وېش مەی
بەشو پاڼزەهۆمی
شەوەو چوارشەممەی حاڵم فرە خراو بې، خراوی خراو. سەعاتەو یاڼزەی گووشیم زڕیاوە. پېسە واچی ئاڎیچ حاڵش خاس نییەن. دەنگش دوە ڕەگە بې و پېسەو جارانی شۊخیەکەش نەمەنە بې. واتش: سەحەر ئازاڎ کەرڎەی فرە سەختەن؟
واتم: یانی چېش، چېش ماچی؟
واتش: نمەزانو، فەقەت گەرەکمەن بزانوو سەختەن یام نە؟ واتم باوەڕم نیەن ئڼەیچە سەخت بۊ.
واتش: ئۆخەیچ پاسە بۊ ئاسووڎە مەتاوی ئازاڎم کەری. دڵم پەڕ بی و بې‌دەنگیە دەسم کەرد گرەوای.
واتم: مەگەر چېشت کەرڎەن کە ئازاڎی موازی؟
واتش: نمەزانو گاهەز کتووپڕ ئەزیەتم کەرڎېبی، بەڵام ئانەیە بزانە دەسو وېمەنە نەبییەن و هیچ کات حەزم نەکەرڎەن بە قسام ئازارەت بڎەو.
واتم: هیچت نەکەرڎەن تاکو دڵم بېشۆ چەنەت، گەردەنت وەش و ئازاڎ بۊ.
واتش ملوانەکې هەنە ملتەنە؟ واتم ئەرې وەڵڵا هەنە.
واتش: قەوڵ بڎە هیچ کات ناریشەرە ملتەنە، بەڵام شووت کەرد لاش بەری چوون کە دڵنیانا شوەکەت سەلێقەش جە من وەشتەرەن. دلې دڵوو وېمەنە واتم پەیمان ئێتر وەسېشەن تکات وەنە کەروو ئێتر خەفە بە. هیچم نەوات، ئاخر وئۆخروو تەلەفونەکەی بې واتم پەیمان ئێزنم مڎەی بەو فڕوکەخانە؟
واتش: نە سەحەر ئەسڵەن باسش نەکەری. دڵم بی یەک کڵپە گڕ، یانی هەرەقەتی سوا مەلۆ؟ 
واتم خاسەن فەقەت هاگات وېت بۊ.  پەیمانیچ واتش: تۊویچ هۊشت وېت بۊ شا پەری زاڎێ. خوڎاحافێزی سەخت بې بەڵام ئاخرش ئامە ملمارە. واتش: سەحەر گیان من مشۊم بلوو هەرمانې ناتەمامێم فرێنێ تۊویچ لوە بووسە دێر کاتەن. نەزانې من وەرمم شېویان و تاکو ڕۊ بۊوە نمەتاو چەمې بنیەو یۆرە. واتم خاس خوڎات چەنی.. بەڵام ویرت نەشۆوە دوعای خەیری کناچیە چی سەرو دنیاوە داییمە هامڕاتەنێ.
واتش: وېم مەزانو، تۊویچ ئانەیە بزانە کە کوڕیە چەوپەڕو دنیایوە ئێرادەتیە تاییبەتتش نێسبەت بە تۊ هەن. خوڎاحافێزت سەحەر گیان. منیچ تاقە یەک کەلیمە واتم: خوڎاحافێزت بۊ. کاتێ تەلەفوونەکە قەت بی پەشۆکیایبېنې گووشیەکەم پېسەو چېویە تەبەڕۆکی ماچێ تاییبەتتم کەرد و نیام لاوە. گرەوای ئەمانش بڕیێبېنې، نەتاوێنا وەرو وېم گېروو دەنگم بەرز بی، تەرسێنا ئەڎا گیانەیچ بزانۆ و ئاوڕووم پشۆ. تاکو ڕۊ بیوە چەمېم نەنیای یۆرە. چوارشەممە ئامە، جە وەڵتەری کەمیە خاستەرە بېنا، چوون زانێنا ئیسە کەسیە وەشەویسم هەن ئاسمانوە و ڕوو بە دماڕویە بە قەوڵوو وېش ڕۊشنی مەلۆ.
نویسەر: ئارەزوو ئەمانی
هۆروەگېڵنای: گوڵزار شەریفی_بېساران.[1]