کورد دلې چەرخەکا تاریخینە
هۊرگېڵنای و ئاماڎەکەرڎەی: ئەسعەد ڕەشید
بەشەی: چوارسەڎ و ویس و هەشتەمە
* تاریخو (#22-12-1978#ز.) کۊمەڵەو وانکارانو کورڎی، لقو بەرلینو وەرنیشتی کۊنیشتێشان سەرو بارو زروفو کۊمەڵەی و کورڎەسانی بەستە.
* تاریخو (#25-12-1978#ز.) خېزیای حەشاماتێ فرەی دلې شارەکڵەکانو هەریر و شەقڵاوەی، داگیرکاری ئېراقی بە ئاییر و ئاسن کۆت گیانو خەڵکە ناڕازییەکەی و چن کەسێ کوشیێ کە فرېشان ژەنی بېنې.
* ساڵەو (1979ز.)، چن تۊمارێ پېوەس پی ساڵېوە ئینێ وەردەسەنە:
* واتە و واچو حېزبو سۊشییالیستو کورڎەسانی (حسک) چەنی ڕژېمو ئېراقی بە میانگیری دکتور عەبدولڕەحمان قاسملۊێ، ئەپا نیازەیچە دکتور مەحمووڎ عوسمان لوا پەی بەغڎای، بەڵام هیچ مایێوەش نەبییە، ڕژېمو ئېراقی دلې گەرمەو واتە و واچەکەینە دوې سەردارې نامڎارې حسکیش دلې دۊڵەو سماقوڵی شەهیڎې کەردې بە نامەکانو شەهیڎ سەلیم و شەهیڎ شینە بۆڵێ.
* ئەچی ساڵېنە تایری خەلیلی دەسش کەرد بە گۊرانی واتەی.
* پەلامارەو مەڵڵاکانو ئېرانی پەی سەرو وەرکۆتو کورڎەسانی، شایانو باسین ڕژېمی تازەو ئېرانی ئا پەلامارېشە بە فەرماندە سەربازییەکانو سەردەمو شای کەرڎە.
* پېوەڼیکەرڎەی شەهیڎ مام ئیبراهیمی بە ڕېکۋزیاکا پاسۆکی.
* حېزبو دیموکراتو کورڎەسانی جە شارو نەغەدەی وەرکۆتو کورڎەسانی جەمبییەیێ جەماوەری گۆرەش ساز کەرد، دلې ئا جەمە گۆرېنە کوردې و ئازەریې گژیێ.
* سەرەتاو ئی ساڵې، گېریای ئەدیبو کورڎی محەمەڎو حەمە باقی بە دەسو داگیرکاری ئېراقی.
* پەکەکە حۆلېش دێ محەمەڎ جەلال بوچاکی بوکشۊ، بەڵام سەرش نەگېرت، ئی کابرا ئاغێوە دەسەڵاتدارو ناوچەو سیڤەرکی و ئەندامو پەرلەمانو تورکیای بې.
* تېکشییەی پېوەڼییەکانو داگیرکاری سوری و ئېراقی.
* ئەرەمەرزنای یەکیەتی نەتەوەیی دیموکراتی جە تورکیا، بە بەشڎاری ئی ڕېکۋزیایا: پارتو سۆشییالیستو کورڎەسانو تورکیای، کۊمەڵەو ڕۊشنویری شۊڕشگېڕی جە وەرکۆتو تورکیای، ژڵېوەو کوکی.
* بەستەی کۊنگرەو پارتی جە وەرکۆتو کورڎەسانی.
* بەرشییەی ژمارە (1) گۊڤارەو دەنگو ژەنا کورڎەسانی جە شارو مەهابادی.
* زامڎارکەرڎەی هونەرکاری وېنەکېش عەزیز سەلیم ئەحمەڎ و شەهیڎ بییەی هامسەرەکېش ئایشې ڕەسووڵ بە دەسو داگیرکاری ئېراقی.
* تاکو سەرەتاو ئی ساڵې، ژمارەو ئا کوردا کە پەی پانیشتو کورڎەسانی کۊچپەنەکریێبېنې، یاوێ (700) حۆت سەڎ هەزار کەسې.
* کۊتاو ئی ساڵې، داگیرکاری ئېرانی عەزیزی یوسفیش بە مەڵامەتو نەوەشی زېڵې دلې زیڼانینە ئازاڎ کەرد، بەڵام فرەش نەخواینا کۊچی دمایینش کەرد، ئی کەسە ئەندامی باڵاو حېزبو دیموکراتو کورڎەسانو ئېرانی بې، وەڵتەر بڕیارو خنیکنایش دریێبې، بەڵام دماتەر پەیشا فاڕا بە زیڼانی هەتا هەتایی.
* ئاوارەبییەی عەبدوڵڵا ئۆجەلان بە مەڵامەتو هەرمان و کاری ڕامیاری.
* ئازاڎبییەی غەنی بلوریانی جە زیڼان دمای خېزیای خەڵکو ئېرانی دژو ڕژېمو شاهەنشاهی، کەزیاتەر جە (20) ساڵا دلې زیڼانینە بې، کاتو گېڵایۆش پەی شارو مەهابادی، هەزاران کەسې لوێ پېوایشۆ.
* تاریخو (#04-01-1979#ز.) شاپوور بەختیار بی بە سەردارو ئېرانی و شاو ئېرانی هیچ دەسەڵاتێش دلې وڵاتینە نەمەن.
* تاریخو (#16-01-1979#ز.) محەمەڎ ڕەزا شای پەهلەوی _ شاو ئېرانی، وڵاتش جییائاست.
* تاریخو (#01-02-1979#ز.) گېڵایۆ ئایەتوڵڵا خومەینی جە پاریسۆ پەی تارانی، کە یەک ملیۊن خەڵکو ئېرانی دلې باڵەپڕخانەو تارانینە پېوایشۆ لوێبېنې.
* تاریخو (#11-02-1979#ز.) وڕارەی ڕژېمو شاهەنشایی ئېرانی، کە بی بە مایې ئانەی فرەو ناوچە کورد نشینەکانو وەرکۆتو کورڎەسانی بگنان چېرو دەسا کورڎی و حېزبو دیموکراتو کورڎەسانی.
* تاریخو (#12-02-1979#ز.) مەرزنارەی حکومەتو مەهدی بازرگانی جە ئېران.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید.[1]