وەرکۆتۆ تاکو وەرنیشت ئاماڎەبییەی و نامڎاری ژەنې
دلې ڕۊمانەو سیاوڕېحانەینە
ئاماڎەکەرڎەی و لوایۆپۊرەی: ئەسعەد ڕەشید
بەشو نۊهۆمی
نەرمی و ئەهوەنیێ ئامان ملو قسەو ئەرستەو نیشتە و وینگاو تاتە و هامسەرو کوڕیەرە وەرانوەرو ئەڎا و کناچې و ژەنې و واڵێرە پەی هەقوو هۊرچنیایش ، چوون مزانا دونیاێوە تەری تازێنە و مشۊ وېشا چنیش بسازنا .
وینمێ پەشۆکیای حاڵ و کارئەکتەرەکا کە مێ ملشارە هەر جە فڕت و فېڵ کەرڎەی بەینو وېشانە کە چاوەڵتەر ناکامی وەشەسیایی درۆزنی ، کوشتەی ، ڕمنای گېرتەی و قۆڵ بەس کەرڎەی و بییەی دامو تەڵەیۊ کە ئامان ملشارە جەوڵاتو وېشانە.
وەلې جە ئاخرۆ نویسەر مێ ئا قۆمیاو گێچەڵای کە دلې گلېرگەو کارئەکتەرەکانە سەرشا هۆردان بەئېمەی وانەری ماچۊ چارەسەرشا ئینێ ئۆروپانە.
(سامان) وېش هۆرامیا و دما و چل ساڵا
(دالیا) هامسەریچش جە ئەڎێوە ئینگلیسیە و تاتێوە هیندی ئاومێنە دنیاوە هامسەرەو سامانیەنە (ڕێهان) ە کناچې سامان و دالیا ێنە .
(دالیا) دوکترەی ڕەوانشناسەنە ، ئیتر پەیما مەعلوما بۊنە و جەنگو کۊچ و جیائاستەی وەتەنیوە و تێکەڵ بییەی بە دونیای مۆدڕنێوە فرەیی سەر هۆرمۆ جە دەرتانەکانە ، ئیتر یەک کۆلتوری باڵا دەس نییا پەی ئاکەسا کە کۊچشا کەرڎەن .
دالیا کاتێوە پەیجۊری کەرۊ پەی ئانەیە بزانۆ کناچەکېش چەنی ئاکوڕەیە پەیوەندی عاشقنەش هەن جە جوابو سامانینە
ماچۊ : یانی چوون ئا کوڕە کوردا ، گرڎ چېوەش تەماما ؟! وېت مزانی دنیا کە چېشش پەنە ئامان سامان؟ کورد بۊ ، هەرچی بۊ ، لاو منۆ تاکو زەمانێوە نەژناسووش و نەزانوو کێن هەر بېگانەن! چێنە پەیما بەرگنۊ دلې بنەیانیەنە مەرکەزو دەسڵاتێ تەنیا نییا دەسو یەک کەسی وە و (تاک ) ساحێب و ویرو و ڕا ورگېرتەیا پەی گرڎو دەرەتانەکا.
سامان هەڵای زوانی ئەڎایی هۆرامیش لاوە ئێژان و بە فەرامۆشیش نەسپاران ڕېهانەی کناچېش فێر کەردێنە . چی بەشېنە واتو واچ قسەکەرڎەی بەشېوێ ڕۊشن و ئارام (ئەڎا )و ( کناچە) سەرو مەسەلە شەخسیەکا فرە نۆرماڵا و بەبێ ڕوودەربایسی هەسش پەنەکەریۊ. ئا کوڕەی ( ڕېهانە ) دڵ ش دان پەنە کورداو جە وڵات و ( فەنلاند)ی ئامان بریتانیا پەی دەرس وانای . نامێش (هەوار)
کوڕو (برهان )و (نازەنین ) ی
جە وەرنیشتەنە فەرهەنگ و کۆلتور ڕاگیر نییا پەی تێکەڵ بییەی کناچۊ کوڕی حیچ کەسێوە مەلۆ شۊنۊ ویەردەی وەڵینو کەسێوتەریەرە هەرپاسە مزانمې ( دالیا ) دەسش ورگېرتەن جە کوڕە مامۊ کەیش کە فرە دۆڵە مەناو شوش بە سامانی کەرڎەن کەم دەسا و پەناهەندەن و خۆڵکو دەگێوە گوڵنجڵانی هۆرامانین وەلې چەولاوە ( برهان ) مامۆزاو سامانی ( ٚنازەنین.)ش چنە ئەڕفاناو بەزۊر داگیرەش کەرڎە ....
وینمێ جە لاپەلەو (259) نازەنینە بە کوڕەکەیش ماچۊ
- ڕۊڵە هەوارگیان ! تۊ هیچ جە ویەردەو ئەمن و بابەیت نەمەزانی . تۊ چووزانی دڵو ئەمن چېشش نا چەنە و چېشم کېشان ، تۊ جارێ بۊ شۊتی مەی دەمتەو ، ، ، ، تەنیا بابەیت بایسش بییەن و ئیتر هیچ کەسی تەر.
نازەنینە زوخاوەکا وېش بەدڵې خەمینۆ وزۆ ڕوە کە (برهان) ی چېش ئاوردەینە ملشرە و پی ڕۊش یاونێنە بەزۊری زۊر داری مەڵاێوە عەرەبش ئاوردەن سەرش بې پەرس و دڵ و حەزو وېش مارەش کەردێنە ....
(ئەمن گەرەکم نیەن ئیسە هەقەو ویردەیش چەنە بسانوونەو)
سامانیچ بەژەنەکېش (دالیا) ێ ماچۊ
(ئیسە ئاچېوە تەمامیان و من هیچ دژمەنی یا قینێوەم چەنەش نەمەنێنە)
چۆلایچۆ کە ئی ڕووداوە چەمەڕانەکریا ئامان وەرۆ دماو چل ساڵا سامان و نازەنینە و برهان گەرکشانە ڕېهانە و هەوار ی بە دڵو دڵخوازی و ەشەسیایی یاونا بەهەنترینی .
چێنە سامان بە عاشق بییەی ڕېهانێو هەوار ی چڵاکێۆرەو پېسە فلاش باکێوە گېڵۆوە پەی عەشقە جوانەمەرگبییەکەو وېش و نازانینێ . پەی مرکیارەی دڵو دەرونی سۊتەیش تەنیا چېوێوە پەناش پەی بەرۊ هونەرو مۆسیقان و گۆرانیەنە نەک توندو تیژی ملهوڕی. بەشې جە پەیلواکانو نویسەر عەبدولڕەحیم سەعید گوڵکاری جە بارەو دۆرو ژەنې هۆرامیې دلې ڕۊمانەو سیاوڕېحانەینە. [1]