لە ڕۆژی 10رەزبەری 1330 هەتاوی لە شاری #سەقز# لە دایک بوە.هەر لە سەردەمی منداڵیەوە حەزوخولیای هونەربوە و لە چەند بوارێکدا وەکوو وێنەگری و وێنەگەری و کارە دەستیەکان ئەو حەزەی دەربڕیوە و لە ئاکامدا بوەتە ئەوینداری مۆسیقا.
نەبوونی شوێن و ناوەندێک کە مووسیقای لێ فێر ببێ لە شارەکەی هەمووکات ئەبوە هۆی دڵتەنگی و بێ ئوقرەیی کاک ڕەسوول میرزاپوور، بەڵام بێ ماندوویی بۆ گەیشتن بەو ئەوینە هەنگاوی هەڵگرتوە و لە هەر کوێ تروسکایەک لە موسیقی خۆی نواندبێ ئەویندارانە ڕووی تێ کردوە.
لە ساڵی 1349 هەتاوی دا چەند وانەی مۆسیقای سەرەتایی بە شێوەی گۆرانی کوردی بە ئامێری ویوڵۆن لە خزمەت مامۆستا ڕەشید فەیزنژاد وەکوو هاوەڵێکی هاوتەمەن فێر بوە، دواتریش لە لای مامۆستا یوسف غەفار نژاد کە خەڵکی شاری #ورمێ# بوەو لە سەقز بە حوکمی ئەوەی کادری نزامی بوو و مۆسیقای باشیشی دەزانی و سەرپەرشتی گرووپی مووزیکی ئەرتەشی دەکرد کاک ڕەسووڵی تامەزرۆی مۆسیقا لە لای ئەویش چەند گۆرانی فێر بوە.
ساڵی 1350 بۆ ماوەی دوو ساڵ چوەتە دانش سەرای موقەدەماتی لە شاری بیجاڕ و وانەی مامۆستابوونی خوێندوە و دەبێتە مامۆستای قوتابخانەی سەرەتایی.
لە ساڵی 1352 بۆ ماوەی ساڵێک دەبێتە مامۆستای قوتابخانە گوندی مازوار لە ناوچەی سەرشیوی سەقز.
لە هاوینی ساڵی 1353 لە گەڵ فەریدە خانمی فەتحی کە هەر خزمی خۆیەتی لە شاری بانە ژیانی هاوبەشی پێک دێنێت کە ئەو خاتوونە هەمیشە وەک یارمەتی دەرو پشت وپەنایەک هاندەری کاک ڕەسووڵ و دڵسۆزی مناڵەکانی دەور دەگێڕێت.
ساڵی 1354 بۆ ماوەیەکی کورت چوەتە شاری #سنە# و لە خزمەت مامۆستا حەسەن کامگار وانە بنەڕەتیەکانی مۆسیقا ی تەواو کردوە و هەر لەو ساڵەیشدا هاوکاری خۆی لە گەڵ تیپی مۆسیقای فەرهەنگ و هونەر دەست پێ کردوە و هاوکات بۆ ماوەی دوو ساڵ لە قوتابخانە سەرەتایەکان و پێش سەرەتایی (باخچەی ساوایان) وەک مامۆستایەک سروود و گۆرانی بە مناڵانی کەم تەمەن فێر کردوە هەروەها لە هەمان کات و سەردەمدا حەوتووی ڕۆژێک دەچوە ڕێخراوی ژنان و وەک ئەندامێکی ئیفتغاری ئەو ناوەندە سروودوگۆرانی بۆ مناڵان دەوتەوە.
مامۆستا ڕەسووڵ میرزاپوور ساڵی 1356 دیپلۆمی ئەدەبی وەرگرتوە لە ساڵی 1358 دا لە ئەزموونی سەرانسەری و تاقیکردنەوەی مۆسیقای زانکۆی تاران دا بەشداری کرد بەڵام بە داخەوە دوای سەرکەوتنی شۆڕشی گەلانی ئێران بارودۆخی فەرهەنگی و هونەری ئەوکات (شۆڕشی فەرهەنگی) بۆ ماوەی دەساڵی ڕەبەق بەشی مۆسیقا لە زانکۆکاندا داخرا و کاک ڕەسووڵ بێ خوێندنگە مایەوە.
سەرەنجام لە ساڵی 1368 دا دوای دەساڵ کە بەشی مۆسیقا لە زانکۆدا کرایەوە مامۆستا میرزاپوور لە زانکۆی هونەری تاران وەک خوێندکارێک وەرگیراو دوای پتر لە 4 ساڵ بەڵگەوبڕوانامەی لیسانسی مۆسیقا(کارناسی مۆسیقا) ی وەرگرت وگەراوەتەوە زێدو شارەکەی واتە سەقز.[1]