$باشووری کوردستان$
- بەهۆی داخستنی ڕێگای سەرەکیی نێوان #هەولێر# و کەرکووک لەلایەن عەرەبی هاوردە و تورکمان و لایەنگرانی #حەشدی شەعبی#یەوە، وەک ڕێگرتنێک بۆ نەگەڕانەوەی بارەگای #پارتی دیموکراتی کوردستان# بۆ کەرکووک، ئەمڕۆ لە ناوچە کوردەکانی #کەرکووک# کوردەکان خۆپیشاندانیان سازدا و لە ئەنجامدا چوار گەنجی کورد لەلایەن عەرەبەکانەوە گیانیان لەدەست دا و چەند کەسێکی تریش لە خۆپیشاندەرە کوردەکان برینداربوون.[1] (بڕوانە فایلی پەیوەندیدار)
- لە کەرکووک قەدەغەی هاتووچۆ ڕاگەیەندرا.

گەلی کوردستانی تێکۆشەر

جارێکی تر #کەرکووک# بووەوە بە گۆڕەپانی ململانێیەکی نەخوازراو، لە دەرئەنجامی ناڕەزایی کورد لە سیاسەتی خراپ بەڕێوەبردنی شارەکە، ناڕەزایی و خۆپیشاندانی مەدەنی دروست بوو، لە ئەنجامدا ھێزە ئەمنییەکانی شارەکە بە فیشەک و توندوتیژی ڕووبەڕووی دەنگی دلێری خەڵک بوونەوە و چەند ھاووڵاتییەکی کورد شەھید و بریندار بوون. بەرپرسیارێتی ئەو کوردکوژییە، بە پلەی یەکەم لە ئەستۆی پارێزگاری کەرکووکە.
پێویستە ئەوانەی دەستیان چۆتە خوێنی ھاووڵاتیانی کورد سزای یاسایی بدرێن.
دۆخی کەرکووک گرێدراوی پیلانێکی چەندین ساڵەیە و تورکیاش ڕۆڵی خراپی لەو ئاژاوەنانەوە بینیوە و بەردەوامە لە دەستێوەردانەکانی لە کاروباری ھەرێمی کوردستان و ناوچە کوردستانییە دابڕێنراوەکان.
بەرپرسیارێتی ئاسایی کردنەوەی ئەو بارودۆخە و، سنوردانان بۆ دەستێوەردانی دەرەکی لە ئەستۆی حکوومەتی عێراق و سەرۆکایەتی کۆمارە.
ڕووداوە نەخوازراوەکانی کەرکووک بەتایبەتی و ناوچە کوردستانییە دابڕێنراوەکان دەرھاوێشتەی چارەسەرنەکردنی کێشەکانن لەسەر بنەمای نەخشەڕێگای دەستوریی کە خۆی لە ماددەی 140دا دەبینێتەوە.
پێویستە بەپێی ماددەی 140ی دەستوری ھەمیشەیی عێراق چارەسەری کێشەی ناوچە کوردستانییەکانی دەرەوەی ھەرێم بکرێت و ڕەچاوی تایبەتمەندی ناوچە تەعریبکراوەکان بکرێت.
بۆ ئەم مەبەستە نەتەوە یەکگرتووەکانیش بەرپرسیارێتی پاراستنی ئاشتی و سەلامەتی خەڵکی ناوچە دابڕاوەکانیان دەکەوێتە ئەستۆ و بەپێی بەرپرسیارێتی نێودەوڵەتی، دەبێت ڕۆڵیان ھەبێ لە پاراستنی مافی مرۆڤ لەو دەڤەرە.
نابێ ئەو ڕاستییە فەرامۆش بکرێت، کە نەبوونی ستراتیژی ھاوبەشی کوردستانی و ململانێی حیزبی و بەرژەوەندی تەسکی حزبه باڵادەستەکان درزی گەورەی دروست کردووە، کە داگیرکەرانی کوردستان دەستێوەردان لە ململانێ سیاسییەکانی نێوان ھێزەکانی کوردستان بکەن. لەنێوان ھێزە کوردستانییەکان و لایەنەکانی تریش لەلایەکی ترەوە.
بۆ گەیشتن بە ھەموو ئامانجەکانی خەڵکی کوردستان پێویستە ھەوڵەکان چڕ بکرێتەوە، تاوەکو یەکێتی و یەکدەنگی لە ئاستی باڵادا پێک بھێنرێت و مەرامی خراپی داگیرکەران لەبارببرێت.
بانگەواز دەکەین بۆ سازدانی کۆنفرانسێکی نیشتمانی و نەتەوەیی و پێکھێنانی کۆمیتەیەکی ھاوبەش بۆ دانانی ستراتیژ و پلانی خەبات و تێکۆشان. کەرکووک شارێکی کوردستانییە و پێویستە ستراتیژێک دابڕێژرێت بۆ مسۆگەرکردنی پاراستنی ئاشتەوایی و تایبەتمەندی و ڕێزگرتن لە پێکەوەژیانی پێکھاتەکانی کەرکووک و خەڵکی کوردستان و بە ھەموو نەتەوە و ئاین و ئاینزاکان.
لە پیلانی شومی لۆزانەوە تا ڕووداوی 2ی ئەیلوولی خوێناوی کەرکووک سیاسەتی بن پێکردنی مافەکانی گەلی کوردستان پەیڕەو دەکرێت. داگیرکەرانی کوردستان دژی دەستکەوتەکانی کوردن بەتایبەتی لەباشوری کوردستان.
نابێ ئەوە فەرمۆش بکرێت، کە نەبوونی یەکێتی نەتەوەیی کە ئامانجی ھەموو ھێزێکی نیشتمانی و کوردێکی ئازادیخوازە دەرفەت دەدات و دەبێتە مایەی ئاسانکاری بۆ داگیرکەری کوردستان، ئەم ڕووداوە خوێناوییەی کەرکووکیش درێژکراوەی ھەمان پیلانی شۆڤێنیانەی داگیرکەرانی کوردستانە و وریایی پێویستە بۆ ڕێگەگرتن لەو ئاشوبەی کە دەوڵەتی تورکیا و بەکرێگیراوەکانی دەیانەوێ بیخوڵقێنن و پێکھاتەکانی کەرکووک بکەنە سوتەمەنی بۆ گەیشتن بە مەرامی فرەوانخوازیی و داگیرکاریان.[1]
نەمری بۆ شەھیدانی ڕۆژی 2ی ئەیلوولی خوێناوی و ھەموو شەھیدانی کوردستان.

