نوسینی: ئاراس ئیلنجاغی
بەووتەیەکی حەمە چاوشین دەست پێدەکەم کە لەنامەیەکدا بیۆگرافیای خۆی بۆ نوسیووم و دەڵێت" بەڕاستی ژیانی پێشمەرگایەتی بەقسەوبەنوسین ئاسانە بۆ ئەو کەسەی کە دەیخوێنێتەوە،چونکە هەرچی ناخۆشی هەیە لەژیانی مرۆڤ بەقەد ژیانی پێشمەرگایەتی ناخۆش نیە،بەڵام یەک ڕاستی هەیە ئەویش سەربەرزیە"، ژیاننامە لەزاری خۆتەوە وێستگەکانی ژیانت ڕاست و دروستر دەدات بەدەستەوە، بەڵام بۆ ئەو کەسەی خاسیەتی ئەوەی نەبێت بەشان وباڵی خۆی هەڵبدات، هەندێ کەلێن دەهێلێتەوە، وەک ئەوەی حەمە چاوشین نەینوسیوە کەساڵی (1968) لەباڵی مەکتەب سیاسی پارتی دیموکراتی کوردستان پێشمەرگەیەکی تەمەن(16)ساڵان بووە لەشارۆچکەی (تەقتەق)لەهەموو هاوسەنگەرانی مناڵتربووە کە چویتە ڕیزەکانی پێشمەرگە.
ناوی تەواوی (محەمەد ئەحمەد حەمەد ڕەسول مەلاک ئیلنجاغی) ناسراو بە (حەمە چاوشین)،لەساڵی(1951) لەبنەماڵەیەکی نیشتمانپەروەری و کوردپەروەری زەحمەتکێشی دایک وباوک بن داسنی لە گوندی ئیلنجاغی گەورەی شێخانیانی سەربەشارۆچکەی تەقتەقی قەزای کۆیە چاوی بەژیان هەڵهێناوە.
لە ئیلنجاغی گەورەوە چوویتە بەرخوێندن و تاوەکو پۆلی سێەمی ناوەندی خوێندووە،گەنجێکی چوست وچاڵاک بووە و زوو خۆی گەیاندۆتە ڕیزەکانی پێشمەرگایەتی لەشۆڕشی ئەیلول وساڵی(1968) لەتەمەنی (16)ساڵیەوە لەباڵی مەکتەبی سیاسی چەکی هەڵگرتووە، و بەردەوام دەبێت تاوەکو ساڵی(1970)، بەهۆی ئەوەی جێگەی متمانەی ڕێکخستنەکانی(کۆمەڵەی مارکسی لینینی کوردستان)بووە، لەساڵی(1976) لەلایەن(ئەنوەر نادر خدر ئیلنجاغی و مەلاقادری ِێکخستنی ئۆمەرگومبەتی) لە ڕێکخستنەکانی کۆمەڵەی ناوبراو ڕێکدەخرێت.
لەکۆتایی ساڵی(1981) پەیوەندی دەکات بە(هێزی دەشتی هەولێر) لەکەرتی(2) لەلای (شەهید ئەحمەد قەمبەری) چەکی پیشمەرگایەتی دەکاتە شان، قارەمانانە بەشداری چاڵاکیەکانی سنوری تیپی 86ی دەشتی هەولێری کردووە لەقەراج و کەندێناوەو شەمامک و ڕێگەی نێوان هەولێر-کەرکوک و هەولێر -کۆیەو خۆشناوەتی وبناری سەفین و دێدەوان وهەیبەسولتان و باواجی و کەلکەسماق وتەکەڵتو و گۆرقەرەج و دەشتی کۆیەو دزەیی و دەشتە زێکردەکانی شێخ بزێنی وتەقتەق وقوشەتەپەوپردێ، لەبەرچاپووکی زوو کراوەتە(فەرماندەی مەفرەزە) لە هەمان تیپ، یەکەم مەفرەزەی یەکێتی نیشتمانی کوردستان بووە لەسنوری کەندێناوە(ئاڕپێچی) بگرنە سوپاو ئەلقە لەگوێکانی ڕژێمی بەعس و ترس و دڵەڕاوکێیەکی زۆر لەدڵ و دەروونی دوژمن دروست بکەن.
بەهۆی ئازایەتی وپێشمەرگایەتی باڵی مەکتەب سیاسی وشۆڕشی نوێ (مام جەلال) زوو (حەمەچاوشین) دەناسێت، هەندێکجار چاڵاکیە سەرکێشیەکانی(حەمەچاوشین) بووە بەمایەی نیگەرانی (مام جەلال)، بەتایبەت لەوکاتانەی(ئەحمەد کوردە) فەرماندەی کەرتەکەی بووە، ئەحمەد کوردە ئەمەی لە(بیرەوەری ڕۆژانی سەختی خەبات) خستۆتەڕوو، کە(مام جەلال) چەندە خۆشیویستون و ڕێزی لێگرتوون.
لەدوای گفتوگۆی ساڵی(1984) لەگەڵ پێکهێنانی (هێزی پشتگیری) و لەسەر پێشنیاری مەڵبەند(حەمەچاوشین) دەکرێتە لێپرسراوی ئەم هێزە لەسنوری گوندەکانی کێڵگەی نەوتی تەقتەق، بەردەوام دەبێت لەو جۆرە خەباتەداو ڕۆلی بەرچاوی هەبووە لە دوو داستاندا وەک (شۆڕەسواری دوژمن) بەزێن ناودەردەکات.
