77%ی پەرلەمانتارانی کوردستان فۆرمی ئاشکراکردنی سەروەت و سامانیان پڕکردۆتەوە.
هەولێر، ئاوێنەنیوز: ئەحمەد ئەنوەر، سەرۆکی دەستەی نەزاهەی هەرێمی کوردستان لەکۆنگرەیەکی رۆژنامەوانیدا ئەمڕۆ(دوو شەممە) رایگەیاند، تائێستا 77%ی ئەندامانی پەرلەمانی کوردستان فۆرمی ئاشکراکردنی سەروەت و سامانیان پڕکردۆتەوە و فۆرمەکانیشیان گەڕاندوەتەوە بۆ دەستەکە.
پێشتر دەستەکە 1080 فۆرمی بەسەر دامەزراوەکانی دەسەڵاتی دادوەریی، سەرۆکایەتی هەرێمی کوردستان و پەرلەمانتاراندا دابەشکردبوو بۆ ئەوەی سامانی خۆیان ئاشکرا بکەن.
سەرۆکی دەستەی نەزاهە ئەوەشی خستەڕو کە تائێستا 86 پەرلەمانتار فۆرمەکانیان گەڕاندۆتەوه و ئه و ژمارەیەش دەکاتە رێژەی 77%ی پەرلەمانتاران.
ناوبراو رونیشیکردەوە، جگە لە 111 پەرلەمانتار، 56 فۆرمیان بەسەر راوێژکارندا دابەشکردوە،تائێستا 31 راوێژکار فۆرمەکەیان گەڕاندۆتەوە.
سەبارەت بە دەسەڵاتی دادوەریش، ئەحەمەد ئەنورە وتی، 753 فۆرمیان بەسەر دەسەڵاتی دادوەریدا دابەشکردوە و سەرجەم فۆرمەکان گەڕێنراونەتەوە.
ئاماژەی بەوەشکرد کە لە کۆی 1080 فۆرمی دابەشکراو، 874 دانەیەیان بە پڕ کراوەیی گەڕێنراونەتەوە.
وتیشی، ئه و کارە هەنگاوێکی زۆر باشە، بۆ یەکەمین جارە کارێکی له و شێوە لە هەرێمی کوردستان دەکرێت، پێشبینی دەکەن تا کۆتای ئەم مانگە سەرجەم فۆرمەکان بگەڕێنرێنەوە.
- 13-05-2014