بە سەرپەرشتیی مەسعود بارزانی سەرۆکی هەرێمی کوردستان بە ئامادەبوونی کۆسرەت ڕەسوڵ عەلی جێگری سەرۆک ڕۆژی دووشەممە 20ـی 4ـی 2015 لە سەلاحەدین بە مەبەستی ڕاگۆڕینەوە و بەدواداچوون و شێکردنەوەی پرسە هەنوکەییەکانی هەرێمی کوردستان کۆبوونەوەی هێزە کوردستانییەکان بەڕێوە چوو.
کۆبوونەوەکە بە مەبەستی تاوتوێکردن و ئاڵۆگۆڕکردنی بیروڕا بوو لەبارەی شەڕی تیرۆریستانی داعش و سەرکەوتنەکانی پێشمەرگە و هەروەها بارودۆخی سیاسیی کوردستان و عێراق و سەردانە چاوەڕوانکراوەکەی سەرۆک بۆ ویلایەتە یەکگرتووەکانی ئەمەریکا و هەروەها ئامانج و ناوەڕۆکی نامەکەی سەرۆکی هەرێم بۆ پارلەمان و حکوومەت و لایەنە سیاسییەکان و خستنەڕووی بۆچوونی لایەنەکان لەبارەی دەستوور و پرسی سەرۆکایەتیی.
لە سەرەتای کۆبوونەوەکەدا سەرۆکی هەرێم ئامادەبووانی کۆبوونەوەکەی لە دوایین ڕەوشی بەرەکانی شەڕ و بارودۆخی مەیدانیی بەرەکان و سەرکەوتنەکانی پێشمەرگە و دۆخی ناوچە ئازادکراوەکان ئاگادار کردەوە. لە بەشێکی دیکەی کۆبوونەوەکە سەرۆکی هەرێمی کوردستان باسی ئەو نامەیەی کرد کە ئاراستەی پارلەمان و حکوومەت و لایەنە سیاسییەکانی کوردستانی کردبوو و ئەوەی خستەڕوو کە ئەم نامەیە ئاراستەی هەموو لایەک و هەموو تاکێکی کورد کراوە و داوایشی کرد کە هەموو لایەنەکان کار بۆ ئەوە بکەن کە لە ڕاگەیاندنەکاندا بانگەشە بۆ گرژی و پەرتەوازەیی نەکرێت. هەروەها بۆچوونی خۆی لە بارەی پرسی دەستوور و سەرۆکایەتی بۆ لایەنە بەشداربووانی کۆبوونەوەکە شیکردەوە و ئاماژەی بەوەدا کە بەر لە دووساڵ لە نامەیەکدا داوای لە سەرۆکایەتیی پارلەمان و لایەنەکان کردبوو کە بە زووترین کات لەسەر مەسەلەی دەستوور و ئالیەتی هەڵبژاردنی سەرۆک بگەنە ئەنجامێک و ئێستایش با پارلەمان و لایەنەکان بگەنە چارەسەر و دەستوور بگەینرێتە قۆناغی ڕاپرسی. سەرۆکی هەرێمی کوردستان داوایشی کرد دەستوور بۆ گەل و وڵاتە و پێویستە بە گیانێکی نیشتیمانی و دوور لە موزایەدات چارەسەر بکرێت و پەیوەست بە مەسەلەی سەرۆکایەتی ئەوەی باس کرد کە بابەتەکە لای لایەنە سیاسییەکانە و با پێکەوە بگەنە ڕێککەوتن و بڕیار لەسەر مەسەلەی سەرۆکایەتی بدەن. دواتریش داوای لە ئامادەبووان کرد کە سەرنج و پێشنیارکانی خۆیان لەبارەی شەڕی داعش و ئازادکردنی موسل و ئەجێندای سەردانەکەی سەرۆکی هەرێم و پرسە هەنووکەییەکانی هەرێم و مەسەلەی دەستوور و سەرۆکایەتیی هەرێم بخەنە ڕوو. دوای گفتوگۆیەکی تیروتەسەل لایەنە بەشداربووەکانی کۆبوونەوەکە بەم
ئەنجامانەی خوارەوە گەییشتن:
یەکەم: بەشداربووانی کۆبوونەوەکە قوربانیدان و گیانفیدایی هێزی پێشمەرگەی کوردستانی بۆ پاراستنی خاک و ژیانی هاووڵاتیان و پێکهاتە نەتەوەیی و ئایینییەکان بەرز نرخاند و جەختیان لە پاڵپشتیکردنی بەردەوامی هێزی پێشمەرگە و یەکخستن و بەهێزکردنی توانا سەربازییەکانی پێشمەرگە و هەروەها باشترکردنی باری گوزەرانی پێشمەرگە قارەمانەکان کردەوە. هەروەها بەشداربووانی کۆبوونەوەکە هەوڵەکانی سەرۆکی هەرێمیان لە سەرپەرشتیکردن و ئامادەبوونی لە بەرەکانی شەڕ و پشتیوانیکردنی هێزی پێشمەرگە بەرز نرخاند و سوپاسی هێزی هاوپەیمانان و دۆستانی گەلی کوردستانیان کرد کە هاوکاریی سەربازییان پێشکەشی گەلی کوردستان و هێزی پێشمەرگە کردووە.