کۆنگرەی نەتەوەی کوردستان
نوێنەرایەتی باشوری کوردستان
2023/9/3
تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

بە توندی سەرکۆنەی ئاژاوەکانی دژ بە دیموکراسی و پێکەوەژیانی ئاشتیانە لە #کەرکووک# دەکەین. سەرکۆنەی شەهیدکردن و بریندارکردنی هاونیشتمانیانی کورد دەکەین کە لە لایەن شۆڤینیەکانەوە هێرشیان کراوەتە سەر.
داوا لە بەڕێز سەرۆک وەزیرانی فیدراڵ دەکەم بە پەلە کۆنترۆڵی ئەم بارودۆخە نەخوازراوە بکات و سەر و ماڵی هاونیشتمانیان و خۆپێشاندەران بپارێزن و چیتر ڕێگە بە کەسانی نابەرپرس نەدات بارودۆخەکە ئاڵۆزتر بکەن.
لە هەمانکاتدا داوا لە هاووڵاتییە کوردە ستەملێکراوەکانیشمان لە کەرکووک دەکەم، دان بە خۆیاندا بگرن و خۆیان لە کاردانەوەی توند بەدوور بگرن. داوا لە هاونیشتمانیانی عەرەبی ڕەسەن و تورکمانەکانی خەڵکی کەرکووکیش دەکەم، ڕێگە بە خەڵکێکی نامۆ بە شارەکە نەدەن ئاشتی و پێکەوەژیانی نێوان پێکهاتەکان تێک بدەن.[1]
#مەسرور بارزانی#
سەرۆکی حکومەتی هەرێمی کوردستان
2023/9/2
تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

