ئەژناسنای و ئەوەوانایێوی کوڵ پەی دەفتەرە داستانو (زەماونڎەو وەرمی)
نویستەی: #ئیبراهیم میکە عەلی#
حەروەختێو نوویستەیێوی هۆرامی موینوو، حەر ویارێونە نوویسیابوٛ لامۆ گرنگنیا، ئانە لامۆ گرنگا ئانەن کە نوویسیاکە بە زوانەکەو ویٛم نوویسیابوٛ، چوون ئانارەن پەیئانەی کە یوٛ هەن لاشۆ نوویستەی بە هۆرامی گرنگا، سەرێویتەریچرە دڵوەشبوو کە بە زیاڎبیەی ئی کتیٛبیە کتیٛبیانەی هۆرامی پیلیکانێوەتەرە هوروەزوٛ ڕووەو تروٛقی و هەرپاسە بوانی هۆرامیچ دەرفەتێویتەرش پەی ڕەخسیوٛ تا بەزوانەکەو ویٛش بوانوٛوە و بدوۊ.
یوٛ چا بنوویس و خەموەر و قەڵەمە وەشڕەوتایچە بنویسو ئی دەفتەرە داستانەی (ماموٛسا سابیر عەزیزی) ن کە خەڵکو دەگا دڵگیرەکیٛ هانەگەرمڵەین و ئیسەتیٛ شارو مەریوانیەنە ئەرەنیشتەن، هەم بە نوویستەیەکاش و هەم بە چالاکیە فەرهەنگیەکاش یوٛن جە هەسارە گەشەکا دنیاو خەمواردەی پەی فەرهەنگ و زوانی بیٛنازیما و تا ئایاگیٛ من ئاگاداربوو دریٛخش نەکەردەن و نمەکەروٛ جە خەموەرینە.
دەفتەرە داستانو زەماونڎەو وەرمی:
نوویستەی: سابیر عەزیزی.
ساڵەو (2020ز.) چاپکریان.
شارو مەریوانینە و لاو وەڵاوگەو (زایەڵە) یۆ چاپ و وەڵاکریانۆ.
دەفتەرە داستانەکە هەرچنڎ بە قەوارە و بیچم گولانەن و تەنیا 52 لاپەڕیٛ A5 ئەی پەنجا، وەلێم ڕاو 7 کوڵە داستاناوە تاوانش فرە بەوردی و ئەنەدیایۆ باسو بڕێو جە نەڎامەتیەکا خەڵکو هۆرامانی بەتایبە و کوردەواریی بەگردیی بکەروٛ.
هەرچنڎە پیٛسە وچیان: زریکەو زاڕوٛی و قیژەو ژەنیٛ و ناڵەو نەوەشی نمەنوویسیاوە، وەلێم بنوویسو کوڵە داستانەکا دلیٛ (زەماونڎەو وەرمی) تاوانش بەشیٛوازێوی ئوٛسایانە و بەنووکو خامە ڕەنگینە وەشڕەوتەکەیش: بووەو هەناسە سەردەکا ئەڎا و واڵەیما و ئاورای و تەژنای و قوٛڕەو لەمەو کوٛڵبەرەکا و خورپەو دڵو دڵدارەکا و ئاواتە تاسیایەکا جوانەکاما و... و... گردی ویٛنابکەروٛنە و سەرو زوانو ئەوەگیٛڵنو کوڵە داستانەکاشۆ وزوٛشا وەرو دەمو بوانی.
گەرەکم نیەن لەزەت و چەشەو ئەوەوانای کوڵە داستانەکا ئەو بوانی زەوتکەروو، تەنیا پەی نموونەی ئی بڕگە گولانەیە ماروو کە دیمەنێوا جە داستانێویٛشا و باسو هورکەنیای پیرەژەنێوە دەگانشینیٛن کە چیٛرو قەهرو ژیواینە و سەرو داواو کوڕە هەتیمە تاقانەکەیش ناچارەکریێنە دەگای جیابازوٛ و بە کریٛهانشینیی ڕووەکەروٛ دلیٛ یوٛجە شارەکا... سەرو زوانو ئا پیرەژەنیٛوە بنویس نوویستەنش: (بەپەلە ماشینش ئاورد، ئەسبابە شڕەکەو دەگێش وستەنە و لوایمیٛ مەحەلیٛ تازاواینە هوٛڎێوما بەکریٛ گیٛرت و نیشتەجێ بیەیمیٛ، سەحبێ هەرپیٛسە دەگێ زوو هورئیٛستانیٛ وەرو بەرەکەیم گزیدا و پاک و پوٛختەم کەرد، لاو ویٛمۆ هەرمانێوە عالەم کەردیٛنە، بەڵام بەداخۆ ژەنەو ساحیب یانەی ئانە بشیوٛ و نەشیوٛ پەنەشکەردا... ).
