[1]

لە پەیامەکەی سەرۆک وەزیران #مەسرور بارزانی#دا هاتووە لە ساڵیادی داگیرکردنی شنگال و جینۆسایدکردنی خوشک و برایانی ئێزدی لەلایەن تیرۆریستانی داعشەوە؛ بە ڕێزەوە یادی شەهیدانی ئەو کۆمەڵکوژییەی تیرۆریستانی داعش دەکەینەوە کە زام و برینێکی قووڵ و ساڕێژ نەبووە لە مێژووی گەلی کوردستان و مرۆڤایەتی بە گشتی.
سەرۆکی حکوومەتی هەرێمی کوردستان لە یادی ئەم 'کارەساتەدا' بە پێویستی دەزانێت بەڕێزەوە یادی گیانفیدایی و قوربانیدانەکانی پێشمەرگە قارەمانەکانی کوردستان بکەینەوە کە بە سەرکردایەتیی جەنابی سەرۆک بارزانی، شنگال و دەوروبەریان ئازاد کرد، هەروەها سوپاسی هەڵوێستی جوامێرانەی خەڵکی کوردستان بە گشتی و پارێزگەی دهۆک و دەڤەری بادینان بەتایبەتی دەکەین لە بەهاناوەچوون و یارمەتیدانی خوشک و برا ئێزدییەکانمان.
مەسرور بارزانی جەخت لەوە دەکاتەوە حکوومەتی هەرێمی کوردستان بەردەوامە لە هەوڵ و کارکردنی بۆ ئازادکردن و گەڕاندنەوەی هەموو ئەو ڕفێندراوانەی کە تا ئێستا ئازاد نەکراون و دۆزینەوە و دیاریکردنی چارەنووسی بێسەروشوێنکراوان. هەروەها درێژەدان بە پاڵپشتیی داراییی ڕزگاربووان و هاوکاریکردن و یارمەتیدانی خوشک و برا ئێزدییەکانمان ئەوانەی بەهۆی ئاسایینەبوونەوەی دۆخی شنگال و دەوروبەری، هێشتا هەر لە کەمپەکاندا دەژین و نەیانتوانیوە بگەڕینەوە ناوچەکانیان.
سەرۆک وەزیرانی هەرێمی کوردستان دووپاتی دەکاتەوە پێویستە حکوومەتی فیدراڵ ئەرک و بەرپرسیاریەتیی خۆی جێبەجێ بکات و خوشک و برا ئێزدییەکانمان قەرەبوو بکاتەوە و یارمەتی ئاوارەکان بدات و زەمینە خۆش بکات بۆ ئەوەی بە سەربەرزی بگەڕێنەوە بۆ ناوچەکانیان، ئەویش لە ڕێگەی جێبەجێکردنی ڕێککەوتننامەی شنگال و دەرچوونی هێزە چەکدار و ملیشیاکان لە دەڤەرەکە و گەڕانەوەی ئاشتی و ئاسایش بۆ ناوچەکە.
مەسرور بارزانی باسی لەوەش کردووە بە داخەوە بەهۆی جێبەجێنەکردنی ڕێککەوتننامەی شنگال و بەهۆی ئەو دۆخە نەخوازراوەی لە دوای ئازادکردنیەوە بەسەر شنگالدا سەپێنراوە، نەتوانراوە ئاوەدان بکرێتەوە و خزمەتگوزاریی پێویست پێشکەشی خەڵکی ئەو دەڤەرە بکرێت.
ئەمڕۆ 11 ساڵ بەسەر کۆمەڵکوژیی ئێزدییەکان تێ دەپەڕێت؛ لە هێرشی ڕێکخراوی تیرۆریستیی داعشدا بۆ سەر شنگال لە 3ی ئابی ساڵی 2014، داعش کوردانی ئێزدیی کۆمەڵکوژ کرد و شەش هەزار و 417 کەسیشی ڕفاند. تا ئێستا سێ هەزار و 591 کوردی ئێزدی لە دەست داعش ڕزگارکراون و چارەنووسی دوو هەزار و 500ی دیکەش نادیارە و هەوڵی ڕزگارکردنیان دەدرێت. [1]

