رۆژ شەممە 19 مانگ 4 کونگرەێ فدراسیون یارسانیەکان لە شار ئوستکوڵم وڵات سوید وە بەشداری نمایندەێ ئەکسەر ئەنجومەنە یارسانیەکان لە وڵات سوید وەڕێوە چی. هەر لەیوا نمایندەێ بەشێک لە ئەنجومەنگەل یارسانی لە وڵاتگل سکاندیناڤیا لەی کونگرە وە داوەت ڕەسمی فدراسیون بەشدار بین. کونگرە ساعەت 10 دەس وەکارەکان خوێ کرد. لە ئەبتداێ بەرنامە سەید حوشمەت فەرهنوش سەخەنگو فدراسیون یارسان ڕاپورت کار و فعالیەتەکان
ساڵ گوزەشتەێ فدراسیون پێشکەش کرد و لەی ڕابتە ئشارە وە دەیان فعالیەت هونەری، وەرزشی و ئاینی کرد کە فدراسیون لە مودەت 1 ساڵ گوزەشتە ئنجامێ داگە. سەید حوشمەت باس لە بەشداری مەردوم و پشتیوانی ئەنجومەنەکان سوید کرد و لەی ڕابتە ئشارە کرد کە فدراسیون لە زەمان سەرهەڵدانێ کە 8 ئەنجومن بی، ئیسە زیاتر لە 20 ئەنجومەن لە ژێر چەتر ئەنجومەن فعالیەت کەێت.
لە بەشێکتر سەید حوشمەت ئەڕا ئایندەێ فدراسیون ئارەزو داشت کە ئی فدراسیونە تەنها فعالیەتەکانێ لە سوید تەسک نەکەێتوە و بووتە فدراسیون سەراسەری ئسکەندیناڤیا. لەی بارەوە هەوڵ ئەرا بەحس و گوفتوگو وەگەرد ئەنجومەنەکان لە وڵاتگەل دانمارک، نرویژ و فنلەند دریاگە و فرە لە ئەنجومەنەکان پشتیووانی خویان دەربڕیگنە. سەید حوشمەت داوا لە مەسئولین و نمایندەگان ئایندەێ ئی فدراسیونە کرد کە لە زویترین وەخت لەی وڵاتگەلە دیدار بکریەت و پشتیووانی مەردوم و ئەنجومەنەکان وە شێوەێ ڕەسمی وەربگیریەت.
ڕاپورت لە لایەن مەردوم کەفتە وەر باس و گوفتوگو و لەی بارەوە مەردوم دەس خستنە سەر خاڵە لاواز و وەقەوەتەکان ئی ڕاپورتە و سوئاڵگەل فرەێک لە لایەن بەشدارەیلوە مەترەح کریا کە سەید حوشمەت جواو وەپێدا. بەشدارەیل پێشنەهادەیل فرەێک مەترەحکردن ئەڕا دروسکردن و خاسترکردن کارەکان فدراسیون.
کاک عەلی مهرابی جور ڕابت فدراسیون و مسئول بەشێک لە کارەکان فدراسیون لە تەکمیل کردن قسەکان سەید حوشمەت ئشارە وە بڕێکتر لە فعالیەتەکان فدراسیون کرد جور کاپ فوتباڵ، گرتن کونسرت ئەڕا هونەرمەندەیل، گرتن شەو شعر، گرتن خاوەنکار، گرتن نەوروز و فرە فعالیەتتر. کاک عەلی باس لە تەماسگرتن فدراسیون وەگەر ناوەندگەل حقوقی و حکومی و بەشردوستی ئەڕا ناساندن کەیس یارسانی و موشکڵات مەردوم یارسان لە ئێران. موشکڵات پەناهندەگەیل یارسان یەکیکتر لەو باسگەلە بی کە کاک ئەلی باس لەلێکرد و وەت لەی بارەوە ئەوان ئەڕا ناساندن زوڵم و زۆر جمهوری ئسلامی لەی مەردومە وەگوش مقامات سوید هەوڵ فرەێک داگنە و خوشوەختانە فرەیچ سەرکەفتگ بینە.
کاک سەلیم جور مەسئول بەش ماڵی ڕاپورت بەش ماڵی پێشکەشکرد و تەمام ئەو کومەکگەلە کە وە فدراسیون کریاوی ئشارە وەپێیانکرد و تەمام ئەو پویلگەلە کە فدراسیون لەی مدت 1 ساڵە خەرج کردوی ئەڕا فعالیەتە جوراوجورەکان دەستنیشانکرد. هیئەت نزارەتگەر وەسەر کارەکان فدراسیون کە پێکهاتووی لە 3 نەفەر دووای تاوتوویکردن بەڵگەکان و خەرج و مەخارجەکان ڕاپورتەکە تەسویبکردن و لەی بارەوە هیچ موشکڵێک یان ناڕوشنی لە بەش ئقتسادی لە کارەکان فدراسیون نەینوە.
لە بەشێک لە کونگرەکە سەفەر ئەزیزی جور نمایندەێ ئەنجومەنگەل دانمارک دوواێ سوپاس و قەدردانی لە داوەت کردن نمایندەگەل ئەنجومەنگەل یارسانی لە دانمارک ئەڕا ئی کونگرە، باسێک گشتی لە نیەت بەشداربین هەیئەت دانمارک کرد و ئومێدەواری خواست کە فدراسیون یارسان لە سوید پەرە بسێنێت بووتە فدراسیون سەراسەری لە تەمام ئیسکاندیناڤیا و ئەڕا زیاتر ناساندن کلتور، ئایین و فەرهەنگ یارسان نەقش ئەساسی لەی وڵاتگەلە بازی بکەێت. ئەنجومەنگەل فەرهەنگی یارسان لە دانمارک تەمام تەڵاش خوێان ئەڕا هاوکاری و هاوفکری فدراسیون یارسان لە سوید خەنە گڕ و گشت تەڵاشێک کەن تا فدراسیونێک مونسەجم و یەکگرتگ لە تەمام ئیسکاندیناڤیا دروست بکریەت. لە ئاخر قسەکان سەفەر ئشارە کرد کە هەدەف ئەسڵی لە بەشداربین وەرگرتن تەجروبە و ڕاهنمایی لە کار و فعالیەتەکان فدراسیونە.
لە بەش دووم کونگرە هەڵوژاردن سوخەنگو، مسئول بەش ماڵی و هێئەت ئجرایی دەست وەپێکرد.
سەید حوشمەت فەرەهنوش جور سوخەنگو و کاک قەنبەر جور بەش ماڵی وەدەنگ ئەکسەریت هەڵوژێریان و دویاوەدویاێ ئەوە هێئەت ئجرایی لە ئنتخاباتێک ئازاد هەڵوژێریا کە پێکهاتووی لە:
1 شوان جوانمیری
2 مهناز ڕوستەمی
3 شەمسە نریمانی
4 بیژەن ئومێدی
5 فەرەهناز نەجەفی
6 ئەلی ڕەزایی
7 توبا بهنەری
8 توبا ڕەزایی
9.حاجی اکبری
10.مهرداد ئەحمەدی
لە ئاخر کونگرە 3 نەفەر جور نەزارەتگەر وەسەر کار و فعالیەتەکان فدراسیون هەڵوژێریان کە پێکهاتووی لە:
1 بەرزو ئەحمەدی
2 سەید بەرزو
3موستەفا ئەکبەری
کونگرە وە موەفقیت تەمام کوتایی وە کارەکان خوێ هاورد.
فدراسیون سەراسەری یارسانیەکان لە وڵات سوید
19-05-2012