: خاس قەوڵ بې قەوڵ. چوون مەزانو وېتوە قەوڵێ نمەڎەی. گەڵوەم بۊغزی گېرتێبێ، کاتە بې تەقۊوە. تەرسێنا پەتەم گنۊ سەرو ئاوێ و پەنەم بزانۆ. واتم بې زەحمەت من بیاونەوە یانە. ئاڎیچ یەواشێوە واتش خاس و قەبووڵش کەرد.
نویسەر: ئارەزوو ئەمانی
هۆروەگېڵنای: گوڵزار شەریفی_بېساران.[1]