لە ساڵی 1960 لە شارۆچکەی دوزی پارێزگای #کەرکووک# هاتۆتە دنیاوە. پێش هەڵگیرسانی شۆڕشی 1974 – 1975 لە کوردستانی باشوور، ڕژێمی لەناوچووی بەعسی عێراق خۆیو کەسوکارەکەی ڕاپێچی زیندان دەکەنو پاشان شاربەدەریان دەکەنو پەنا دەبەنە بەر ئوردوگا کراوەکانی نێو خاکی ڕۆژهەڵاتی کوردستان. پاش ساڵێک لە هەرەسی شۆڕش، لە هاوینی 1976دا دەگەڕێنەوە بۆ عێراق و لەوێش ئاوارەی قەزای فەللوجە دەکرێن.
لە زستانی 1978دا ڕژێمی بەعس ڕێگای پێدەدات بگەڕێتەوە بۆ کوردستان و لە شاری #سلێمانی# جێگیربێت. لەو دەمەدا دەبێتە ئەندامی بزووتنەوەی سۆسیالیستی کوردستان و پاشان بە دزەی ڕژێمەوە لەگەڵ کەسوکارەکەیدا دەگەڕێتەوە بۆ کەرکووک و لەوێش درێژە خوێندنی ئامادەییو خەباتی ژێرزەمینی خۆی دەدات.
لە هاوینی ساڵی 1979دا دەبێتە ئەندامی تیپی شانۆی ئەزموونگەری و لەگەڵ هونەرمەندی نەمر حسێن میسری و هونەرمەندان ئیسماعیل هەورامیو ئیحسان محێدینو جیهاد ئەحمەدو چەندین کەڵە هونەرمەندی شانۆیی تری خەڵکی ڕەسەنی شارەکە خەریکی شانۆگەری و نواندن بووە. هەر لەو ماوەیەدا چەندین نووسینی لە سەر هۆنەری شانۆ لە گۆڤارەکانی بەیانو ڕۆشنبیریی نوێو کاروانو ڕۆژی کوردستاندا بڵاوکردۆتەوە.
دوای دەرچوونی لە ئامادەیی پیشەسازی کەرکووکو وەک کادرێکی چالاکی حزبی سۆسیالیستی کوردستان و بەداوای سەرکردایەتی حزبەکەی لە زستانی 1983دا دەچێتە سەربازی وەک ئەفسەرێکی یەدەک سێ ساڵ لەبەرەکانی باشووری جەنگی ئێران-ئێراقدا دەمێنێتەوە.
لە پایزی 1986 داو دوای هاوسەرگەری لەگەڵ خاتوو چرۆ ئیسماعیل ڕەشان (خوشکی مامۆستا چیمەن ئیسماعیلی نیگارکێش) و بەداوای حزبی سۆسیالیست دەچێتە ڕیزی شۆڕشو بەنازناوی نەقیب سەلام بەشداری چالاکیەکانی هێزەکانی #پێشمەرگە#ی کوردستان دەکات. هاوکات، چەند بابەتێکی هونەری و سیاسی لە گۆڤارەکانی #قەندیل# و سورێن و پەیامی ئاڵای شۆڕش بە نازناوی کیاکسار کاکەیی بڵاودەکاتەوە.
لە سەرەتای 1988دا خۆی و هاوسەرەکەی ئاوارەی تورکیا دەبن و پاش ساڵێک بەرەو کەنەدا کۆچبەری دەکەن. لەوێش لە زانکۆی وینیپەگ وەردەگیرێت و لەساڵی 1993دا بەکەلۆریۆسی شانۆو دراما بەدەست دەهێنێت و پاش ساڵێک لەهەمان زانکۆ بەکالۆریۆسی فەخری لە زانستی سیاسیدا بەدەست دەهێنێت. هەر لەو ماوەیەدا چەندین نووسینی سیاسی بە زمانەکانی ئینگلیزی و عەرەبی و کوردی بڵاوکردۆتەوە لە ڕۆژنامەکانی وینیپەگ فریپرەس و تۆرنتۆ ستارو گلۆب ئەند مەیل و ئەلحەیات و ئەلمرئات و ئەلمغترب و ئەلشەرق ئەلئەوسەت و ئاڵای ئازادی و کوردستانی نوێ و خەبات.
لە بەهاری 1995دا دەچێتە ئەلمانیا و بۆ ماوەی ساڵێک مەشق بە ئەندامانی تیپی شانۆی ئەحمەدی خانی دەکات و وەک دەرهێنەرێکی ئەکادیمیای کوردی بۆ مەدتێڤی کاردەکات.
