چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و دوەمە
ئا دەمە یەرې دەسې کەرەوز بە فلسێ بې، ڕوێشا دەسم بەرد دەسە کەرەوزێم ئارد بە نیازو ئانەی بنیەوش دلې سەموونەکېم، دژمەنو ڕاو ئیمانیت بۊن، ساحېبو ڕیستورانتی چەنەئەسانې و فەزاحەتو تووتەیشان پەنەکەردان. ئېتێ پاوەرې قاییمې پینەکریێ، گجیێ شرو بې قۊڵ پۊشاکم بې، پاخروا بېنا. دلې گەرماو هامنو بەغڎاینە لاشەما هەر دەم چەنی ئارەقی جڵقەش ئې؛ تەنانەت نازېنې نیمەڕۊیچەنە وەرو دووشو ئاودەسخانەینە ئاوی بکەرمېن وېمارە؛ نازېنې وەرو سەیېنە بېژیەیمېرە..
ویرمەن، ڕوێشا کیاستاشا پەی یاگێ دووری کە قاڵبە سهۊڵشان پەی باروون، پاخروا بېنا؛ زەمینو خیابانی لاقې پیای مەسۊچنې. عەزرەتیېنە هەر بە ڕەمای لوېنا نەک قاچېم بگنان سەرو زەمینە گەرمەکەی؛ فرە زوو گېڵانێ. ساحېبو ڕیستۆرانتەکەی ماچۊ: ئافەریم زوو ئامایۆ؛ چێولای هەر تۊ مەکیانو!
سەرەتا پا هەرمانې کە شاگرڎی و ماشتەیۆ کاسە و قاپو وەرو نانوەرا دلې ڕیستورانتەکەی بې فرە وېمەرە ئېناوە؛ فرە بە شەرمۆ هەرمانە مەکەرېنا؛ بەزەییچم وېمەرە ئېوە. بەیتێ مستەفا بەگی کورڎیم ویرکۆتۆ کە ماچۊ::
سەبا! یارانی مەجلیس گەر دەپرسن حاڵی زارم لێت
بڵێ کێشایە مەیخانە دوو چاوی بێچوە عەییارێک
بەچە عەییارو ئا شاعېرەیە، بەچە ئاغێوە لووسکەڵە بې. بەچە عەییارو من، کوردەسان و چڼیین ملیۊن کوردې وەنەقۊمیێنې؛ پەیچش بلوونە دلې سووچو مەیخانەی و چانەیچ ڕەزیلتەر بوون یاگې شانازیمەن. ئیتر بە ڕاسی ئی بەیتە شېعرې، شەرم و تەقیەش ناستا و فرە بەبې منەت هەرمانەو وېم مەکەرېنا.
شەوێشا مېمانو ژەن ئاردەی بې، ئەحمەڎ خواجە ماچۊ: مزانی بنویسی؟
واتم: بەڵې.
ماچۊ: دەی بۊ وەرو سڼوقینە مدرە! هەر واردێ مەبەران پەی بەری بنویسەش!
کابرای ساحېب مېمانیچ مەنویسېش. کە کۆتیمې سەرو حیشاب کەرڎەی، حیسابو کابرای جە هینو من زیاتەر بې. ئەحمەڎ خواجە واچې هینو ئاڎی ڕاسەن؛ تووڕەبی جە من کە سەهویم کەردېنە، دەنگە دەنگ پېڎا بی. کاتێ جە ئەشپەزی (چاشتکەر) پەرسا حیسابو من ڕاس بې. ساحېب مېمان نیم دینارش بە خەڵات دانې؛ ئەحمەڎ خواجەی چەنە ئەسانې!
ڕۊژنامە بە دە فلسې بې؛ تەواناو ئەسایش نەبېم. جارجارە جە خەڵکی جیامەنې، بەرېناش و تەماشەش مەکەرېنا. ڕوێشا دوې پۊلیسې بە باوشێ کتېبېوە ئامێ، بە کابراو ساحېب ڕیستورانیشا وات یۊشا بسانە. هەر چن زیقناش کە نمەسانوش، ڕوبعە دینارێشا چەنەئەسا و کتېبێشا پەی نیارەو لوێ. کابرا نەما کتېبی و تاکو هېزش چنەبې فڕەشدا و چن دژمانێش کیاستې پەی دۆڵەتی. لوانې کتېبەکەم دلې خوڵېنە هورگېرتۆ؛ داستانێ بې بە عەرەبی جڵفەو دلې بەغڎای نویسیابې. کەیفم پەنەئاما کە (واچې) عەرەبیې دلې بەغڎایم فېرکەرۊن. ڕەنگە ویس جارېم وانابۊوە.
ڕوێشا کابرێوە بە سەروسیما ئاما پەی ڕێستورانتی. من کە لوانې کاسە بەتاڵەکانو وەردەمیش هورگېرو، بەبې ئانەی چەمبڎارو من بە چرپە ماچۊ تۊ هەژارەنی؟
واتم: بەڵې.
ماچۊ: من ئەمین ڕەواندزی ئەفسەری ئەشناسیانا. گەرەکمبې حۆلېت پەی بڎەو سەحرانە کرېکاریت پەی بېزوە؛ بەڵام پاسەم پەنە خاسەن بلیۆ پەی ئېرانی و ماچان شا عەفواتش بەرکەردەن..
منیچ واتم: قوربان! هیچ زامەت مەکېشە! نمەگېڵوە پەی ئېرانی؛ نمەلوچ پەی سەحراتی. چېگە هیچ نەبۊن سەی هەنە؛ نانیچ هەن. فرە سوپاست مەکەرون. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]