بەناوی خودای بەخشندە و میهرەبان
لەبارەی بارودۆخی #کەرکووک#ەوە ماوەی چەند ڕۆژێکە کۆمەڵێک ڕێگر و گێرەشێوێن بە بیانووی ڕێگریکردن لە کردنەوەی بارەگاکانی #پارتی دیموکراتی کوردستان# لە شاری کەرکووک، ڕێگەی #هەولێر# و کەرکووکیان گرتووە و ڕێگە نادەن هاووڵاتیان ژیان و هاتووچۆی ئاسایی خۆیان بکەن و دۆخێکی زۆر نالەبار و پڕمەترسیان بۆ خەڵکی کەرکووک دروست کردووە.
ئێمە هەمیشە ئەوەمان دووپات کردووەتەوە کە کەرکووک دەبێ نموونەی پێکەوەژیان و برایەتی و تەبایی نێوان پێکهاتەکانی ئەو شارە بێت بەڵام ئەو ڕەفتارە نابەجێ و نایاساییانە، هەوڵدانە بۆ نانەوەی فیتنە و تێکدانی پێکەوەژیان. جێگەی سەرسوڕمانی زۆریشە کە لەو چەند ڕۆژەی ڕابردوودا هێزە ئەمنیەکان و پۆلیسی کەرکووک بە هیچ شێوەیەک ڕێگریان لەو گێرەشێوێنی و ڕەفتارە نایاساییەی ڕێگرەکان نەکردووە، کەچی ئەمڕۆ لەبەرانبەر گەنجان و خۆپێشاندەرانی کوردی کەرکووک زەبروزەنگ و توندوتیژی بەکار هاتووە و خوێنی گەنجی کورد ڕژاوە. ئەم جۆرە ڕەفتارە بە هیچ شێوەیەک قابیلی قبووڵ نیە و ئەنجامی زۆر خراپی لێ دەکەوێتەوە و، ڕشتنی خوێنی ڕۆڵەکانمان لە کەرکووک باجی قورسی دەبێت.
لێرەدا داوا لە بەڕێز سەرۆکوەزیرانی عێراقی فیدڕاڵ دەکەم کە سنوورێک بۆ ئەو ڕێگر و گێرەشێوێنانە دابنێن و کۆتایی بەو ستەم و جیاکاری و ڕێگرییە بهێندرێت کە ڕاستەوخۆ پێکەوەژیان و سەقامگیریی کەرکووک و ناوچەکانی تر دەکاتە ئامانج.[1]

#مەسعود بارزانی#
2ی ئەیلوولی 2023
تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

بەرێز / سەرۆک کۆماری عیراق
بەرێز / سەرۆکی ئەنجومەنی وەزیرانی عیراق
بەرێز / سەرۆکی ئەنجومەنی نوێنەرانی عیراق

بەڕێزان پاش داخستنی ڕێگەی سەرەکی #کەرکووک#-#هەولێر# لەلایەن ژمارەیەک خۆپیشاندەرەوە دژی چۆڵکردنی بینای فەرماندەیی هێزە هاوبەشەکانی عیراق لە کەرکووک و تەسلیمکردنەوەی بە #پارتی دیموکراتی کوردستان#، کەرکووک بە باردۆخێکی ناجێگیردا تێدەپەڕێت.

ئێمە لە فراکسیۆنی #یەکێتیی نیشتمانیی کوردستان# لە پەرلەمانی عیراق وێڕای ئەوەی دژی داخستنی ڕێگەی سەرەکی کەرکووک -هەولێرین کە بارگرانی زۆری بۆ هاووڵاتییان دروست کردوە، داواتان لێدەکەین ڕێکاری بەپەلە بگرنەبەر بۆ ئاساییکردنەوەی دۆخی کەرکووک.

لە هەمان کاتیشدا داوا لە هاووڵاتییانی شاری کەرکووک لە هەموو پێکهاتەکان دەکەین، دان بە خۆیاندا بگرن و ڕێگە نەدەن لەپێناور مەرامی سیاسی هەندێک لایەندا سەقامگیری کەرکووک و پێکەوەژیانی ئاشتییانە لە شارەکە بکەوێتە مەترسییەوە.

وەک فراکسیۆنی یەکێتی نیشتمانی کوردستان لەسەر خەتین و هەموو جۆرە ڕێکارێکی یاسایی دەگرینەبەر بۆ سزادانی هەر کەس و لایەنێک کە بیەوێت بە ئاڵۆزکردنی دۆخی کەرکووک لە ئاوی لێڵدا ماسی بگرێت.[1]

فراکسیۆنی یەکێتیی نیشمانیی کوردستان لە پەرلەمانی عیراق
تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

