لەساڵی(1965) لەشاری #خورماتوو# لەدایکبووەو خوێندنی سەرەتایی و ناوەندیی و ئامادەیی لەوشارە تەواوکردووە، دواتر لەزانکۆی سەلاحەدین کۆلێژی ئاداب-بەشی زمانی عەرەبی وەرگیراوە، هاوکات شەهید کەسێکی بنەڕەتی ڕێکخستنەکانی ی، ن، ک دەبێت لەناو شاری خورماتوو، بەلام بەهۆی ئاشکرابوونی تۆڕی ڕێکخستنەکانی ئەوشارە لەسالانی(1984-1985)و گەڕانی پیاوانی ڕژێم بەدوای شەهید دڵشادو هاوڕێکانیدا، کاکە دڵشاد دەست لەخوێندن هەڵدەگرێت و پەیوەندی بەهێزی پێشمەرگەی کوردستانەوە دەکات لەسنووری تیپی(51)ی #گەرمیان#، هەرچەندە زۆر هەوڵی لەگەڵ دەدەن کە واز لەسیاسەت بهێنێت و درێژە بەخوێندن بدات، بەلام ئەو سووردەبێت لەسەر بیروباوەڕەکەی.
بنەماڵەکەی شەهید دڵشاد یەکێکە لەبنەماڵە ناودارەکانی شاری خورماتوو، تەنانەت لەناو تورکمان و عەرەب و سەرجەم نەتەوەکانی ئەو دەڤەرە زۆر بەحورمەتەوە باسیان لێوەدەکرێت، باوکی شەهید دڵشاد (حاجی عەبدولکەریم سەفەر ئاغا) یەکێک بووە لەکەسە شۆڕشگێرو ناودارەکانی شاری خورماتوو و بەبەردەوامی دانەبڕاون لەخەبات و بەشداریکردن لەشۆڕشەکانی کورد، کاکە دڵشاد-یش لەسەر هەمان بیروباوەڕ بووەو پیاوێکی تێکۆشەرو کادرێکی هەڵسوڕاو بەئەزموون و بەتواناو کارگێڕی مەڵبەندی (16)ی ڕێکخستنی حەمرینی ی.ن.ک و کەسایەتییەکی ناسراوی شاری خورماتوو و سنووری گەرمیان بووە بەگشتیی، جوامێرو ئازاو چاونەترس و بەبەردەوامیش لەهەوڵداندا بوو بۆ خزمەتکردنی دەڤەرەکەی بە(کوردو تورکمان و عەرەب)ەوە بەبێ جیاوازی و زۆربەی کاتەکانی خۆی تەرخانکردبوو بۆ خزمەتکردنی خەڵکی شاری خورماتوو بەگشتیی و سنووری مەڵبەندی حەمرین بەتایبەتی.
بەداخەوە لەسەعات(7:25)ی ئێوارەی ڕۆژی(03-06-2008)و لەنزیک گۆڕستانی گەورەی شاری خورماتوو، لەگەڵ کاکە ناسیح موسای هاوڕێی بەدەستی ناحەزانی دیموکراسی تیرۆرو شەهیدکران.