=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

=KTML_Bold=دەقی پەیامی سەرۆک بارزانی=KTML_End=:
بەناوی خودای مەزن و دلۆڤان
ئەو تاوانەی تیرۆریستانی داعش یازدە ساڵ بەر لە ئێستا لە دژی خوشک و برا ئێزیدییەکانمان ئەنجامیان دا، تاوانێک بوو هەموو سنوورەکانی نامەردی و دڕندەیی تێپەڕاندبوو، ئەمە ئازارێکە هەرگیز لە یادمان ناچێت.
قەدەری گەلی کورد ئەوە بووە کە هەمیشە دوژمنی دڵڕەق و بێویژدانی هەبووە و کارەسات لەدوای کارەسات بەرۆکی گەلی کوردستانی گرتووە.
ئەوەی لەدژی خوشک و برایانی ئێزیدی ڕووی دا درێژکراوەی ئەو زنجیرە کارەساتانەیە کە لەدژی گەلی کوردستان ئەنجام دراون.
لای هەموو کەسێک ڕوونە ئێزیدییەکان بە هۆی کوردبوون و بیروباوەڕی ئایینیانەوە کەوتنە بەر شاڵاوی ڕق و بێویژدانیی تاوانبارانی داعش و جینۆساید کران. لەدوای ڕوودانی ئەو کارەساتە لەسەر دەستی تیرۆریستانی #داعش#، گەلی کوردستان و پێشمەرگە بە دڵ و بە گیان لەگەڵ خوشک و براکانیان بوون و ئەوەی لەدەستیان هات بۆ ڕزگارکردنی ئاوارەکان و ئازادکردنی #شنگال# و چیای شنگال ئەنجامیان دا. لێرەدا ڕۆڵی هێزی پێشمەرگەی کوردستان و هەموو ئەو قارەمانانە بەرز دەنرخێنین کە مێژووییەکی پڕشنگداریان تۆمار کرد و بۆ ئازادکردنی چیای شنگال و شنگال خوێنیان بەخشی و تۆڵەیان لە تیرۆریستانی داعش کردەوە و سەری تیرۆریستانیان خستە ژێر پێی ئێزیدییەکان. هەروەها زۆر سوپاسی هێزەکانی هاوپەیمانان دەکەین کە لە یارمەتیدانی پێشمەرگە و تێکشکاندنی داعش ڕۆڵێکی بەرچاویان بینی. لە یازدەهەمین ساڵیادی کارەساتی شنگالدا سڵاو بۆ گیانی شەهیدان و قوربانیانی ئەو تاوانە و هەموو ئەو تاوان و کۆمەڵکوژیانە دەنێرین کە بەسەر گەلی کوردستاندا هاتوون.
پێویستە دەوڵەتی عێراق قەرەبووی قوربانیانی کارەساتی شنگال و هەموو ئەو جینۆسایدانە بکات کە دەرهەق گەلی کوردستان ئەنجام دراون. دەبێ کۆتایی بەو هزر و ڕەفتارە شۆڤینیانە بێت کە هەرجار و بە بیانوویەک و بە عەقلیەتێکی نامرۆڤانە و نکۆلیکار ئازاری گەلی کوردستان دەدەن. [1]
#مەسعود بارزانی#
#03-08-2025#

=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

=KTML_Bold=دەقی پەیامی سەرۆکی هەرێمی کوردستان؛=KTML_End=
ئەمڕۆ يادى بەئازارى يازدە ساڵەى‌ جينۆسايدى ئێزدييان دەکەينەوە و بە ڕێز و وەفادارييەوە قوربانييانى ئه و تاوانکارييەى #داعش#، بەبير دەهێنينەوە. پابەندى پێشکەشکردنى هەموو پشتگيرييەکين بۆ هاووڵاتييانى ئێزديمان‌ و وێڕاى هەموو ئازارەکانى ڕابردوو، بە ئومێدەوە لە داهاتوو دەڕوانين و پێکەوە کار دەکەين بۆ ساڕێژکردنى برينەکانيان.
مايەى داخ و نيگەرانييەکى زۆرە که يازدە ساڵە هێشتا نزيکەى نيوەى ئێزدييان، لە دۆخێکى سەختى ئابوورى و کۆمەڵايەتى و دەروونيى کەمپەکاندا دەژين. ئەرکى حکوومەتى عێراقە خۆى لە هاووڵاتييە ئێزدييەکانى باشتر بەخاوەن بکات و قەرەبوويان بکاتەوە، چيتر ڕێگە نەدات شەنگال و ناوچە ئێزدييەکان، گۆڕەپانى تەراتێنى ميليشيا و گرووپە چەکدارەکان و يەکلاکردنەوەى ئەجێندا هەرێمييەکان بن.
دەبێ متمانە، دڵنيايى، ئارامى، ئاسايش، ئاوەدانى و خزمەتگوزارى بۆ شەنگال و ناوچەکانى تريان بگەڕێنێتەوە، دادپەروەرى‌ بۆ کۆمەڵگەى ئێزدى بەدى بێت و تاوانباران سزا بدرێن. بۆيە جەخت لە جێبەجێکردنى ڕێککەوتنى حکوومەتى هەرێمى کوردستان و حکوومەتى عێراقى فيدراڵ بۆ ئاساييکردنەوەى دۆخى شەنگال و بەپارێزگاکردنى دەکەينەوە. هەروەها داوا لە کۆمەڵگەى نێودەوڵەتى دەکەين‌‌ لە هەموو ڕوويەکەوە زياتر بە هاناى ئێزدييانەوە بێت.
سوپاسى هەموو ئه و وڵاتانە دەکەين کە کۆمەڵکوژيى ئێزدييانيان بە جينۆسايد ناساند و لە کار و هەوڵەکانمان بەردەوام دەبين تا زياتر لەسەر ئاستى نێودەوڵەتى بە جينۆسايد بناسرێت. سوپاس و پێزانین بۆ یارمەتیی هاوپەیمانیی نێودەوڵەتی لە تێکشکاندنی داعش. خوشک و برايانى ئێزديمان دڵنيا دەکەينەوە کە هەميشە پارێزەريان دەبين و تا ڕفێنراوێکى ئێزدى مابێت، کارى نووسينگەکەمان بۆ ڕزگارکردن و ئاشکراکردنى چارەنووسيان بەردەوام دەبێت.
سڵاو لە ياد و گيانى قوربانييانى ئێزدى و لە ئيرادەى بەهێز و خۆڕاگريى ئێزدييان. سڵاو لە ياد و گيانى هەموو ئەو پێشمەرگە قارەمانانەى بە فەرماندەييى جەنابى سەرۆک مەسعوود بارزانى، بۆ ڕزگارکردنى شەنگال و سەرجەم پێکهاتەکانى کوردستان و عێراق گيانيان بەخشى. [1]
#نێچیرڤان بارزانی#
#3-08-2025#

=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

ڤیدیۆ: وێنەی بەشێک لەو کەسانەی کە لە #03-08-2025# کۆچی دواییان کردووە.
ئامادەکردنی: مەلا محەمەدی خەتات. [1]