بەداخەوە بارودۆخی دژواری کەرکووک بەهۆی شەڕکردن لەسەر بارەگای حزبی و ململانێی هێزە سیاسییەکانی ناو کەرکووک درێژەی کێشاوە و گەیشتە پێکدادان و بەریەک کەوتن و شەهید و برینداریش، کە ئەمانە قوربانیی بێباکی سیاسی و نیشتمانییە.
#یەکێتیی نیشتمانیی کوردستان# سێ رۆژە لەسەر هێڵە لەگەڵ حکومەتی عیراق کە پێویستە بەرپرسیارێتی نیشتمانی و حکومەتیی خۆی جێبەجێ بکات، تا ئاڵۆزییەکە سەر نەکێشێت بۆ بەریەک کەوتن و رژانی خوێنی هاووڵاتیانی کورد و پێکهاتەکان، بە پێچەوانەوە دەکرا بە لێکگەیشتن لەگەڵ پارت و حزبەکانی کەرکووکدا گرفتی بارەگا تەشەنە نەستێنێت کە ببێتە کێشەیەکی گەورە لە شارەکەدا، ئێستاش کاتی ئەوەیە سەرۆک وەزیران، کە فەرماندەی گشتی هێزە چەکدارەکانی عیراقیشە، راستەوخۆ بێتە ناو کێشەکەوە و لەگەڵ حکومەتی محەلی شارەکە و هێزەکانی سوپا و حەشد ئەم کێشەیە بنبڕ بکەن، ئەگینا وەک یەکێتیی نیشتمانیی کوردستان جەماوەری کەرکووک لەبەر بەرژەوەندی گشتی و پاراستنی ئاشتی دانیان بە خۆیدا گرتووە. چاوەڕوانیشمان لە حکومەت و لایەنەکانی تری کەرکووکیش ئەوەیە بەرپرسیارێتی خۆیان جێبەجێ بکەن.[1]

مەکتەبی سیاسی یەکێتیی نیشتمانیی کوردستان
2023/9/2

کۆمەڵی دادگەریی کوردستان ڕاگەیەنراوێکی لەبارەی پێشهاتەکانی ئەمڕۆی کەرکووکەوە بڵاوکردەوە..

‏‎بسم اللە الرحمن الرحیم
کوردستانیانی بەڕێز
هاوڵاتیانی خۆشەویستی کەرکووک

بە نیگەرانیەکی قوڵەوە چاودێریی ڕووداوەکانی شاری خۆشەویستی کەرکووک دەکەین، پەرەگرتنی گرژییەکان و ڕشتنی خوێنی خۆپیشاندەرانی مەدەنی پێشهاتێکی مەترسیدارە، بە داخەوە لە ڕووداوەکانی ئەمڕۆدا، 2/ی ئەیلول قوربانی لێکەوتوەتەوە، ئەمەش هەوڵەکانی چارەسەر قورستر دەکەن، وێڕای سەرکۆنەکردنی تەقەکردن لە خۆپیشاندەران، داوا دەکەین دامودەزگاکانی دەوڵەت بە ئەرکی خۆیان هەستن و بەرپرسیارانە هەڵسوکەوت لەگەڵ بارودۆخەکەدا بکەن و پارێزەری سەرو ماڵی هاوڵاتیان و تێکڕای پێکهاتەکانی کەرکووک بن.
‏‎شاری کەرکووک شاری پێکەوەژیان و نمونەیەکی بچوککراوەی عێراقە، هەوڵدان بۆ تێکدانی کەشوهەوای برایەتی نێوان پێکهاتەکان و نانەوەی ئاشوب و شەڕی تائیفی، یاریکردنە بەو ئاگرەی کە هەڕەشە لە سەقامگیریی هەموو عێراق و ناوچەکەش دەکات، بۆیە داوا لە هەموولایەک، لایەنە کوردستانی و عێراقیەکان، نوێنەرایەتی سیاسی پێکهاتەکان،دەکەین ئەوپەڕی حیکمەت و دانایی بەکاربێنن بۆ بەرگرتن لە تەشەنەسەندنی گرژیەکان و لە دەست دەرچوونی بارو دۆخەکە.
‏‎هاوڵاتیانی کەرکووک بە سەرجەم پێکهاتەکانیەوەو لە نێویشیاندا هاوڵاتیانی کورد کە پێکهاتەیەکی سەرەکی کەرکووک و فاکتەری بنەڕەتی پێکەوەژیانن لە شارەکەدا، دەمێک ساڵە باجی ململانێی سیاسیەکان دەدەن و قوربانی زۆریانداوە، قبوڵنەکراوە چی دیکە خەڵکی خۆشەویستی کەرکووک بکرێنە سوتەمەنی کردنەوەی بارەگای حیزبی و شەڕی سیاسیەکان و ئارامی و ئاسایش و گیان و ژیانیان بخرێتە مەترسیەوە.[1]

#کۆمەڵی دادگەریی کوردستان#
ئەنجومەنی باڵا
2023/9/2
تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!