ئا ڕېسە مڕېسیش هەم مەڕېسەشۆ
ڕېس، یام ڕېسای، پەی پەژمی بەکارمێ. ڕېسای پەژمی بە لەتەرې پەی وەشکەردەی بەڼی، یام پەی قوماشو چۊخەڕانکی. پەژمەکە شیی مەکریۊوەو بە لەتەرې یام خەڕەک مەڕېسیۊن، کرژ مەکریۊوەو هورش مەکەران بە شېوەو تۊپێ خڕې. ئیتر پەنەوازی پانەی نمەکەرۊن جارێتەر بڕېسیۊوە، چوونکوم هیچ سوودێش نییەن، تەنیا وېماڼایەن. ئی پەندې فېرمان مەکەرۊن کە هەر گوفتارێ کە واچیا، هەر هەرمانێ کە پۊڕیا، ئیتر پەنەواز نییەن جارێتەر بواچیۊوە، یام بکریۊوە، چوونکوم هیچ بەرهەمێش نییەن. ئا کردار و گوفتاری هەکە کەریشا و ماچیشا و تەنیا یەکجار وەشېنې ئیتر دوەجارەیشان گولەن و بېکەڵکەن. جیاتی ئانەی قسێ تەرەو هەرمانێ تەرە بکەرە با بەرهەمێش بۊن و کاتت بە زاییع نەلۊن، مادام قسەکېت یام هەرمانەکېت یاگې وېش گېرتېنەش، ئیتر مەرام ئامان دی و چانەی زیاتەر وېت هیلاک نمەکەرە.[1]