چاشتەو خاڎمی
هورئەوەگېڵنای و ئاماڎەکەرڎەی: #ئەسعەد ڕەشید#
بەشەی دەهەمە
ڕوێشا، چن کەسێ ئامێ سەرەڕام و گېرتاشاو بەردانېشا پەی ئاواییێ کە دەگێوەبې ئاغەکەش موسوڵمان و ڕەعیەتەکېش فرېشان ئەرمەڼیې بېنې، ئاغە ماچۊ: تۊ چەنی قەشەو دەگێکې واتە و واچی ئایینی بکەرە، گەر بەزیای ئانە ڕووتت کەرمېوە، گەر سەرکۆتی ئانە ئازاڎت مەکەرو لوە ڕاو وېتەرە. یاخوڎا قەشە ئڼە زانا نەبۊن چەنیش بەرنەبەرو، کۊنیشت ڕازیاوە، قەشە ئاما، واتە و واچ دەسش پەنەکەرد؛ من بە قەشەیم وات ئېمە گەر وەشەویسێما بە چەک بکوشیۊ چەمېمان بڕوا نمەڎان ئا چەکەیە بوینمېن، کەچی مەسیحییەکې ئا دارە کە مەسېحشا پەنە خاچدان و هورواستەن بە پیروزش مزانان و بە گولانەیی هەریۊشان ئینا ملشانەو بەرەکەتش چەنە مەوازان. قەشەی وات: پاسەدیارەن پیێوە ناحاڵینی، سەلیب جە شکڵو بنیاڎەمین، پەوکەی قەڎرش وەنەگېرمې، تەماشە بکەرە؛ قەشە هەردوې دەسېش وەڵێکەردێ و بی بە سەلیب. منیچ پەنەم وات: ڕاسمەکەری مامۊ قەشە، بەڵام ژەنەکېچ هەر پېسە سەلیبی چامنېنې، چەنی ملدې لاشان، حازریې پا قسە قۊڕی دەسشا کەرد بە خوای و ماڵەکەشا دانێ و ئازاڎشا کەردا. جارێتەریچ چەتا ڕووت کەردانێ، ئامێ و گەرەکشانبې بلان، واتم من ماڵو وېمتان چەنەمسانووە، من مېمانو شېخو خوڕخوڕەینا، جە تەرسەو مەولاناینە کە نامېشا ژنیەبې دانېشاوە. حەمەبۊر، وەر چانەی تووشو ئاوارەیی بۊن ژەنێش ئاردېنە کە قۆمەو وېشەنەو نامېش (تایمین)ە بیېنە، ئا ژەنېچە ئەچا ئاوارەییەنە چەنیش ژیوێنەو ئەچا ماوەو ئاوارەییەنە کناچێشا بیېنە، دمای حۆت ساڵا ژیوای ئاوارەیی شېخ کیاستەنش مەولاناش بەردەن پەی لاو وېش و گېڵێنێ پەی وەڵاتی، ئۆسا حەمەبۊر کە ئیسە بییەن بە مەڵڵا محەمەڎ، دەسې ژەن و زاروڵاش گېرتېنې و جە (شەرەفکەندۆ) گېڵانۆ پەی (سابڵاخی). چی بەینەیچەنە کە ئاڎ هەڵای فەقی بییەن ئەڎاش مەردېنە، یانە لاڎەگایێوە بە پۊشاکێ کۊنۆ ئامان پەی شاری، پەی دوې هۊڎا مەگېڵۊ دلېشانە مەرزیۊرە، (حاجی سەی مسەفای کولیجی) تاتەو (سەی موحیەدینە شینەی) و باباو (سەی عەبدوڵڵای کولیجی) هۊڎێوە پشقەلدانش مڎۊپەنە کە پاکش بکەرۊوەو چەنەش بژیوۊ و کرې نەڎۊن. تاتەم واچې (ئامینۍ) ئڼە دڵش ئەپا یانەو وېشە وەشبې کە هیچ پاشێوە ئڼە وەشیش بە سەراو دیواخانو وېشۆ نەبییەن. با ئانەیچمان ویرنەشۊن کە مەولانا پا وارەزاو وېشە واتەنش: حەمەبۊر دمای وانای حوجرەی بییەن بە مەڵڵا محەمەڎی بۊر، دماییچ کە لوان حەجێش کەرڎەن بییەن بە (حاجی مەڵڵا محەمەڎی بۊر). مەڵڵا محەمەڎ دلې شارینە ملش نییان کاسپیۆو جە ماوێ کەمەنە تاوانش دەسێ یانې بسانۊ و یانەقۊڵێ بنیاڎ بنیۊن، دلې جەنگی جەهانی یەکەمینە کە ڕووسەکۍ قەتڵ و عامو خەڵکو سابڵاخیشان کەرڎەن، یانەکەو ئاڎیچی تاڵان کریان، ژەنەی یەکەمەش مەردېنە، دیسان کناچە چواردە ساڵەکېش بە مەردەیش داخێش نیێنە جگەرو تاتەیشەرە، ژەنێ تەرەش ئاردېنە کە کناچې (سڵېمان ئاغا) نامێ کۊنە بازرگانی بېهەرمانکۆتەی بیېنە، سەرو ئانەی کە دیڎەنش ژەنەکېش بەبې سەرپۊش ئامێنە وەربەرە و کۊڵان، تەڵاقش دێنەو بې ژەن و بې ئۆلاڎ مەنەنۆ. کاسپی کەرڎەینە فرە زیرەک و وت و وریا بییەن، دوەبارە دمای تاڵانی ڕووسی وېش گېرتەنۆ و زەڕو ماڵێ خاسش نییانۆ پېوەرە، حۆلې ژەنئاردەیش دێنێ، کناچې (حاجی سەی حەمەئەمینی سارەوانان)یش داواکەردېنە، کە تەمەنش شاڼزە ساڵەو فرە زەریفەو بەنامبانگە بیېنە، مەڵڵا محەمەڎ تەمەنش سی و دوې ساڵې بییەن، بەڵام پیا کە زەڕدارەن و بە زەبرو زەڕیچ تەوەنی نەرمە مەبۊن. دمای ساڵێ جە فاڕایۆ وەیوې خوڎا ئۆلاڎێشا پەنەمەبەخشۊ کە تاتەی جە ئۊجاخ کۊریی و ئەڎێ جە بېبەری ڕزگارە مەکەرۊن، ماڵو دنیێ پەی ئارۊی نەبۊ پەی کەی خاسەن، هەر پەی چاشتەو حۆتەمو کوڕەکەیشان قازانێ گۆری مەسانان، هەرکەسی مشناسان مەچڕاش، مەبۊ (مەڵڵا تەهای) دۊسم باڼگ بڎۊ گۊشېشەرەو نامېش بنیۊ (عەبدولڕەحمان). بەشێ جە کتېبو چێشتی مجێور، نویستەی هەژار موکریانی، فاڕای پەی سەرو زوانی هۆرامی: ئەسعەد ڕەشید.[1]