ڕەچەڵەک و ڕیشەو هۆرامییەکا
هورئەوەگېڵنای و ئاماڎەکەرڎەی: ئەسعەد ڕەشید
بەشەی ویس و یەکەمە
فەرهاڎ میرزا و عەلی ئەکبەرخان و پیلانەو کوشتەی حەمەسەعیڎسانی:
پیلانەو کوشتەی (حەمەسەعیڎسانی) و کوڕەکاش دلې یانەسەراو ویلایەتو کورڎەسانی و بە فیتو (فەرهاڎ میرزا و عەلی ئەکبەر خانی) مجیانەرە، دلې گرڎو وردەکارییەکانو پېوەز بە ئەپا پیلانې (عەلی ئەکبەرخان) سەربەش کریان، بەڵام کاکڵەکەش ئەپی تەرزە بییەن:
حەمەسەعیڎ سان و خېزان و دەس و پېوەڼەکېش بە نیازو گېڵنایۆشان پەی ماواو وېشان، چەنی عەلی ئەکبەرخانی بگېڵاوە پەی (جوانڕۊ)ی، هامکات بکیانان شۊنەو (ئۆڕەحمان بەگ کوڕو سانی) پەی ئانەی بێوە پەی عەینو یاگې گوایا دمای چن ڕوێ بە ئیحترامۆ بگېڵیاوە پەی (نۆسووڎې) و سەرو حوکومڕانی هۆرامانو لهۊنی دەسبەکارېبانۆ، عەلی ئەکبەرخان پېسە هەر خائینێ ئەڵقەگۊشی پی تەرزە باسو ئا پېلانېشە کەرڎەن:
بە درېژایی ڕاو گېڵایۆمان جە (سنە) پەی (جوانڕۊی)، بېزاری و بېتاقەتیێ فرە پۆ (حەمەسەعیڎسان)یۆ دیاربې، جاری چامنەبې فرسەنگێ گنې وەڵېمان و جاری چامنەیچ بې دوې فرسەنگې گنې دمامان، بەڵام جە مەسەلې ئا وەڵکۆتەی و دماکۆتەیەشە وېم نەیاونانە و فرە لامۆ مەرام بې کە ئاڎ دڵنیابۊ کە ئېمە هیچ نیازێ خرابمان چەنیش نییەن، پەوکەی هەر هەواڵیچش نەپەرسېنې تاکو دڼێ گومانیچش لاوە نەمەنۊ، کاتێ یاوایمې (جوانڕۊ) پەنەم وات جە هەر یاگێ دڵت گېرۊ چاگە نیشەرە، چوونکوم هیچ بەڎگومانیێ سەرتۆ نییەن. دمای دوې یەرې ڕوا جە مەنەیۆ و وچاندایشان سەرو ئانەیە ڕېکېکۆتیمې گوایا مەنەیۆ ئاڎیشا جە (جوانڕۊ) هیچ ئیسفاڎێش نییەن، پەوکەی خاستەر ئانەن بکیانۊ شۊنەو ( ئۆڕەحمان بەگی) کوڕیش بێ پەی لایشان تاکو گرڎشان پېوەرە بگېڵاوە پەی (نۆسووڎې)، ئامای ئۆرەحمان بەگی پەی جوانڕۊی لاو منۆ فرە مەبەس بې، چوونکوم فەرمانو شاهانەی جەختش کەرڎەبې کە بە هەر قیمەتێ بییەن مەشۊم بکوشیۊن.
سەرو قسەکې عەلی ئەکبەرخانی، حەمەسەعیڎسان کیاستەنش شۊنەو (ئۆڕەحمان بەگی کوڕیش) و دمای چوار ڕوا یاوان (جوانڕۊ)، کاتێ لوان پەی لاو عەلی ئەکبەرخانی بە گەرمې پېواییش چەنەکەرڎەن و دڵنەرمیش وەراوەر ئەرمانان، دیارەن ئانەیچ پەی خەڵافنای بییەن کە بە شېنەیی بتاوان پیلانەو دلېنەبەردەی سەردارە هۆرامییەکا جابەجابکەران، هەر یەکەم شەوەو یاوای (ئۆڕەحمان بەگ) دمای ئانەی چوار سەعاتې شەوە ویەردېنە، عەلی ئەکبەرخان کیاستەنش شۊنەو (تەیفووربەگ)ی یاگەگیریشەرە کە نۊکەرێ دڵسۊزو وېش بییەن و فەرمانو شاهانەی بە نیازو دلېنەبەردەی (حەمەسەعیدسان و کوڕەکاش) لاوە درکنان، هامکات فەرمانش پەنەدان کە مەشۊم ئاڎ پا ئەرکییە هورزۊ، دمای قسە و باسێ فرەی یاوێنې ئەپینەی:
چن تفەڼگچیێ جە نۊکەرە دڵسۊزەکاشان بە چەک و تیغی جەنگی هەر سەروېرەگا دلې قەڵاو جوانڕۊینە حەشار بڎریان، کاتێ سفرەو نانواردەو ساعبی یاویۊرە (سەیفور بەگ) بێ پەی لاو (عەلی ئەکبەرخانی) و شکات جە باعزێ جە نۊکەرەکاشان بکەرۊن گوایا سەرکېشیشان کەرڎەن و بە قسېشان نەکەرڎەن، پەوکەی هەتا تەمې نەکریان ئاڎ نان نمەوەرۊن، چا عانەیچەنە عەلی ئەکبەرخان بەربشۊن پەی تەمې کەرڎەی نۊکەرەکا، هامکات چۆلایچۆ ئا نۊکەرې هەکە دلې قەلاکېنە وېشان شارتەنۆ بزیارەو تەپکوا سەرو سفرەکەی و (حەمەسەعیڎسان و میرزا بابەکر) دەمڕاسو سانی بکوشان.
چەنی یاوارەی سفەرو نانو ساعبی پیلانە گڵیاوەکې (عەلی ئەکبەرخان و سەیفوور بەگی جاگیریش) دەقا و دەق پېسە وېش کەردې کریێنە، (حەمەسەعیڎسان) بە تېغ و (میرزا بابەکر) بە گرۊڵییە کوشیێنې، (فەیروزە خانمە) کاتێ ئا هەواڵەشە ئەژنییەن ڕوومەتو وېش وناڵین کەرڎەن و قژېش ڕنیېنێ، لوێنە پەی لاو (عەلی ئەکبەرخانی) و تکێوە فرېش وەنەکەرڎەن کە (ئۆڕەحمان بەگی) نەکوشۊن، ئەچی بارۆ عەلی ئەکبەرخان واتەنش:
کە فەیروزەخانمەم پا تەعرە دییە، قەرارمدا کوشتەی ئۆڕەحمان بەگی چن ڕوێ دما بوزو، پەوکەی ئاڎیچم کیاست پەی زیڼانی پەی لاو (ڕۊسەم بەگی برایش)، بەڵام هەرگیز نەتاوېنا جە مەسەلې کوشتەیش چەمپۊشی بکەرۊن، چوونکوم ئانە فەرمانو شاهانەی بې و هەر ئەشیێ جابەجاکریێ، دمای ڕوێ فەرمانمدا (ڕۊسەم بەگی) ئازاڎ بکەرا، چوونکوم بە تەمەن زاروڵە بې، ڕایچم دا فەیروزە خانمە تاعزیەو مېردەکەیش بنیۊ و ڕایچمدا بە وەکېڵ و بەگزاڎەکانو جوانڕۊی سەرش بڎان و دڵنەواییش بکەران.[1]