چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و حەفتا و پەڼجەمە
غەنی بلووریان لوا، سلېمانیۆ پەیش نویستەبېنا: کۊتێم (قەمسەڵە) جیامەنەن، سروودێ کومونیستانو دنیێم دلې قۊڵە دڕیاکەیشەنە قەڎ کەردېنە پەیم بکیانە! پەیم نویستۆ: کۊتەکەتم دا بە سواڵکەرێ، پاسە بزانو بە دەردەو دەسڕەکەیت لوان! ڕەنگە ئیسە مدیرو پۊلیسانی، پۊلیسەکا فېربکەرۊ! ئیتر هەر ئا گېڵایۆ بې، ئەژنیم غەنی گېریان و ویس و چوار ساڵې دلې زیڼانینە مەنۆ.
هەر چەنی پارتیې ئېنې پەی لاییم، چەنې شوېعیەکایچ ساز بېنا. شەونامې هەردوە تاقمی (شویعییەکې و بلاڤۆکو پارتیم) پەی ئې. جارێشا جەمال حەیدەری بەردا پەی سەرو بانو قاوەخانێ، مۊچیاریم مەکەرې کە بگنو شۊنەو حېزبەکەو ئاڎی.
منیچ واتم: کاکە جەمال! من کوردەنان. ئانە حېزبو توودەی کە شمە ماچدې مامۊسامانە دڎانې بە مافو کورڎیرە منیۊ؛ دە شمەیچ باسێ ئازاڎیی کورڎی بکەردې با بخەڵەتیەو. هەر مەفەرماودې زەمین مڎەیمې بە هیتیاری؛ تەمامو دەشتەو هۆلېریم پەنەبڎەی گەرەکەم نییەنە.
ئاڎیچ ماچۊ: حېزبو توودەی مامۊسامانەن، ڕاسەن؛ بەڵام باسو بەشەو کورڎی کەرڎەی خەتێوە گۆرېنە. ئیجا با بنویسۊچ، دروې مەکەرۊن و حوکمش بگنۊ دەس هیچ پەی کورڎی نمەکەرۊ.
ماچۊ: دە کاکە تۊیچ دروېم پەی بکەرە!
واتم: ئاخر بە فەرماییشتو ستالینی، ڕووپەلو ئاڼەی و دېڕەو ئینەی، کورد میللەت نییەن!
ماچۊ: برا، ئانە من و تۊ بە کورڎی قسې مەکەرمې، دیارەن هەنمې و زوانێ سەربەوېما هەن. با ستالین نەخێر تاتەو ستالینی واچۊ، چەنی جە میللەتو کوردې مەشۊریەوە؟.. وەنەت زیاڎ بۊ!
دووکان و یانەکەم یاگې قاچاخا بې. نمەزانو چەنی بې کە زەبیحی ڕاوەنریابې؛ پەی ماوێ دلې هۊڎەکەیمەنە وېش شارتۆ. شەوې واچې: سەوای وېم تەسلیمو پۊلیسی کەرو، چېش بۊ با بۊ. بە تەمامی دڵم تەڼگ مەکەرې.
ماچۊ: مەلا! پەی زیڼانی ئا پەرەمېزە گولانې وېتمە پەنە بڎە.
منیچ واتم: پەی تۊ.
ماچۊ: ئا خاولیەیچە بەرو.
واتم: خاس.
ماچۊ: ئەی ئەسبابو ڕیش تاشاکەیچت بەرون؟
واتم: بەرەش.
ساعبێ زوو یۊترینی ماچ کەرېنمې، هەڵسی زیێ چەمېما. تاکو وېرەگا خیاڵم هەر لاو ئاڎیۆ بې. شەوی کە بەکزی ئېناوە، مڎیەو زەبیحی دلې دووکەڵو جگەرەینە خنیکیان و چەمېش بریسکەشا مێ.
ماچۊ: مەلا! ئارۊیچ نەلانې، سەوای ملو!
دیسان سەرجەنۊ، ئی چېوە و ئا چېوەتە پەی من خاسەن!
منیچ واچېنا، بەڵې پەی تۊ!
دیسان هەر بەزمەکەو وەڵې نەلې. ڕوێشا سمېڵېش تاشێبېنې، سوور ئەجې چۊڼەرینە، بۊینباخەش بەستېبې.
ماچۊ: مەلا، گەرەکمەن شەپقێ بسانو، وېم فاڕو پۊلیس نەشناسۊم، ئا عەینەکېچم گەرەکېنې!
منیچ واتم: بەخوڎا هەر تووتێت کەمەن فېقەش پەی کەری و بگنۊ شۊنیت . با بلمې شەپقې بسانمېن.
سەرەما کەرد موغازێ فرە گۆرەی شەپقە ورەشارە. هەر کەرېشا سەرەش و مەڎیې پەی جامی و کەیفش نەگېرېش، ماڼانېش، شەپقێ سیاوەش کەرڎە سەرەش.
ماچۊ: ها مەلا! وەشەم گنۊ؟
منیچ واتم: وەشە؟بە خوڎا هەر ئەجۊ پیرە ئەرمەنییەنی!
کابرای ساحېب موغازە، کە پاڵمانەبې ئەجیام عەرەبا، داش پرمەو خوەی.
واتم: دەی قیمەتو شەپقەکې چڼەن!
ئاڎیچ ماچۊ: کورە گەر دە دینارېم چېوێ دڵوەشکەریرە خەرج کەردێ ئاڼە نەخوېنا. بە ششسەڎ فلسېش مەورەشو؛ بەڵام شمە چوارسەڎم دەیدې پەنە. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]