وېش مەی
بەشو چواردەهۆمی
دوې مانگێش پۆوەشی. فرە کەم بە یۊوە لوێنمێ بەر، ئەڵبەتە من وېم حەز نەکەرېنا زوو زوو بلمێ، واچېنا بەشکەم عاڎەت کەروو. وېم خڵەتنێنا. هەر چی شەوېنێ سەرو سەعات یاڼزەی زەنگ دێ نزیک بە یەک سەعاتی بە یۊوە قسێ کەرېنمێ. شۊنی قسەکامارە حەساوی دڵم پەڕ بې و پەڕ بە دڵ گرەوێنا. چی دنیانە تازە دڵم بە کەسیە وەش بییەبێ ئاڎیچ خەریک بې جیام ئازێ و لوای لوێ. هەژارە بییێبېنې، پەیمانیچ وېش زانێ، بەڵام من نقوو وېم چنیە بې. ئاخرش ئا ڕوە کە تەمەڎارش نەبېنا یاوا. ڕوێو کە پەیمانی خۆڵکە کەردانی بلمێ بەروە، ئا ڕوە کە ماتڵیش کېشێنا فرە زوو ئامە. ڕۊ خوڎاحافێزی. ئا ڕوە ناشیرینتەرین جلێم کەرڎېنە. تەنانەت لچێچم سوورێ نەکەرڎې و هیچ نەیاوانی وېمەرە. واتم با کاتو لوایشنە بە شپرزەیی وېم برمانوو. کەوتێبێنا ڕکەوە. چەنی وېش، چەنی وېم. کاتېوو لوایمێ سەرو قەراری، وەڵێنە بە چەمە سیاوەکاشوە سەیروو سەر تاکو پایش کەردانی. دڵم تەمیابێرە. بە گاڵتەوە واتش: ئافەرین سەحەر خاس یاواینی وېتەرە!؟ دمای داش چیروو قلەی، بەڵام من تەنانەت لچێچم نەجووڵنای. یاگەکې جارانیمانە نیشتێمېرە، بەڵام به پېچەوانەو من ئاڎ حەساوی یاوابێ وېشەرە. چن قیافەش زەریف بې هەزار ئڼە وەشتەر بییەبێ. هەناسێ قووڵە قووڵێ هۆرکېشێنا. عەترێو وەشش دابێ وېش منیچ نەفەسەو وېم گېرێنا و هۊرش لووشێنا تاکو بۊو عەترەکەیش پەی هەمیشەی هۆرگېروو و یاڎمەنە بمانۆ. هەر دوە بېدەنگ نیشتێبێنمرە تاکو پەیمان ئاما قسێ و بېدەنگیش ماڕا. سەحەر مەزانی چېش؟! من و تۊ دەقێق پېسەنمێ یۆوی بۊنەو ئانەیوە هەر ئا کاتیە جە نەوەشخانەکەنە فرە حەز کەرېنا یاردەیت بڎەو. گاهەز باوەڕ نەکەری، بەڵام زوو لای ماتڵوو قەزیە پاسێ بېنې. سەحەر خوڎا تۊش نیای سەرو ڕاو من تاکو بزانوو بېکەستەر جە من چی دنیای هەنې. چانیە کە ئی ماوا بە یۊوە بېنمێ و تۊم شناسای فرە فرە وەشحاڵەنا. تۊ نمەزانو، بەڵام من وېم ماچوو فرە فرە وەش شانسەنا کە تۊ ئامای سەرو ڕایم. دەسش کەرد دلې گیفانېشرە و جەعبییە میکلەش بەر ئاورد و پەنەش دانی و واتش: خەڵاتیه ناقابل جە تەرفی ڕەفېقیەوە پەی ڕەفېقیە ئازیزی. جەعبەکەم کەردوە ملوانیە فرە زەریفەی تڵاینەش چەنە بې. فرە فرە زەریفە بې. منیچ عازا کەرڎەم ملم، سەرەنجېوەش دا و واتش: سەحەر ئانە دیاری منەن هۊشت چەنەش بۊ. واتم: حەتم دڵنیا بە فرە وەشم گەرەکەن.. یەک سەعاتېوەش پۆوەشی ئاخرش قسێ ئەسڵیەش درکنا. سەحەر من ئێتر چوارشەممەی مەلوو. یەک چرکە دڵم نمدرا. دەسێم نېشتێ لەرزای، خوڎایا ئارۊ چن شەممەن؟؟ یەکشەممە.. یانی یەرێ ڕوێ تەرش مەنەن؟! هەرەقەتیانە تاکو یەرێ ڕوێ تەر پەیمان جیام مازۆ و مەلۆ؟!
واتش: شەوە یەرەشەممەی خوڎاحافێزی مەکەرمې، ئیسە زوەن مەگەر نە؟ دڵوو وېمەنە واتم: ئیسەیچ هەڵای دێرەن.
نویسەر: ئارەزوو ئەمانی
هۆروەگېڵنای: گوڵزار شەریفی_بېساران.[1]
کوردیپێدیا جە دلېنەو ئی بابەتۍ ۋەرپەرس نېیەن، خاۋەنو/خاۋەنۊ بابەتەکۍ ۋەرپەرسیارەن. کوردیپێدیا بە مەبەسو ئەرشیڤکەرڎەی ئی بابەتېشە تۊمارە کەرڎېنە.
ئی بابەتۍ 195 جارۍ ۋینیێنە
پەیلۋاو وېت چە بارەو ئی بابەتۍ بنۋیسە!