ساڵی 1358ی هەتاوی (07-10-1979) لە داوێنی بنەماڵەیەکی نیشتمانپەروەری شاری #سەقز# لە دایک بوو. قۆناغەکانی سەرەتایی، ناوەندیی و دواناوەندیی خوێندنی هەر لە شاری سەقز تەواوکردووە و بڕوانامەی دیپلۆمی لە ڕشتەی حەساوداری وەرگرتووە و دواتر دەستی داوەتە کاسبی و بۆ ماوەی پێنج ساڵ لە بازاڕی شاری سەقزدا دووکانی بووە و کاروباری بازرگانی کردووە.
ناوبراو تاقە منداڵی بنەماڵەکەیەتی و کوڕی خوالێخۆشبوو پەرویز شافێعی یەکێک لە مامۆستا خۆشناوەکانی دەبیرستانەکانی سەقزە کە پاش سەرکەوتنی شۆڕشی گەلانی ئێران بوو بە پێشمەرگە و لە ئاکامدا ساڵی 1364ی هەتاوی لە ئاوایی یازی بڵاغی سەر بە ناوچەی فەیزوڵابەگی سەقز لە شەڕ و تێکهەڵچوونێکی چەکداریدا لەگەڵ هێزەکانی کۆماری ئیسلامی ئێران گیانی بەخت کرد.
سۆران سەقزی هەر لە تەمەنی منداڵییەوە ڕووی لە مزگەوت و تەکیەکانی شاری سەقز کردووە و ئۆگریەکی زۆری بە خوێندنی قورئانی پیرۆز و هەروەها ئەشعار و هۆنراوە ئایینیەکان بووە و سەرەنجام ساڵی 1373 لە تەمەنی 15 ساڵیدا لەتەکیەی حاجی شێخ هادی هاشمی قبووڵی بەیعەتی کردووە و بوەتە مورید و دەروێشی تەریقەتی پیرۆزی قادری سۆڵەیی و تا ئێستاش وەفادار بەو بەیعەتە ماوەتەوە.
ناوبراو زۆر زوو خۆی لەنێو ئەم تەریقەتەدا پێدەگەێنێت و پاش ماوەیەکی کوورت لەلایەن خوالێخۆشبوو حەزرەتی حاجی شێخ هادی هاشمی کە ئەو کات ئاوارە و پەڕیوەی هەندەران بوو و لە وڵاتی بریتانیا نیشتەجێ بوو، بە فەرمی ئیجازەی تێغ بازی پێ ئەدرێت و پاش ئەم بڕیارە سۆران سەقزی لەگەڵ وەڤد و کاروانەکانی تەریقەتی قادری بە مەبەستی ئێرشاد و جەولەی دەروێشی سەردانی زۆربەی شار و شارۆچکە و گوندەکانی کوردستان و بە تایبەت ناوچەکانی: سەقز، سنه، مەهاباد، بۆکان، بانه، سەردەشت، کامیاران، قوروە، کرماشان و جوانڕۆ، دەکات و بە خواردنی بەرد و تیغ و هەروەها تێغ بازی و عەمەلیاتی خارق العاده خەڵک و جەماوەری ئەم ناوچانەی ئیرشاد کردوه.
سۆران سەقزی پاش وەفاتی حەزرەتی حاجی شێخ هادی، جارێکی دیکە بەیعەت لەگەڵ جێگەداری ناوبراو واتە دوکتور شێخ حەسەن هاشمی ئەبەستێت و پەیمانی بەڵێن و وەفاداریی بە تەریقەتی قادریی سۆڵەیی نوێ ئەکاتەوە. دواتر بەهۆی لێهاتوویی و چالاک بوونی لە ڕادەبەدری ناوبراو لە بوارە جۆراوجۆرەکانی تەریقەتیدا لەلایەن شێخ حەسەنەوە بە فەرمی بەرپرسایەتی بەشی تەبلیغات و چالاکییەکانی ڕاگەیاندنی لە ناوچەکانی سەقز، بۆکان و مەهاباد پێ ئەسپێردرێ و تا کاتی بەجێهێشتنی ڕۆژهەڵاتی کوردستان و ڕۆیشتن بۆ هەندەران بە لێوەشاوەییەوە ئەم بەرپرسایەتییە بەڕێوە ئەبات.