لە 1996 لە وەزارەتی دادی هەرێمی ئۆنتاریۆ وەک وەرگێڕو توێژەری کۆمەڵایەتی دادەمەزرێت و پاش سالێک لە شاخەی پرۆتۆکۆلی وەزارەتی دەرەوەی کەنەدا کاربەدەست دەبێت.
لە ساڵی 2001دا دەچێتە زانکۆی هارڤەرد و بەرڵگەی ڕاهێنەری دانوستاندن بەدەست دەهێنێت و لەگەڵ چەند فرمێکی پارێزەری کار دەکات و لەپاڵیشەوە کۆمپانیای وەبەرهێنانی مەمو زین دادەمەزرێنێت.
لە ساڵەکانی 2002- 2003دا فلیمی لەچاوەڕوانی هیوادا وەبەردەهێنێت و، وەک نووسەرو دەرهێنەری ئەو بەرهەمە، خەڵاتی چاکترین درامای نێودەوڵەتی فیستیڤالی فلیمو ڤیدیۆی نیویۆرک بەدەست دەهێنێت.
لەساڵی 2004ەوە بۆ 2006 وەک وەرگێرو ڕاوێژکاری سیاسی گرێبەست لەگەڵ وەزارەتی بەرگری ئەمریکا لە بەغدا و شاری باقوبە کاری کردووە.
لەساڵی 2007دا و بۆ ماوەی ساڵێک بووەتە مامۆستای دانوستاندن لە ئەکادیمیای ڕاهێنانی سەرکردە سەربازیاکانی مەڵبەندی ڕاهێنانی نیشتیمانی وڵاتە یەکگرتووەکانی ئەمریکا.
لە هاوینی 2008 داو پاش بەدەستهێنانی بڕوانامەی ماستەری هونەری دبلۆماسیەت لە زانکۆی نۆروجی ئەمریکی، بەگرێبەستێکی ساڵونیوی دەبێتە ڕاوێژکاری دانوستاندنو لە وەزارەتی بەرگری عێراقدا دەستبەکار دەبێت.
لە پاییزی 2009دا کۆمیسیۆنی سەربەخۆی هەڵبژاردنەکان مۆڵەتی قەوارەی سەربەخۆی پێدەبەخشێت بۆ خۆپاڵاوتن لە هەڵبژاردنە نیشتتمانیەکانی عێراق لە پارێزگای کەرکووکدا. بەڵام، بۆ پاراستنی بەرژەوەندی نەتەوەیی کورد لەو پارێزگایەدا، لە هەڵبژاردنەکان دەکشێتەوەو دەگەڕێتەوە بۆ کەنەدا. ئێستاکەش خوێندنی دکتۆرای فەلسەفەیە لەسەر کێشە ئەتنیەکانی پارێزگای کەرکووک.
جگە لە بڵاوکردنەوەی چەندین باسی ئەکادیمی لەسەر دۆزی کورد لە پەیوەندییە نێودەوڵەتیەکاندا، سەعید کاکەیی دوو کتێبی بەزمانی ئینگلیزی بڵاوکردۆتەوە بە ناونیشانەکانی کوردو پەیوەندییە نێودەوڵەتیەکان و تێگەیشتنی بەڕیوەبردنی ململانی و دانوستاندنی هاریکارانە.
http://www.saeedkakeyi.net
http://twitter.com/Kakeyi
http://www.facebook.com/profile.php?id=645800085&ref=fs
http://www.freewebs.com/waiting_for_hiwa/
http://www.hks.harvard.edu/.../more_sweat_less_blood-bonnie_docherty.pdf
http://www.norwich.edu/about/news/2008/.../sgsCommencementTwo.pdf
http://www.kurdishaspect.com/doc070110SK.html
http://www.kurdishaspect.com/doc062710SK.html
http://www.kurdishaspect.com/doc062410SK.html
http://www.kurdishaspect.com/doc061410SK.html
http://www.kurdishaspect.com/doc061110SK.html
http://www.kurdishaspect.com/doc060910SK.html
http://www.ekurd.net/mismas/articles/misc2010/6/state3988.htm
http://www.kurdmedia.com/article.aspx?id=7677
http://www.kurdmedia.com/article.aspx?id=3091
http://www.kurdmedia.com/article.aspx?id=7899
http://roshngari.com/Sbochwn.php?recordID=113
http://roshngari.com/Sbochwn.php?recordID=99
http://roshngari.com/SGR.php?recordID=75
http://www.kurdistannet.info/net/index.php?option=com_content&view=article&id=13575&catid=110&Itemid=157