بەهۆی کیمیارانی هەڵەبجەوە، نزیکەی "15000 کەس شەهیدو برینداربوون،" 112خوێندنگا، 32نەخۆشخانە، 216 گوندیش بە تەواوەتی وێرانکران جگە لە کاولکردنی شارەکه و 4 ناحیەی.
سلێمانی،ئاوێنەنیوز: ڕاگەیاندنی پارێزگاری سلێمانی ئەمڕۆ (یەک شەممە) بڵاویکردەوە لە16ی ئازاری 1988، ڕژێمی بەعسی عیراق، قەزای هەڵەبجەی سەر بەپارێزگای سلێمانی بە چەکی قەدەغەکراوی کیمیاوی بۆردومان کرد، "به و هۆیەوە 5 هەزار هاووڵاتی ئه و شارە شەهید بوون و زیاتر لە 10 هەزار هاوڵاتی تریش برنیدار بوون."
هەروەک دەڵێت، "جگەله و زیانە زۆرە گیانییە، ڕژێمی عیراق قەزاکەی بە تەواوتی وێران کردو دانیشتوانی ناوچەکەی ڕاگواست و سەرجەم ناحیه و گوندەکانی خاپور کرد."
مەحمود عوسمان، بەرێوەبەری ئاماری سلێمانی، دەڵێت، "ساڵی 1988 قەزای هەڵەبجە، بەخۆی و ناحیەکانییەوە (سیروان، خورماڵ، بیارە، سەیدسادق) و سەرجەم گوندەکانی بە ڕێژەی 100% وێران کرا، 24804 هەزار بینا و خانووی ئه و قەزایە لەگەڵ خاکدا یەکسان کرا، کە 22 هەزار بینایان شوێنی نیشتەجێ بوون بوو."
هەروەک دەڵێت، 112 خوێندنگه و 32 نەخۆشخانه و بنکەی تەندروستی، 216 گوند بە تەواوەتی وێران کران، خزمەتگوزارییەکانی وەک : کارەبا، ئاو، فەرمانگە حکومییەکان، ڕێگەوبان، بە تەواوتی نەمان و لە ناوبران.
مەحمود عوسمان ڕونیکردۆتەوە،139472 هەزار کەس، کە دانیشتووی ناوچەکە بوون ئاوارە و دەربەدەربوون و ڕاگوێزران.
دوای ڕاپەڕینی بەهاری 1991ی خەڵکی کوردستان، ناوچەکە لە ڕژێمی ڕووخاوی بەغداد پاک کرایەوە، بەڵام تا ساڵانێکی دواتریش خزمتەگوزاریە پێویستەکان نەگەیەندرایە ناوچەکە بەهۆی شەڕی ناوخۆی نێوان پارتی دیموکراتی کوردستان و یەکێتی نیشتمانی کوردستان، یەکێتی و بزوتنەوەی ئیسلامی، یەکێتی و جوندالئیسلام.
لە ڕاگەیەندراوەکەی پارێزگاری سلێمانیدا هاتووە، لە ئێستادا جگەلە شاری هەڵەبجە وەک ناوەندی قەزای هەڵەبجە، ناحیەکانی سیروان، خورماڵ، بیارە و 124 گوند ئاوەدان کراونەتەوە لەگەڵ قەزای سەیدسادق و 28 گوندی سەر به و قەزایە.تەنیا لە قەزای هەڵەبجە 25،872 بینا دروستکراوە کە 20 هەزاریان نیشتەجێ بوونە، لە قەزای سەیدسادقیش 19 هەزار بینا دروستکراوەوەتەوە.
هەروەک دەڵێت، دانیشتوانی ئێستای قەزای هەڵەبجە جگەلە قەزای سەیدسادق کە پێشتر پێکەوەبوون، زیاتر لە 104 هەزار کەسە، 101 فەرمانگەی حکومی لە قەزاکەدا دروستکراوەوە. لە ساڵی 1988دا سەرجەم خوێندنگەکانی ناوچەکە کە ژمارەیان 112 خوێندنگە بووە لەگەڵ خاکدا تەخت کراو بوون، ئێستا 126 خوێندنگە دروستکراوەتەوە، هاوکات زانکۆیەک و 2 پەیمانگەش لە شاری هەڵەبجە دروستکراوە.
له و ڕاگەیەندراوەدا هاتووە، تەنیا لە قەزای هەڵەبجەی ئێستا 52 نەخۆشخانه و بنکەی تەندروستی دروستکراوە کە پێشتر بە قەزای سەیدسادقی ئێستاشەوە 32 دانە بوون و لە ساڵی 1988دا سەرجەمیان کاولکرابوون.
هەروەک دەڵێت:
هەژاری لەناوچەکەدا 2،4% ە کە کەمترین ڕێژەی عیراقە.
بێکاری بۆ ئه و کەسانەی تەمەنیان لە 15 ساڵ بەره و سەرەوەیە 15،7%ە.
تێکڕای خەرجی تاک لە مانگێکدا لە قەزای هەڵەبجە 406 هەزار دینارە.
86% هەموو خێزانەکان خانوونی تایبەتی خۆیان هەیە.
- 16-03-2014