دیقەتو دڵمەڕیای دڵو ئا ئەڎالیٛ بڎەیدیٛ، بەچ هەستێوە زیێبوٛرە وەرو بەرەیش گزیدابوٛ و ژەنەو ساحیبیانەی شاریی چەنی تەقێبوٛشپوٛرە و دڵش ماڕێبوٛ؟!
ئیٛنڎە وەسیٛن پەی ئەژناسنای کتیٛبە وەشڵەکەی و ملوو سەرو سەرنج و ئەنەدیایەکام..
- ئی داستانیٛ برێوشا نزیکەو 10 ساڵا چێووەڵی نوویسیێنیٛ و ئەشوٛم بوان ئانەی بزانوٛ کە هۆرامی نوویستەی چا سەردەمنە سەرەتاشبیەن و چا وینگۆ بیاووٛنە کە ئەگەر سەرنجە یام لوٛقەتێوەش بوٛ سەرو شیٛوازو نوویستەکەی و ناپوٛختەیی زوانو نویستەیەکەیش نمەبوٛ نە کەروٛش هەڵڵا و نە چەمیچ بڕوٛ ئەو هەڵەکا بنوویسی، چوون شکەم نیەنە ئەگەر بنوویس ئیسە هەمان ئا ڕستە و بڕگەیە بنوویسوٛوە بە شیٛوازێویتەر منویسوٛشۆ، پەوچی ئەشوٛم بوانی ڕەخنەگیٛر دەسوەشیکەروٛ ئەو بنویسی کە 10 ساڵیٛ چێووەڵ وەختێو هۆرامی نوویستەی سنوورێوی تەسکنەبیٛ، ئاڎ تاوانش ئانەی و پاشیٛوە بنوویسوٛ.
- ئی بەر ویر و کتیٛبیچە پیٛسەو گردو کتیٛبەکا و نوویستەیەکاما ئینا قوٛناغەو ڕاگوزەرینە و هەڵای گردما سەرو شیٛوازێوی یوٛگیٛرتەی نوویستەی و ڕازوانێوی یوٛگیری یوٛما نەگیٛرتەن و سەرش ڕیٛکیٛ نەکەوتیٛنمیٛ.
- ئەرکو گرد خەموەرێوا دەسوەشیی حەرکەسێوی بکەروٛ کە تەوەنێوە منیوٛ سەرو تەوەنێوە، چوون پیٛسە گردما مزانمیٛ: تا هەرمانە نەکەری فیٛر نمەبی، زوانو ئیٛمەیچ هەرچنڎ سەردەمانێو زوانو نوویستەی و ئەدەبی بیەن وەلێم وەروئانەی چیدمایۆ بەکارما ناردەن و وەنگەنە نەوانانما و دەسەڵاتداریٛ ئیسەردەمەو وەڵاتیچ ڕانمەڎا زاڕوٛڵەکیٛما وەنگەکانە بواناش، ئیسەتیٛ بڕێو جە ویٛما و خەڵکو دەوریچما ویٛشۆ خڎووکما مێوەنە پەنەش دوٛمیٛ و بنوویسمیٛ و بەکارش مارمیٛ.
- نوویستەی بەهۆرامی هەنگامیٛ خاسیٛش بڕییٛنیٛ و بەڵگەیچ پەی ئی ڕاسیە ئانەن کە وەڵتەر پەرسە ئانیٛبیٛ کە پەرسیٛنمیٛ: خاسا چی بە هۆرامی بنوویسمیٛ و دوٛمیٛ و وتار بدەیمیٛ؟
وەلێم ئیسەتیٛ پەرسەکیٛ چەپەوانیٛ بییٛنۆ و پەرسمیٛ ئەو هەنترینی و ماچمیٛ: خاسا چی بەهۆرامی نەنوویسمیٛ و نەدوٛمیٛ و وتار نەڎەیمیٛ؟ [1]