دووەم: کۆبوونەوەکە وێڕای لەبەرچاوگرتنی بارودۆخی هەستیار و چارەنووسساز کە کوردستان و عێراق و ناوچەکە پێیدا تێدەپەێت، جەختی لە پاراستنی یەکڕیزیی هێزە لایەنە سیاسییەکان کردەوە وەک زامنێک بۆ مسۆگەرکردنی سەرکەوتنەکانی گەلی کوردستان و پاراستنی دەستکەوتەکان و هەروەها لایەنە سیاسییەکانی بەشداربووی کۆبوونەوەکە تەئکیدیشیان لە مافە ڕەواکانی گەلی کوردستان کردەوە و پاڵپشتیی خۆیشیان بۆ هەموو ئەو هەنگاوانە نیشاندا کە بە ئاراستەی مسۆگەرکردنی مافەکانی گەلی کوردستان و پاراستنی دەستکەوتەکان و پێشڤەچوونی دۆزی ڕەوای گەلی کوردستان دەنرێت. لە تەک ئەوەیشدا بە پێویستیان زانی هەوڵەکانی لایەنە سیاسییەکان و دامودەزگەی حکوومەتی هەرێمی کوردستان بۆ چاکسازی و نەهێشتنی کەموکوڕییەکان چڕتر بکرێتەوە.
سێیەم: بەشداربووانی کۆبوونەوەکە جەختیان لە بەردەوامی گفتوگۆ و باشترکردنی پەیوەندییەکان و جێبەجێکردنی ڕێککەوتنی نێوان هەرێم و بەغدا و هەروەها فراوانکردنی پەیوەندیی دۆستانە و هاوسەنگ لەگەڵ دراوسێکان کردەوە و ئەوەیان دووپاتکردەوە کە هەرێمی کوردستان هۆکاری سەقامگیری و بووژانەوەی ناوچەکە و ئاشتی و چارەکردنی کێشە و گرفتەکان دەبێت.
چوارەم: بەشداربووانی کۆبوونەوەکە پاڵپشتیی تەواوی خۆیان بۆ سەرۆکی هەرێم و شاندە یاوەرەکەی بۆ ئەمەریکا ڕاگەیاند و پێشنیار و بۆچوونەکانی خۆیان لەبارەی ئەجێندای ئەم سەردانە خستەڕوو.
پێنجەم: کۆبوونەوەکە وێڕای جەختکردنەوە لە پاراستنی سیادە و یەکپارچەیی خاکی هەرێمی کوردستان و کارکردن بۆ سەرخستنی پڕۆسەی یەکخستنی هێزە چەکدارەکانی هەرێم لەژێر چەتری وەزارەتی پێشمەرگە، ئەوەیشی دووپاتکردەوە کە پێویستە لایەنە سیاسییەکان کار بۆ هێورکردنەوەی ڕاگەیاندنەکان و دوورخستنەوەی ئەم نەفەسە بکەن کە دژی ئاسوودەیی هاووڵاتیان و یەکڕیزی نیشتیمانییە. کۆبوونەوەکە ڕەفزی هەموو هەوڵ و بانگەشەیەکیشی کرد بۆ سەپاندنی بۆچوونێک کە لە دەرەوەی یاسا و سەروەری و تایبەتمەندییەکانی هەرێمی کوردستانە.
شەشەم: سەبارەت بە مەسەلەی دەستوور و سەرۆکایەتیی هەرێم لایەنەکان جەختیان لەوە کردەوە دەستوور و سەرۆکایەتیی هەرێم پرسێکی نیشتیمانییە و دەبێ هەموو لایەنەکان بە نەفەسێکی نیشتیمانی و دوور لە گرژی و موزایەداتی سیاسی و ئیعلامی مامەڵەی لەگەڵدا بکرێت و دەرفەت بەو لیژنەیە بدرێت کە لە لایەن پارلەمانەوە بۆ تاوتوێکردنی دەستوور هەڵبژێردراوە و هەروەها پرسی سەرۆکایەتیش لە چوارچێوەی یاسا و کۆدەنگیی لایەنە سیاسییەکان چارەسەر بکرێت.
پارتی دیموکراتی کوردستان
یەکێتیی نیشتیمانیی کوردستان
بزووتنەوەی گۆڕان
یەکگرتووی ئیسلامیی کوردستان
کۆمەڵی ئیسلامی
حزبی سوسیالیستی کوردستان
بزووتنەوەی ئیسلامیی کوردستان
حزبی شیوعی کوردستان
حزبی زەحمەتکێشان
نوێنەری کوتلە تورکمانییەکانی پارلەمانی کوردستان
نوێنەری کوتلە مەسیحییەکانی کوردستان