ئەڤرۆ:
ھەڤسەرۆکێ HDP ڕاگەھاند کو د ڕەوشا نھا دا بۆ گەلێ کورد ئازادکرنا شنگال و کۆبانێ و ھەموو دەڤەرێن کوردستانێ ژ ھەر تشتەکێ گرنگترە و شنگال پشکەکە ژ ئاخا باشورێ کوردستانێ و کەس نەشێت ژێ جودا بکەت، ئاخڤتنا من یا سەبارەت ب شنگالێ ژ ئالیێ ھندەک دەزگەھێن ڕاگەھاندنێ ڤە بەرۆڤاژی ھاتە بەلاڤ کرن و ئەم دخوازین دێرسم و شنگال د ناڤ کوردستانێ دا خوەدان تایبەتمەندیێن خوە بن.
سەلاحەدین دەمیرتاش ھەڤسەرۆکێ پارتا دیمۆکراسیا گەلان (HDP) پشتی کۆنگرا پارتا خوە یا لقێ دێرسمێ د داخۆیانیەکا تایبەت دا بۆ ڕۆژناما ئەڤرۆ ڕاگەھاند کو د ھندەک کەنالێن ڕاگەھاندنێ دا ئاخڤتنا وی یا ل سەر شنگالێ ب بەرۆڤاژی ھاتیە بەلاڤکرن و گۆت: (من نە گۆتیە شنگال ژ کوردستانێ جودایە و دڤێت سەربخوە بیت و ئەز جارەکا دی دوپات دکەم کو کەس نەشێت شنگالێ ژ کوردستانێ قوت بکەت و شنگال پشکەکا گرنگ ژ ئاخا کوردستانێیە).
ھەڤسەرۆکێ HDP ھەروەسا دیار ژی کر د ڕەوشا نھا دا یەکگرتنا پارت و ئالیێن سیاسی یێن کوردستانێ و گەلێ کورد بابەتا ھەری گرنگە و ل ھەر جھەکێ گەلێ کورد و ھێزێن کوردستانی ژ گەریلا، پێشمەرگە ھەتا شەرڤانێن یەکینەیێن پاراستنا گەل بەرخوەدانیێ بۆ ئازادیا کوردستانێ دکەن و گۆت: (ئەز ناخوازم بەرسڤا برێز ھێمن ھەورامی بدەم ژ بەر کو ئاخڤتنێن وی خزمەتا کوردستانێ ناکەت، ئەز دخوازم جارەکا دی بێژم کو من د ئاخڤتنا خوە یا ل سەر شنگالێ دا بەرێ نھا من گۆت کو ئەم ژ ئازادکرنا شنگالێ کەیفخوەشین و دڤێت ھەموو ئاخا کوردستانێ ل ژێر دەستێ تیرۆرستان بھێتە ڕزگارکرن و جارەکا دی دوپات دکەم کو شنگال پشکەکا گرنگ یا کوردستانێیە).
دەمیرتاش د پشکەکا دی یا ئاخڤتنا خوە دا ژی ڕاگەھاند کو ھەر پارتەکی کوردی خوەدان بەرنامە و سیاسەتەکا جودایە و ژ ھەڤ جودانە و گەلەک ئاساییە د ھەر کارەکی دا خوەدان یەک بەرنامە و سیاسەتەکا وەک ھەڤ نەبن و گۆت: (بۆ من، پارتا من و گەلێ کورد ئازادکرنا شنگالێ و کۆبانێ ل ژێر دەستێ تیرۆرستان تشتەکی پیرۆزە و ب تایبەت بەرخوەدانا ھێزێن کوردی ل کۆبانێ و شنگالێ د یەک سەنگەری دا ل دژی تیرۆرستان جھێ شانازیێیە و گەلێ کورد و ھێزێن کوردی زێدەتر نێزیکی ھەڤدو کریە و دڤێت ھەر کەس و ئالیەک د ئاخڤتن و داخۆیانیێن خوە دا یەکگرتنێ بکەنە بناغە نە دژاتیا ھەڤدو بکەن، ژ بەر ڤێ چەندێ ژی ئەز بەرسڤا برێز ھەورامی نادەم ژ بەر کو گەلێ کورد ھەموو پارت و ئالیێن سیاسی باش ڕاستیا ڕەوشا نھا باش دزانن).
د بەردەوامیا ئاخڤتنا خوە دا سەلاحەدین دەمیرتاش ھەڤسەرۆکێ HDP ڕاگەھاند ژی کو ھندەک دەزگەھێن ڕاگەھاندنێ ب زانەبوون ئاخڤتنێن وی بەرۆڤاژی کرینە و گۆت: (ئەز دخوازم ب ڕێیا ڕۆژناما ھەوە جارەکا دی ئاخڤتنێن کو من بۆ شنگالێ کریە دوپات بکەم، یا یەکێ شنگال ئاخا کوردستانێیە و کەس نەشێت ڤێ ڕاستیێ ئینکار بکەت، یا دویێ ل دووڤ سیاسەت و باوەریا مە دڤێت شنگال د ناڤ کوردستانا ئازاد دا خوەسەر بیت و ئەم ھەمان داخوازیێ بۆ دێرسمێ ژی دکەین، ژ بەر کو شنگال ل گەل ناسنامەیا خوە یا کوردایەتیێ خوەدان ناسنامەیا تایبەت یا ئێزیدیتیێیە و ب ھەمان ڕەنگی دێرسم ژی ل گەل ناسناما کوردایەتیێ خوەدان ناسناما عەلەوییە و دڤێت بۆ پاراستنا وان تایبەتمەندیێن خوە د ناڤ کوردستانا ئازاد دا خوەسەر بن).
د دووماھیا ئاخڤتنا خوە دا ژی سەلاحەدین دەمیرتاش ھەڤسەرۆکێ HDP ڕاگەھاند کو یێ کو بریارێ ل سەر پاشەرۆژا شنگالێ بدەت خەلکێ شنگالێ ب خوەیە و گۆت: (بریارا خەلکێ شنگالێ بۆ پاشەرۆژا وان چ بیت بۆ مە جھێ ڕێزگرتنێیە و داخواز ژ ھەر ئالیەکی کوردستانی دکەم کو د جھێ دژاتیا ھەڤدو بکەن بلا ئەم پێکڤە کار بۆ یەکگرتنێ بکەین و خالێن جودا بدەینە ئالیەکێ و ل سەر خالێن ھەڤپشک بۆ یەکگرتنا کورد و کوردستانێ کار بکەین. ژ خوە ڕوودانێن ل شنگال، کۆبان و دەڤەرێن دی یێن کوردستانێ سەلماندن کو ئەم دەمێ یەکگرتی و ب ھێز بین دێ بشێین خوە بگەھیننە ئازادیێ و گەلێ خوە ل دژی ھەر ھێرشەکی ب پارێزین).[1]