دەروێش سۆران، جگە لەم بەرپرسایەتییەی بۆ ماوەیەکی دوورودرێژ بەرپرسی بەشی ڕێکخستنی موردید و مەنسووبانی تەریقەتی قادریی سۆڵەیی لەنێو شاری سەقز و گوندەکانی ناوچەی خوڕخوڕەی لە ئەستۆ ئەبێت و جگە لە ڕاپەڕاندنی کاروباری تەکیەی سەقز بە شێوەی بەردەوام سەردانی گوندەکانی ناوچەی خوڕخوڕەی سەقز دەکات و وەک پردی پەیوەندی لەنێوان شێخ حەسەن و موریدەکانی ئەم ناوچە، مەئموریەت و ئەرکە پیسپێردراوەکانی ڕادەپەڕێنێت.
ناوبراو جگە لە بەشداری لە زۆربەی ئێرشاد و جەولە دەروێشیەکانی ناوچە جیاوازەکانی کوردستان، چەند جارێک لەسەر فەرمانی شێخ حەسەن سەردانی کوردستانی ئێراقی کردووە و لەگەڵ شێخ محەمەد کەسنەزانی ڕێبەری تەریقەتی قادری کەسنەزانی لە شاری سلێمانی و شێخ بابەعەلی سۆڵە لە شاری هەڵەبجە کۆدەبێتەوە و پەیامی شێخیان پێ ڕادەگەێنێت.
سۆران سەقزی لەو ماوەیدا کە لە شاری سەقز بووە دەیان جار لەلایەن ناوەندە ئەمنییەتییەکانی ئەم شارەوە بانگهێشت و لێپرسینەوەی لەگەڵ کراوە و بەردەوام وەک کەسێکی ئایین خواز و نیشتمانپەروەر لەژێر گوشار و چاوەدێریی دەوڵەتدا بووە و بۆ ماوەیەکی کوورتیش بە تاوانی ئەوەی کە گوایە ئیسلامییەکی توندڕەوە دەسبەسەر کراوه، بەڵام پاش ئەوەی ئەم تاوانە بەسەریدا ساخ نابێتەوە ئازاد ئەکرێت. ئەمە لە حاڵێکدایە کە ئەم ڕەوتە ئایینییە کە ناوبراو چالاکی تێدا دەکات وەکوو ڕێبازێکی عیرفانی و مەعنەوی بە دوور لە کێشەی سیاسەت و دەسەڵاتخوازی، تەنیا خۆی لە پەیوەوەندێکی ڕۆحانی و خۆشەویستی لەنێوان تاک و خوداواەندا ئەبینێتەوه.
ناوبراو جگە لەوەی کە وەک چالاک و هەڵسوڕێکی ئایینی لە شاری سەقز ڕۆڵی بینیوە، وەک ناسیۆنالیستێکی کوردپەروەر و هەڵسووڕ لە بواری دەستەبەرکردنی مافە نەتەوایەتییەکانی گەلی کورددا چالاکی کردووە و بەردەوام بە شێوازی جۆراوجۆر خزمەتی بە پەرەسەندنی بیری نەتەوەیی لەنێو لاوانی سەقزدا کردووە و بە کردنەوەی کلاسی فێربوونی زمانی کوردی بە شێوەی نافەرمی دەیان منداڵ و لاوی ئەم شارەی فێری خوێندن و نووسین بە زمانی زگماکی کردووە.
سۆران سەقزی ساڵی 1379ی هەتاوی شاری سەقزی جێهێشت و لە شاری ستۆکهۆڵمی پایتەختی وڵاتی سوید نیشتەجێ بوو، بەڵام لە هەندەرانیش درێژەی بە چالاکییە ئایینی و نەتەوایەتییەکانی دا و هەنووکە وەک وتەبێژی تەریقەتی قادری لەدەرەوەی وڵات ڕۆڵ ئەگێڕێت و تا ئێستا جگە لە کۆمەڵێک چالاکی جۆراوجۆر، لەگەڵ چەندین وەڤدی داکۆکیکەر لە مافی مرۆڤ و هەروەها بەرپرسانی باڵوێزخانەی چەند وڵاتێکی ئەورووپی دانیشتووە و کێشەکانی بەردەم چالاکانی ئایینی ئەهلی سونەت لە کوردستان بە گشتی و مورید و مەنسووبانی تەریقەتەکانی قادری و نەقشبەندی بە تایبەتی باس کردووە.
