چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی چل و هەشتەمە
ویرمەن، جارێشا ویر چانەیە کەرېنمێ چاپخانێ دەسی گولانە بسانمېن و بکەرمېش بە چن بەشێ گولانې و هەرکەسێ بەپاو تەوانایش بەشەکانیشان بسانان. کاکە ڕەحمان کە ئۆسا بییەبې بە ئەندام و دۊڵەمەڼ بې، ماچۊ: من گرڎی مەسانوو. باوەڕکەرە فرېمان هەڵسی زیێنە چەماما، کە ئەچا وەشیەیە نائومېڎې بییەیمې و جە ئەسای چاپخانەینە بەشڎارې نەبییەیمې.
وەشیې کۊمەڵەو ژێ کافینە وېم کەردۆ بە شاعېر، بېجگە جە شېعرا کوردایەتی، شېعرې تەرېچ نویسېنا، جەژنە پیرۊزە پەی ئەحمەڎ ئاغای، گاڵتە و گەپ، گوڵستانی سەعدیچم هوگېڵنای سەرو بارو گاڵتەی، شېعرې حافیزی شیرازیم بە بارو گاڵتەو گەپیرە هورگېڵنێ، ئەڼازێ فرەم ئەچا شېعر و نویسیایا ڕېکوستەبې کە ئیساتې هیچکامم نەمەنېنې و بە یەکجاری دلېنە شیېنې. ویرمەن وەر جە گۊڤارەو نیشتیمانی تەنیا دوې بەیتې من سەرو قاقەزێوە چاپې کریێبېنې. پەی یەکەم جاری کە دیڎم ئڼە کەیفم پەنە ئاما بە شای واچېنا؛ هەتیم! ئای کە چڼم شاڎیی بە وېم ئې!
سەرنام: لاکەرڎەیێ پەی دمای
واتم؛ جە سەرەتاو حوجرەی و دەرسو گوڵستانیۆ چەنی زەبیحی بیانې ئاشنا. جا چوونکوم تاتەو ئاڎی چەنی تاتەیم هەردوېشان موریدې شېخ برهانی بېنې، بێنما وەشبې؛ ئېمەیچ پېوەرە هۊگرې یۊترینی بیېبېنمې. هەرچن ئاڎشان بەردەبې پەی مەدرەسەی دۆڵەتی و من فەقیلەو مزگی بېنا، بەڵام کاتو سەرەڕۊیینە پېوەرە گېڵېنمې. هەرپاسە کوچێ چەنی کتېب وانایۆ ئامایمېرە، ملمان جە کۊنەکتېبانی نییا و نوشتې و پەڕجۊیی کۊنەکتېبانی فرە سەرنجەش کېشتیمې: چەنی مس بکەرمېن بە تەڵا! چەنی سکې بڎەیمېن وەنە! چەنی پاسەبکەرمېن وەرم بە گەنجینەیۆ بوینمېن.
بەزمو سکە دایوەنەینە دوې چېوې سەیرېم مەیاوە ویر: قاڵبێ سکەدایوەنەیمان دلې کتېبێنە شکڵ کېشاو لوایمې پەی لاو پیرەپیێوە تەنەکەسازی تاکو پەیمان وەشبکەرۊن. کابرا پەرساش پەی چېشیتانە؟ واتمان: پەی وېمان گاڵتەش پەنە کەرمېن، واتش: ڕۊڵەگیان من مزانو پەی چېشیتا گەرەکەن، بەیدې مامۊ وېتا بکەردې بە شەریک! پەڼجا ساڵېن حۆلې مڎەو شۊنیشەرە، پەیتان وەشمەکەروون و خزمەتیچتان مەکەروون! هەر وردە وردەی زیاتەر گەرمیېرە، کۆتەبې پەلە و لرفە، ئارەقش بەردابې.
مامۊتان بۊ قوربانەتان، بکەردېم شەریک!
هەر ئڼەمان پەی کریا بڕەممېن و واز جە هەرمانەکې بارمېن!
جارێتەر دلې کتېبێ پەڕپووتینە بە نامې (دەریچە و بۆتە و گڵەبۆتەمان) وەرچەم کۆت کە پەی سکەدایوەنەی مەشیۊن و زەڕەنگەرې هەنشان. پیرە زەڕەنگەرێ پیری چڵکنی سیاوڵەمان سووضو دووکانێ تاریکی تەریکینە دیڎۊ، هەر وکە اتمان گڵەبۆتە، دەسشکەرد بە لاڵیایۆ، واتش:
شمە مەششاقی مەکەردې؛ من خزمەتکارەنان. چېشتان گەرەکەن پەیتان مەکەروون؛ بکەردېم شەریک!
ئەی بە قلیچکەو ساحیبیش! خۊ هەڵای نەڕېسیان و نەپېچیان شەققەش مێ! فرە زوو جە چنگې ئاڎیچینە ڕزگارمان بی و ئیتر نەیارامان باسش بکەرمېوە. پەی وېمان بە دزییۆ هەرنۊعێ بی قاڵبێوە پېسە بەرگە شەمچەیمان نییایۊیۆ و پەڕمان کەرد هەڕەی بووڵینې و دوە قڕانیێ زیومان دلېنە یاگې کەردۆ. قەڵاییمان سەرو مەقەڵیېوە بە فوو ،کە گردو کەلاواما فاڕیابې، تاوناوە کەرمان سەرشەرە. خوڎا نارۊ ملەرە، قەڵایی بە دوە قڕانیۆ لکا و ئیسەو ئیسەیچ وەرش نەڎا و جیاتی قازانجی زەرەرمان کەرد.! بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید.[1]