وەلی دېوانە شاعېرێ خوڼەوار بیەن

وەلی دېوانە پېسە تەمامو شاعېرەکان خۊڼەوار بیەن،
بەبۍ سەرنجدای شېعرەکاش و ۋرد بیەیۆن جە بابەتو شېعرەکاش، دەماو دەم ئامان و ئەژنیەنمان کە (وەلی دېوانە ) شاعېرێ بۍ سەوادو نەخۊڼەوار بیەن. پاسە دیارەن ئا کەسۍ کە وەڵتەر خەریکو جەمکەردەو شېعرەکان و وەلی دېوانەی بیېنۍ تەنیا کارشان جەمکەردەی و چاپکەردەی بیەن، چونکم گەر سەرنجە دریێ هۊنییەکاش ئاوەختە ڕۊشنبېوە کە نەک وەلی دېوانە خۊڼەوار بیەن، بەڵکم تەمام شارەزاچ بیەن جە چواردەورو وېش و ئاگایی و هەم زانستش بیەن سەرو بابەتە فەرهەنگی وئەدەبی و دینییەکان.
وەلی دېوانە نازنامش میرزا بیەن، نازنامو میرزای پەی کەسێ بیەن تەمام خۊڼەوار بیەبۊ.
گەر ۋردۍ بیمێ جە بابەتو شېعرەکاش دنیا وینیێ ڕۊشن وینمۍ دلۍ و شېعرەکاشەنە، وەلی دېوانە شارەزا بیەن بە بەرهەمەکانو وەڵۍ وېش بە تایبەت بەرهەمو نامدارەکاو شاعېرە فارسەکا و ئیسلامیەکان پېسە (حافزی، سەعدی شیرازی، جامی، خاقانی ،مەولانای ڕومی، فارابی، گەنجەوی، ....)
ئانەیچ دەلالەتەن پەی ئاستو زانیاری و خۊڼەواریش. کەسێ گەر شوانەبۊن، شۊنەو گەلەی و حێوانداریۆ دور جە ئاوەڎانی، هەرگیز زات نمەکەرۊن نامۍ سەعدی شیرازی وحافزی ۋزۊنە دلۍ قاڵب و شېعراش. کەسێ شوانکارەبۊ ئاستو شېعرېش نیەن پلێوە باڵانە، وەلی دېوانە هیچش جە شاعېرەکان و مەدرەسەو ئەدەبو هۆرامی کەم نیەن، بەرهەمەکېش ملانە دلۍ چوارچېوەو ئا مەدرەسەیە.
وەڵامو نامێوە پەی ڕەنجوری شاعېری (مەڵڵا عومەرو زەنگەنەی ) جە لاو وەلی دېوانەیۆ ڕاسی ئانەیە بەرمەوزۊن.

فیردەوسی طووسی، ؛جامی ؛ ملک جام
خاقانی خەیاڵ، ئەنوەری ئەییام
سەعدی سوخەندان بەحری مەعانی
حافزی شیراز صائیبی سانی.[1]