#میرزای لوڕستانی#

ئەمیر لېش بڕیا ئارام و قەرار
سپورد ئەرواحش نە پەی ھېجر یار
سوپاهی حەبەش وست نە دشش بار
ئەندۇش بوڵەند بی چۇن بەرزی کۊسار
خواب و خوراکش نە دڵ کەرد برین
فېکر و خەیاڵش سەودای خاتۇ زین
زەوق و شادیش بی ئەو شه و وە ماتەم
قەڵا قەڵاش کەرد سوڵتانانی غەم
خورۇس بەرئاوەرد سەوتی سوب سەحەر
موئەزېن واناش ئەڵلاھو ئەکبەر
ڕەوشن بی وە نۇر سەحرا و دەشت و دەر
ئەوقات نمازان بەرئامان وە بەر
ئەمیر ھۊرېزا دڵ جە غەم پەروەر
ئەدا کەردش فەرز حەیێ تەوانگەر
ئاتەشی دەرۇن وەنەش دا ئەسەر
ھۊرېزا جە تاب تا ئاما بوەر
ئەو جا کە واعد پېش دابۍ نیشان
شی بە ئەو دېیار وە ئەندەک زەمان
خاتۇن کەنیزێ دەردەم کەرد ڕەوان
بشۊ بوینە ئەر کەسێ مدران
بەتاو و تەعجیل جواب باوەر پېم
تا کە دیدارش بوینۇن بە وېم
کەنیزەک ئاما بۍ سەبر و ئارام
یاوا بەو جایێ مەواعېد مەقام
دیش کە جوانێ مدران نە ئەو جا
وېنەی یوسفەن بە حوسن و سیما
وە بېڕۊح مدران بە بېدەنگ و دۇن
چمان وەندەبېن نە چارەش ئەفسۇن
چەشم ئېنتېزار خاتۇن گېرت نە دەر
تاکە کەی مەڎۊ کەنیزەک ئەسەر
ساعەتێ وېیەرد بېزار بی جە گېیان
نە جواب ئەز ئۇ یافت نە نام و نیشان
یەکێ ھەنیش کەرد نە عەقەب ڕەوان
ئەویش نادم بی بۍ نام و نیشان
عەجەب مەند خاتۇن جە نامای ئیشان
ئاما وە بیرۇن خاتر پەرېشان
دیش کە شای ئەمیر مدران چۇن لەولاک
کەنیزان ھەر دۇ مەدھۊشەن جە خاک
ڕۇ کەرد وە ئەمیر خاتۇنی زەمان
وەش ئامای وە بان بینایی چەمان
دېیەنم خاوێ ئەی سالاری جەم
مەر جە مەحشەر بېیاوین وە ھەم
دەر جەواب ئاما ئەمیری دەوران
باشی نازداران خاتۇنی زەمان
ھەر سەرنویشتێ جە زاتی سوبحان
بنویسۊ مەبۊ بوینۇن عەیان
بەڵۍ ئېستېدعام ئینەن ئەر دانی
نەک ھەم جودا بوین نەی دونیای فانی
خەڵوەت من و تۊ جە سەرای زینەدین
لادێ وە ھامدەم وە هەم بنیشیم
ئەنگوشتی قەبۇڵ نېیا وە دیدە
کەی ئارامی جان ڕۊحی ڕەمیدە
ھەر وەقت فرسەت بۊ منەت بارەنان
فېشتەر من جە تۊ جویای یارەنان
واتش ئەی نازدار ئەی کەمان ئەبرۊ
وادەمان ھەر دۇ سەرای زەیندین بۊ
[1]