خانای قوبادی وەڵ جە یەرەسەڎ ساڵا چێوەڵ واتەنش
نویستەی: #ئیبراهیم میکە عەلی#
مەعلوومەن جەدەور دنیای بەدئەندیٛش
دڵشادەن هەرکەس وەزوانی ویٛش
ئیٛمەی هەورامی خوڎای پیشیٛوە خەلقیٛکەردیٛنمیٛ کەهەنمیٛ و پیٛسەو ماموٛسا جەمال بیٛداریچ ماچوٛ: عەریزەما نەڎان تا خوڎا بەهەورامی خەلقیٛماکەروٛ.
دەی ماڎام پاسەن پاریٛزنای ئی زوان و تایبەتمەندیەیە کە هەنما یوٛن جە ئەرکە گرنگەکاما و کەمتەرخەمیچ چا ویارنە تاوان و عەیبێوا کە حیچ پینەش نمەکەروٛ.
ئانە یاگیٛ داخیٛنە فریٛما پانەی تەفرەما واردەن کە خەڵکو دۆروپەشتیما ماچان: هەورامی زیرەکا و زوو فیٛرو زوانابوٛ، ڕیٛک پیٛسەو قسیٛ سیاسییە ئەورووپیەکا کە کوردشا پانەی خەڵەتنان ماچا: کورد جەنگاوەریٛ عالیٛش چەنەنیٛ و گردشا ئازێنیٛ.
پی قسە دووەسەرا تەفرەما واردەن و دەسما جە زوانەکەو ویٛما هورگیٛرتەن کە یوٛن جە نیشانەکا دەسەڵاتو خوڎای خالقی و بە حەرکەسی میاومیٛ کرژ مەوجەکیٛ مەفاڕمیٛ و زوانەکەو ویٛما ئیٛنڎە سووکا لاماوە تاخایتێ بڕێما دلیٛ یانەو ویٛچمانە بەکارش نمارمیٛ و شانازیچکەرمیٛ پی شکستیۆ کە ئاردەنما ملوو ویٛمارە.
دەی وەڵڵا پیٛسە مەڵڵا حەسەنو دزڵییٛ ماچوٛ: ئینە فاجعەن بیللا وەتەڵڵا.
سەرەڕاو ئی حاڵەتیە کە زوۆن باڵش کیٛشتەن ملمارە، شکور پەی خوڎای چنڎ ساڵێوا دڵسوٛزیٛ فەرهەنگی و زوانی هەورامی هەردووە دیمیٛ هەورامانیۆ و ئەورووپایچنە ئامێنیٛوە ویٛشارە و هەرپاسە چنڎان ئەرەمەرزیێ و ڕیٛکوزیێچ و هەریوٛ لاو ویٛشاوە و بەپاو چەنەئامای و پەیلیٛویایشا خجڵیٛ خزمەت بە فەرهەنگ و زوانەکەیمانیٛ و هەرمانەکەرا پەی پاریٛزنای ویٛما و زوانەکەیما.
چیبارۆ هیزی دویٛ مانگەو گەلاویٛژی (#24-07-2025#ز.) وەشەسیا کاک دکتور عەلی زەڵمی هەواڵێوی دڵوەشکەرش دایمیٛ پەنە کە بەرو ڕەنجو چنڎساڵەیش ئامان دی و ئا داوێشە کە ساڵەو 2017ز. هەرمانەش سەرکەردیٛنە و تێزو دکتوراکەیچشنە تەوەرێوەش پەی تەیکەنکەردیٛنە ئامێنە دی و وەزارەتو دلیٛ بەریتانیای Home Office ڕازیبیەن کە دام و دەزگایەکا وەزارەتیشانە زوانی هەورامیچ بلوٛ پاڵو ئا 120 زوان و شیٛوەزوانا کە هورگیٛڵن (مترجم) شا پەی نریانەرە و قسەکەریٛ ئا زوانا متاوا بەزوانو ویٛشا داوا بنویسا و داواو مافەکا ویٛشا بکەرا.
ئی هەنگامیٛ ماییٛ دڵوەشینە و ئانارەو ئانەین کە ئەگەر ویٛما بیمیٛ خەڵکیچ مامەڵەما چەنیکەروٛ.
من چیٛگۆ دەسوەشیی گەرمم هەن پەی ئیٛژا د. عەلی زەڵمی و موازوو سڵامەتبوٛ و نموونەش زیاڎبوٛ.
پاڵو ئی دڵوەشی و دەسوەشیچنە داوام ئانیٛنە جە واڵە و برا هەورامیە ئەرەنیشتا بریتانیای، ئاروٛولای حەروەخت ڕاشاکەوتە هەچ دامودەزگایێوە بەریتانیای بەگردیی و Home Office بەتایبەتی بە هەورامی نەبوٛ بەحیچ زوان یام شیٛوەزوانێویتەر قسیٛنەکەرا و پەی یاونای داوایەکاشا واچا من هەورامینا و داواو هورگیٛڵنی بکەرا.
ئی سووربیەی براو واڵا ئاگەی بوٛ بە هاندەر کە وەڵاتا تەریچنە هەمان هەنگامە هوربگیٛریوٛ و هەرمانبەدەسیٛ ئی دووە وەڵاتەیچە کە هەورامییٛشا چەنە نیشتەجانیٛ خەجاڵەتیٛ و ناچاریٛبا دڎان بنیا مافە فەرنگیی و ڕوٛشنویریەکامارە و چینەی زیاتەر ویٛما و زوانەکەیما فەراموٛش نەکریەیمیٛ.[1]