چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی چل و نۊهەمە
بە گۆرەیی ویر چانەی کەرېناوە: خاسا ئانە ئېمە زاروڵې و کاڵفامې بېنمې، ئاخر ئا دوە پیرەپییێ مەشۊم چی ئاڼە هەرېبان کە وەردەمو دوې زاروڵانە بلاڵیاوە ئا چېوە وېشان نمەزاناش فېرو ئاڎیشاش بکەران!
دۊعێوەم دەسکۆتە؛ نویسیێبې: (شەوێ بازنێ سەرو خوڵېوە بکېشە، چل جار سوورەتەو ( یا اَیُّەَ الْمُزَّمِّلْ) بە وەر و فرە بە ڕەوانی بوانە، جە مابەینو هەر جارێ وانای سوورەتەکېنە ئی دۊعێ بە وەر بوانە، جنۊکې گەرەکشانەن بتەرسنات، سەرو سەرێتۆ کەشێ کە بە موێ هورواسیان مدرنان، . وېشان مەکەران بە شېر، هۊتەرەت پەی ماران. نەکەری بتەرسی. گەر یەک حەرفت وەنە هەڵەت بۊن، واوەیلا؛ مەمری و گوناحې وېت سەرو وېت. گەر سەرکۆتی و چل جارەکەت تەمامنا، جنۊکێ مەبۊن بە نۊکەرت، هەرچی بواچی پەیت مارۊن و مەکەرۊن.
ئای کە چن چېوێ عالەن! شەرتەن پەنەش بواچوون کناچې قاقانو چینیم پەی بارۊن! خۊ ئانە زەڕ و تەڵا هەر باس نمەکەرە! گەرەکم نەبې زەبیحی بکەروون بە شەریک، پەنەم نەوات. چن ڕوې سوورەتە و دۊعاکېم پېسە ئاو و دۊی وەرې کەردې. شەوېنە دمای وتەی ژەنەکېم لوېنا پەی هۊڎێوە کە هینو مېمانا بې. نمەڎ و حەسیر لابەرېنا، بازنەم کېشاو ڕوەو قیبلې دەسم کەرد بە ورتە ورت. ویس جارې وانام و دەنگو پەیا ئاما. چەمېم کە قووجنێبېنې نەکەردېمۆ و واتم دەی با جنۊکې بەیان منەتەشان نەبۊن، من تەرسیم نییەنە. تەقەو پەیا نزیک بییۆ، دەنگو کوای گۊچانېچ ئې. گۊشم هەناسێوە بې. نەخێر بوانۆو نمەمدرە. پڕێنە گۊچانێ دریا پەشتەو ملیم و شۊنیشەرە دژمانێ تاتەیم ئاما.
مەلعوون ئانە خەریکو پەڕجووینی؟
هەر دلې پەنجەرەکەیرە وېم فڕەداو ڕەمە ئەمان ڕەمای! تاتەم بەرەو حۆشېوە چڕیاش:
جارێ تەر نەوینوتۆ!
بە هەزار گرەوې و لاڵیایۆ وەرگېریانێ و ئیتر وازم جە جنۊکا و کناچې قاقانی چینیچ ئارد!
کوڵینە بڕووشۆ: لاپەلە شڕێ مەوینېناو چېوێ جە بارەو جادوو و سېحریش چەنەبې، ئەجېم ڕاسەن، بەڵام ساحیبەکېشا ئڼە بە زۊڵییەتی نویستەبېشا هەر مەپەرسە: (مەژگو مەشوولەی و هېڵەو مرۊچەی تېکەڵ بکەرە و چەمېت پەنەش بڕەژە؛ جنۊکې مەوینی). (کیسەڵی دلې ۋنەو پەپووسڵېمانەینە بگرینە، پېشێ سەرئاو مەگنۊ، بەرەکەتش هەن و بەختەوەر مەبی).
دلې خانەقاینە حاجی عەبدوڵڵا کوڕی گۆرەو شېخو برهانی (بە پیری) پېسە منی زاروڵەی ویر مەکەرېوە. بڕیارش دابې گەر چېرو سایەو نووشتا و دۊعایانە گەنجینە پېڎا بکەرۊ، بەشم بدۊن. ڕۊ نەبې پەی پېڎاکەرڎەی چېوی دوور جە ئەقڵی نەوزۊم دلې بېگاری؛ تەمام وەرەزش کەرڎەبېنا. ڕوێشا ماچۊ: لوە پۊسو کیسەڵې وەرو وەرەتاو چەرمەبیې مەردېم پەی پېڎا بکەرە؛ ئاوەو (تاڵیشک)ېچم پەی بارە ؛ دۊعاش چەنە مەنویسو. ملو کەڵەشېرێ ڕەنگ کەوەی بې خاڵیش مەکەروون و ڕۊ جمعەی وەرش مڎەو؛ چکۊ نیشتۆ گەنجینەش چەنەن.
واتم: هەندەبا چېشەن؟
ماچۊ: پاسەبزانو ترۊزییەن!
واتم: قوبان! گەر پەڕجووکەی بە دەموو هەری سەرو پەشتەو کیسەڵېوە بنویسی خاستەرەن!
ئیتر وېش توڕەکەردا وەنەو جە گەنجینەیچ بېبەشش کەردا؛ کە ئاڎیچ هەر پېسە من بەبې مراڎ مەنۆ.
چەنی زەبېحی زوانێما ئاردەبېرە کە وېما یاوېنمېنە یۊترینی و کەسی تەر نەیاوېمانە.
ڕوێشا کە پا زوانەیە قسې کەرېنمې، کابرێوە گۊشش چەنەبې؛ ڕوەش کەرڎە یۊ تەری و ماچۊ: ئاخر چی ئاخر زەمان نێ، ئا سەگبابې بە زوانو جوولەکا قسې مەکەران، ئاخر واچە چکۊ فېرې بییەیدې؟ بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید.[1]