کورد دلې چەرخەکا تاریخینە
هۊرئەوەگېڵنای و ئاماڎەکەرڎەی: ئەسعەد ڕەشید
بەشەی: چوارسەڎ و چواردەهەمە
* تاریحو (#07-03-1974#ز.)، سەدام حسێن نامێوەش ئاراسەو بارزانی کەرڎە، کە دلېشەنە نویستەبېش: داخەمەنە کە وەفدو پارتی ناما پەی بەغڎای جە مانگەو فێبریوەری، گەرەکمەن ئی جارە یۊ جە کوڕەکا بارزانی بێ پەی بەغڎای پەی واتە و واچی.
* تاریخو (#07-03-1974#ز.)، دارا تۆفېق و ئیحسان شېرزاد لوێ پەی بەغڎای، وەرنیارەکې بارزانیشان پەنەبېنې پەی داگیرکاری ئېراقی، کە فرېشان جە بارەو ناوچەکانو کەرکووکی و شارەکەی وېش بېنې، بەپاو دلېنەو وەرنیارەکەی مەشیێ دلې مەرزو ناوچەو ئۆتۆنومینە مەنێوە.
* تاریخو (#08-03-1974#ز)، لوای وەفدێ پارتی پەی واتە و واچی، وەفدەکە بە سەرداری ئیدریس بارزانی بې، ئینېچە ئەندامې وەفدەکەی بېنې: (دارا تۆفېق، ئېحسان شېرزاد، فوئاد عارف)، وېرەگاکەش ئیدریس بارزانی و سەدام حوسێن پەی ماوەو دوې دەمژمارا پېوەرە نیشتېرە، سەدامی پەنەوات کە سەوای کۊنگرەو بەعسیەکا مەبەسیۊو چاگە پەیتواچی تەمامەتی کوردەکا مڎەیمېوە.
* تاریخو (#09-03-1974#ز.) گېلایۆ ئیدریس بارزانی و وەفدەکەو پارتی، بەبې ئانەی هیچ چارێوە پەی گرفتەکەی ئېزیابۊوە.
* تاریخو (#11-03-1974#ز.)، وەڵاکەرڎەیۆ بەیانو ئۆتۆنومی پەی بەشێ جە ناوچەکانو پانیشتو کورڎەسانی بەبې ئانەی سەرداری شۆڕشو کورڎی پانەیە سازیابۊ.
* تاریخو (#11-03-1974#ز.)، داگیرکاری ئېراقی دەسشکەرد بە کۊچپەنەکەرڎەی زۊرەملې کوردە ئێزیدییەکا.
* تاریخو (#18-03-1974#ز.)، بەسیای ئاما و لوای و پڕچیای واتە و واچی میانو داگیرکاری ئېراقی و پارتو دیموکراتو کورڎەسانینە، کە زیاتەر بەمەڵامەتو ڕېکنەکۆتەیشان بې سەرو ناوچەو کەرکووکی.
* تاریخو (#23-03-1974#ز.)، ئەچی ساڵېنه (فەتاح شاڵی) کە کەسێ بېلایەنو خەڵکو سلېمانی بۍ لوا پەی بەغڎای، پەی یاونای وەرنیارو بارزانی پەی حکومەتو ئېراقی، چەربارەو دابەشکەرڎەی شارو کەرکووکی میانو ناوچەو ئۆتۆنۊمی و حکومەتی میانینە، بەڵام داگیرکاری ئېراقی ئا وەرنیارېشە لا ۋستە.
* مانگەو (04) ئی ساڵې، بە مەڵامەتو زیاڎبییەی ژمارەو پەنابەرە کوردەکاوە پەی دلې ناوچە ڕزگارکریاکا، بارزانی داواش ئەو شاو ئېرانی کەرڎە بە ڕاپەنەدای پەناهەندەکا کە دلې ئېرانینە نیشتەجایې بکریان.
* تاریخو (#03-04-1974#ز.) ئامای دنیای نویسەر، نورەدین سەعیڎ وەیسی دلې دەگاو (گرتک)، ناوچەو باڵەکایەتی.
* تاریخو (#08-04-1974#ز.)، سەدام حوسێن بانگشدا کە ئەچی کاتەنە هیچ جەنگێ دلې کورڎەسانینە بییەیش نییەن.
* تاریخو (#15-04-1974#ز.) تاکو (#15-07-1974#ز.)، بەپاو بەیانێ پارتی کەبە ئینگلیزی جە ئۆرووپا وەڵاش کەردۆ، داگیرکاری ئېراقی (1542) هۊتەرې ئاسمانیېش کەردېنې سەرو کورڎەسانی و بیېنې بە مایې کوشییای (485) کەسا و (433) دەگێ و ئاواڎیی وېرانې بیېنې، ئی هېزې سوپاو ئېراقیچ دلې جەنگینە بەشدارې بېنې: تیپەکې (1، 2، 4، 6، 8) و نیمەو ژمارەو تیپەکانو (3، 10) و نزیکەو 25 کەرتې تانکا و گرڎو هېزی ئاسمانی و چڼیین کەرتې جاشە کرېگېرتا.
* تارېخو (#15-04-1974#ز.)، گېرتەی سەربازگایێ گۆرەی جە ناوچەو زاخۊی و پانەیچە تەمامو ساراکانو سەرنیشتو موسڵی کۆتې چېرو دەسا پېشمەرگەی.
* تاریخو (#24-04-1974#ز.)، ناپاڵمۋارنای ملو شارو قەڵادزېرە جە لاو باڵەپڕەکا داگیرکاری ئېراقیۆ، کە بی بە مایې وېرانکەرڎەی شارەکەی و کوشییای و زامڎارکەرڎەی سەڎان کەسە بېتاوانا، ئەچا ناپاڵمۋارانەنە هونەرکاری گۊرانیواچ بورهان عەبدوڵڵا شاسوار شەهیڎ کریا و هونەرکاری گۊرانیواچ چیمەن ...؟ زامڎار کریا.
* تاریخو (#26-04-1974#ز.)، ناپاڵمۋارانکەرڎەی شارەکڵەو هەڵەبجەی بە فەرمانو داگیرکاری ئېراقی، کە بی بە مایې کوشییای (43) چل و یەرې هاموەڵاتیا و زامڎاربییەی سەڎان کەسا، چەنیچش دەیان یانې و مزگیې و وانگێ وېرانې بیې.
* تایخو (#29-04-1974#ز.)، بۊمباواران کەرڎەی پردەو گەڵاڵەی بە فەرمانو داگیرکاری ئېراقی، کە بی به مایې کوشییای (20) ویس کەسا.
* تاریخو (#04-05-1974#ز.)، چن وانکارێ بە نامەکانو (لەیلا قاسم، جەواد هەمەوەڼی، نەریمان مەستی، ئازاد سڵېمان، حەسەن حەمە ڕەشیڎ، مەحمووڎ قەراخی، ئازاد حوسێن، بورهان عەبدوڵڵا، محەمەڎ ساڵح سەلام، هیوا محەمەڎ ساڵحی)، بە فەرمانو داگیرکاری ئېراقی قەنارە دریێ.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید.[1]