هەروەها ناوبراو پاش چوونە دەرەوە لە ئێران خەبات و چالاکی خۆی لەنێو یەکێک لە حیزبەکانی تایبەت بە ڕۆژهەڵاتی کوردستان بە شێوەی ئاشکرا دەست پێکرد و ماوەی 2 ساڵ وەک بێژەری ڕادیۆ دەنگی کوردستان و 2 ساڵیش وەک بێژەر و بەرپرسی ڕادیۆ دەنگی لاوان لە شاری ستۆکهۆڵم کاری کردووە و دواتر بۆ ماوەی 2 ساڵیش وەک پێشکەشکار و بەڕێوەبەری بەرنامەی لاوان لە کاناڵی ئاسمانی تیشک تیڤی، دەوری بینیوە.
کاک سۆران سەقزی هەروەها لە کۆنفڕانسی پێنجەمی یەکیەتی لاوان لە وڵاتی سوید وەک ئەندامی جێگری کۆمیتەی بەڕێوەبەری گشتیی هەڵبژێردراوە و لە کۆنفڕانسی شەشەمی ئەم ڕێکخراوەدا بە دەنگێکی زۆرەوە وەک ئەندامی ئەسڵی دەنگی هێناوەتەوە و تا کۆنفڕانسی حەوتەم وەک بەرپرسی گشتیی تەشکیلات و ڕێکخستنەکانی یەکیەتی لاوان لە وڵاتی سوید کاری کردووە و لە کۆنفڕانسی حەوتەمییشدا دیسانەوە بە دەنگی زۆرینەی ئەندامانی ڕێکخراوەکه، وەک ئەندامی ئەسڵی هەڵبژێردراوە و ئەرکی بەرپرسایەتی کۆمیسیۆنی چالاکییەکانی لاوانی لە وڵاتی سوید بۆ دیاری کراوە. شایەنی باسە کە ناوبراو جگە لەو بەرپرسایەتییانە کە لەسەر ئاستی وڵاتی سوید بە گشتی بویەتی، ساڵێکیش وەک بەرپرسی تەشکیلاتی لاوان لە شاری ستۆکهۆڵم و ساڵێکیش وەک بەرپرسی گشتیی یەکیەتی لاوان لە شاری ستۆکهۆڵم هەڵبژێردراوە و دەورەیەکیش وەک موشاور و ڕاوێژکاری بەرپرسی گشتیی لاوان لە دەورەی وڵات لەلایەن بەرپرسی ئەوکات بەڕێز کاک ڕەحیم ڕەشیدی دیاری کراوە.
ئێستا ماوەی نزیک بە یەک ساڵە سۆران سەقزی سەرقاڵی ئامادە کردنی پڕۆژەێکی گەورەی تلویزیۆنییە کە لە 30 وڵاتی جیاوازی جیهان، ئامادە ئەکرێت و بڕیار وایە لە داهاتوویەکی نزیکدا بڵاو بکرێتەوه. شایەنی باسە ئەم بەرنامە تلویزیۆنییە کە بە یەکێک لە پڕخەرجترین بەرنامەکانی مێژووی تلویزیۆنە کوردییەکان دادەنرێت، بەرنامەیەکی گەشتیاریی و تەفریحی و سەرنج ڕاکێشە کە لە پێنج قاڕەی جیهان ئامادە کراوە و هەنووکە لە قۆناغەکانی کۆتایی خۆی نزیک بوەتەوە.
لە کۆتاییدا ماوەتەوە بڵێین کە ئێستا کاک سۆران سەقزی:
وتەبێژی تەریقەتی قادری سۆڵەیی لەدەرەوەی وڵاته
ئەندامی ڕێکخراوەی میراتگرانی سوڵتان سەڵاحەدینی ئەیووبییه
ئەندامی حیزبی دێمۆکڕاتی ڕۆژهەڵاتی کوردستانه
ئەندامی یەکیەتی لاوانی دێمۆکڕاتی کوردستانه
ئەندامی حیزبی سۆسیال دێمۆکراتی سویدە