بییەی نەتەوەیی کورڎی میانو فەلسەفە و سۆسیۆپۆلەتیکینە
هورگېڵنای و ئاماڎەکەرڎەی: ئەسعەد ڕەشید
بەشەی سەڎ و چل و یەکەمە
چانەیچ دوایمې کە ئا هیولا لاشەی کۊیی میللەتین، چێولای مەشۊم چا خولقایە بیاومېنە کە چا پروسەیە مەگنۊوە، واتا چا مەرامەو ئەقڵی بدۊمېن کە گەرەکشەن ڕۊحو نەتەوەی بیاوۊش پەنە، لاو هیگڵی ئا مەرامە ئا نۊعە جە دۆڵەتییەن کە ئایدیاڵەکەش ڕۊحو نەتەوەین.
پەی ئانەی دۆڵەتو ئەقڵی بخولقیۊن و دلې واقېعینە بەربگنۊن، مەبۊن دوې ئایدیاڵې و دوې هیولای و دوې مەرامې و دوې کارێمان ببان، تاکەکې ئایدیاڵ و هیولای و مەرام و کاراو وېشان هەن کە گردشان خودی و کەسینې، ئەقڵیچ ئایدیاڵ و هیولای و مەرام و کاراو وېش هەنش کە کۊییېنې و خودیې نییەنې. دۆڵەت گلېربییەیۆ و یۊبییەی ئانەین کە خودین چەنی ئانەی کە هەر تاکێ جە تاکەکانو دلې میللەتی هورگیرو ئایدیاڵێوە خودی و کەسین، ئی ئایدیاڵەیچ چەنی ئا تەواناو ئیرادەیە سازەن کە دلېشەنە هەن، هەریۊ ئەچا تاکا مەبۊن ئا ئایدیاڵە ئەقڵیە خودییەو دلې وېش ڕاپەنەبەرۊن و ببۊن بە مەرام لاشۆ و حۆلې بەڎیئاردەیش بڎۊن دلې زەمینە واقېعییە گردینەکەو میللەتینە، ئانەی کە وەرمو تاکەکەسی ئاڎیەن و دلېشەنە بییەیش هەن و جبەرو وېشۆ پەیش نەفاڕیانۆ ، ئا ئایدیاڵەنە کە جە دماو هاڵیبییەیۆش چانەی کە جبەرو وېشۆ ئامان و بییەن بە مەرام، پەیش بەرمەگنۊن. دماو بەرکۆتەی ئی مەرامې خولیاو بەڎیئامای ئا مەرامەی مەگنۊ سەرو ئا کەسەیە کە ڕاش وەنەبەردەن. ئی کەسە هەس مەکەرۊن بەڎیئامای ئا مەرامەیە تاقە چېوێن کە دڵش ڕازی بکەرۊن و مانا بڎۊن بە ژیوایش.
ئا ئەشقە کە پەی ئا ئایدیاڵەیە دلې ئا کەسەینە پېڎامەبۊن، ئا هازې کە دلېشەنە شاریێنۆو پېسە هازێ متە بیې هەنە پاسەش پەنەکەرۊن ئەچا متبییەیە بەربشۊن تاکو ئیراڎەو ئا تاکەیە جە بەڎیئاردەی مەرامەکەینە بەکارشبارۊن. ئانەی دلې وېشەنە پېسە وەرمی هەرەقەتینەو وېش ڕاش وەنەبەرۊن و لاشۆ مەبۊن پا وەرمەیە کە شایانو ئانەین پەیش بژیوۊن، ئایدیاڵە خودیەکەن. ئیراڎەو کەسەکەیچ کاراکەن و لاشەو کەسەکەیچ هیولاکەن کە ئایدیاڵەکەی جە ژڵېوەو کاروکەردەکاشەنە شېوەگیر مەکەرۊن، ئا مەرامەیچە کە بەڎی مێ، ئا کەسیەتییەن کە دلې تاریخو بەڎیئامای و شېوەگیربییەی ئایدیاڵەکەی مەگنۊوەو تاکەکەسەکە بییەو وېش دلېشەنە مەوینۊوەو دڵش پەنەش ڕازی مەبۊن. کاتێ دڵو ئی کەسەیچ ڕازی مەبۊن کە ئانەی چەنەش بەڎیئامان وېش بۊن، واتا ئاڎ ئانەبۊن کە پەنەش ڕازییەن وېش بۊن و بېجگە جە وېش بە هیچی تەری ڕازی نەبۊن کە وېش نەبۊن.
هەر تاکێ جە تاکەکانو دلې میللەتی کە دماتەر مەبان بە تاکې پېکئاوەرې دۆڵەتو ئەقڵی، مەبۊن جە دلې وېشانە پەی بە بییەو وېشان پېسە ئایدیاڵێ ببەران و دماتەر ژیوای وېشان گردش جە ڕاو ئانەینە گوزەرنان، بتاوان ڕوەو ئانەی بلان ببان پانەی کە دلې وېشانە ئېستەنشاوە.
پینەیچە هەر تاکێ ئەچی تاکا تەنیا پانەیۆ سەرقاڵ مەبۊن کە دلې ئاڎیی وېشەنە بییەیش هەن و دلې مەرزو سەرقاڵبییەیش بە بەڎیئامای ئا بییەیەو وېشۆ چنی تاکەکانو تەری مەگنۊ دلې پېوەڼییۆ. بەشێ جە کتېبو بییەی نەتەوەیی کورڎی میانو فەلسەفە و سۆسیۆپۆلەتیکینە، نویستەی عیرفان مستەفا، هۊرگېڵنای پەی سەرو زوانی هۆرامی: ئەسعەد ڕەشید. [1]