ئاوایی کاشتەر یەکێک لە ئاواییەکانی سەر جادەی کامیاران مەریوانە کە لە نێوان ئاواییەکانی "بزوەش" و "وێزیەر"دا هەڵکەوتووە. ئاواییەکە پاڵی داوە بە کێوی "کوچک چەرموو"ەوە کە لە ناوچەی بێڵەواردا بەناوبانگە و دیوی پشتەوەی کوچک چەرمووش دەبێ بە ناوچەی ژاوەرۆ. لەبەر ئەوە لەم ئاواییەدا مەرقەد و شەخسی "ئەسحابە کاشە" هەڵکەوتووە و زۆربەی بنەماڵە دانیشتووەکانی ئەم ئاواییە ڕۆحانین و خاوەنی تەکیە و خانەقا بوون لە زۆر کۆنەوە خەڵکی لێیان خوێندووە و دەیان کەسی ناودار لەم ئاواییە هەڵکەوتوون کە دەتوانین لە هەرناودارەکانیان "بابا مردخ ڕۆحانی"، "عەلائەدین سجادی" و شاعیری ناودار "حەریق"و... ناوبەرین.