عیماد ئەحمەد جێگری سەرۆکی حکومەتی هەرێم ئەمڕۆ پێنچشەممە بەشداریی کرد لە دانانی بەردی بناغەی پرۆژەی کۆمەڵگەی شیراتۆنی جیهانی لە شاری سلێمانی و لە وتارێکدا ڕایگەیاند کە لە ژێر سایەی یاسای وەبەرهێنان، تەنها لە سلێمانی 225 پرۆژەی جۆراوجۆر بە سەرمایەی 10 ملیار دۆلار جێبەجێکراون.
بەپێی ڕاگەیەندراوێکی سەرۆکایەتیی ئەنجومەنی وەزیرانی هەرێمی کوردستان کە وێنەیەکی بۆ خەندان نێردراوە، عیماد ئەحمەد لە وتارەکەیدا ئاماژەی بە گرنگی یاسای وەبەرهێنان کرد کە دەرفەتی ڕەخساندووە بۆ سەرمایەداران و خاوەن کاری بیانی و ناوخۆیی تا سەرمایەکانیان لە هەرێم بخەنەگەڕ و شانبەشانی حکومەت بەشدار بن لە ئاوەدانکردنەوەی هەرێم و پێشخستنی ژێرخانی ئابووری و نیشتەجێکردن و گەشتیاری.
جێگری سەرۆکی حکومەتی هەرێمی کوردستان بە لەبەرچاوگرتنی ئەزموونی سیاسیی هەرێم، هەڵوێستەی کرد لەسەر بەرنامەی حکومەت بۆ پێشخستنی کەرتی تایبەت و بووژاندنەوە ئەو لایەنە گرنگه و وتی: بەبێ کەرتی تایبەت و وەبەرهێنەران ناتوانین هەرێمێکی پێشکەوتوو بهێنینە کایەوە، لەبەر ئەوە هەمیشە حکومەت هەوڵی داوە کارئاسانی بۆ سەرمایەداران بکات تا سەرمایەکانیان لە پرۆژە و سێکتەرە جۆراو جۆرەکاندا بخەنە گەڕ کە له و ڕووەشەوە هەنگاوی باشیان ناو توانیان خزمەتی هەرێم بکەن و تەنها لە ژێر سایەی یاسای وەبەرهێنان لە سلێمانی 225 پرۆژەی جۆراوجۆر بە سەرمایەی 10 ملیار دۆلار جێبەجێکراون کە ئەمەش خۆی لە خۆیدا دەستێکی باش بووە بۆ ئاوەدانی و ڕەخساندنی هەلی کار و گەشەپێدانی ڕەوتی ئابووری و بازرگانی و گەشتیاری."
سەبارەت بە دەستی ئاوەدانی و بوژاندنەوە ی کەرتی گەشتیاری وپیشەسازی و کشتوکاڵی و گرنگی ئەم لایەنانە بۆ هەرێم، عیماد ئەحمەد ڕایگەیاند : "ئه و سێکتەرانە لەمڕۆدا بۆ سەرچاوەی داهات و پێشخستنی لایەنە ژیارییەکان و ڕەخساندنی هەلی کار گرنگن، بۆیە حکومەت پلانی ستراتیژیی درێژخایەنی دانا بۆ بوژاندنەوەی ئەم لایەنانه و پێشخستنی، چونکە هەرێمی کوردستان لە ڕووی هەڵکەوتەی شوێن و جوگرافییەوە لەبارە بۆ هەرێمێکی گەشتیاری و پێشخستنی کەرتەکانی کشتوکاڵ و پیشەسازی کە بۆ ئەوەش پێویستمان بە هاوکاریی زیاتری سەرمایەداران هەیە تا بتوانین هەرێمەکەمان زیاتر پێشبخەین و ئاوەدانتری بکەینەوە."
هاوکات جێگری سەرۆکی حکومەت بنیادنانی پرۆژەی (کۆمەڵگەی شیراتۆنی جیهانیی لە سێمانی بە هەنگاوێکی گرنگی وەسفکرد بۆ پێشخستنی کەرتی گەشتیاری و ئابووری و ڕەخساندی هەلی کاری زیاتر لە سلێمانی و داوای لە وەبەرهێنەرانیش کرد کاری باشتر و هەنگاوی جدی تر بنێن بۆ خزمەتکردنی شارەکەیان.
پرۆژەی کۆمەڵگەی شیراتۆنی جیهانی لە چەند پرۆژەیەکی گەشتیاری و بازرگانی و نیشتەجێکردن کە بە سەرمایەی کەرتی تایبەت بەبری 1 ملیار دۆلار بنیاد دەنرێت و پێکهاتووە لە دوو هۆتێلی پێنج ئەستێرەیی و 3 ئەستێرەیی و چەند تاوەرێکی بازرگانی و نیشتەجێکردن و باڵەخانەی خزمەتگوزاری و ڕیستۆرانت و مۆڵ کە لەسەر ڕووبەری نزیکەی 190 دۆنم زووی جێبەجێدەکرێت.
هەر لە شاری سلێمانی و لە بینای پارێزگای سلێمانی عیماد ئەحمەد جێگری سەرۆکی حکومەتی هەرێمی کوردستان بەشداریی کرد لە ڕێورەسمی ئیمزاکردنی گرێبەستی پرۆژەی ڕیسایکلینی خۆڵ و خاشاکی سلێمانی کە لەلایەن بەهرۆز محەمەد ساڵح پارێزگاری سلێمانی و هەردوو کۆمپانیای (لافارج) ی فەرەنسی و گرپی کۆمپانیاکانی فاروق بەرێوەچوو.
- 07-11-2013