ئەوانیش داستانی(22-10-1986) ی گوندی ئیلنجاغی گەورە،کە هاوشانی پێشمەرگەکانی تیپی 86ی دەشتی هەولێر لە گەردی بەیانیەوە تاوەکو کاتژمێر(5)ی ئێوارە بەرامبەر ئۆپەراسیۆنی جاش و جەیشی سووپای بەعس دەبنەوە.
هەروەها سەروەریەکیتری (حەمەچاوشین)لە شەڕو داستانی ئیلنجاغی گەورەی(26-4-1987)وەک فەرماندەی (هێزی پشتگیری) دەردەکەوێت کە زۆر قارەمانانە دژی جاش وجەیش پەڵامار دەبات و عەقیدمحەمەد جبوری و سەرۆک جاش و مەفرزەخاسەکانی بەعس دەبەزێنێت،لەشەوی 26/27-4-1987 خوای گەورە کچێکی پێدەبەخشێت و بەناوی ئەم داستانەوە ناوی دەنێن(داستان)، هاوسەنگەرانی (حەمەچاوشین) شاهێدی بۆ دەدەن کە لەهیچ شەڕێکدا خۆی کرمۆڵە نەکردووە وهەردەم ڕووبەڕوو، بەپێوەوەستاو وچاونەترسانە بەسەر لێواری گوللەدا ڕۆیشتووە، لەزۆربەی شەڕەکاندا زیاتر لەچەکێکی بەکارهێناوە(کلاشینکۆف و بی کەی سی و ئارپێچی) ئەمەش گوزارشتە بۆ ئەوەی لەکاتی شەڕەکاندا بەرامبەر دوژمن هەردەم لەجولەو سەرپەرشتیکردندا بووە.
لە ئەنفالەکاندا ماوەیەک بەپارتیزانی دەمێنێتەوە و دواتر لەسەر پێشنیاری سەرکردایەتی ئەوکاتی یەکێتی نیشتمانی کوردستان(ئەوەی خاوەن خێزانە دەتوانێت بچێتەوە شار، بەو مەرجەی خیانەت نەکات)، (حەمە چاوشین) لەساڵی (1988)لەشاخەوە دەچێتەوە شار و ڕژێمی بەعس دووری دەخەنەوە بۆکۆمەڵگای زۆرەملێی(کەورگۆسک).
نهێنیەکانی شۆڕش لە سینەی هەڵدەگرێت و لەگەڵ کۆمەڵێک لە کوڕانی ڕۆژانی شاخ پەیوەندی گرێ دەدەات و دەبێتە سەرپەرشتیاری سەربازی شانە چەکدارەکانی بروسک لە کۆمەڵگای کەورگۆسک، چاوەڕێ دەکات تاوەکو جفرەی(726) لە دەنگی گەلی کوردستانەوە پێی دەگات و لەگەڵ محەمەدی برای شەهید ئاکۆ سورو کوڕانی شانەکان سەرکردایەتی پەلامارو ڕاپەڕینی کەورگۆسک دەکات و دەزگای ئەمن ومنەزەمە و بنکەی پۆلیس کۆنترۆل دەکەن وهەموو کوردە هەڵخەڵەتاوەکان بەبڕیاری (بەرەی کوردستانی) دوای بەدیلگرتنیان ئازاد دەکات و(12)ئەمنیش ڕادەستی (بەرەی کوردستانی)دەکات لەشاری هەولێر، درێژە بەڕاپەڕین دەدات و بەشداری ڕاپەڕینی شاروشارۆچکەکانی تر دەدات تا دەگاتە ڕاپەرینی شاری کەرکوکی قودسی کوردستان.
دوای ئەوەی ڕژێمی بەعس لەساڵی(1992)دەزگائیدارییەکانی خۆی لە ناوچەکانی کوردستان دەکشێنێتەوە، بەرەی کوردستانی(حەمەچاوشین) دەستنیشان دەکات بۆ بەرێوەبردنی ئیدارەی شارۆچکەی(تەقتەق) و وەک یەکەم حاکمی مەدەنی ئیدارەی کوردی دوای ڕاپەڕین لەتەقتەق دەستبەکار دەبێت تاوەکوساڵی(1995)، بەهاوکاری حزبەکوردستانیەکان توانی بنکەی پۆلیسی تەقتەق بگەرێنێتەوە وئەنجومەنی گەرەکەکان هەڵبژێرێت وهێلی تەلەفۆنی کۆیە-تەقتەق بگەیەنێت وشەوانە مەفرەزەکانی بەرە بەسەرپەرشتی خۆی ئێشکگری شاربوون و بەردی بناغەی بەربەستی خۆلی گەرەکی ڕزگاری داناو کەدواتر بووە کۆرنیشی گەشتیاری.
دوای گەڕانەوەی ناحیەی تەقتەق لەلایەن حکومەتی هەرێمەوە(حەمەچاوشین) دەکرێتە فەرماندەی فەوجی تەقتەق، ساڵی 1996دەکرێتە فەرماندەی فەوجی پاراستنی کێڵگەی نەوتی تەقتەق، دواتر دەبێتە یەکەم بەرێوەبەری(بەرێوەبەرایەتی گشتی پۆلیسی نەوت و گازی هەرێم) لەشاری سلێمانی.
چەندین خولی کادیری و پێگەیاندنی ئەفسەرانی لەژیانی پێشمەرگایەتی بینیووە، و دوا پلەی(عەمید)ی خانەنشین بووە،
حەمەچاوشین قەلەندەرێکی ڕێبازی کوردایەتی پێشمەرگایەتی بوو، بەگەواهی ئەوەی ئەو (9منداڵ)ەی لەپاش خۆی جێهێشتووە هەریەکەو لە شارو شارۆچکەو گوندو هەرەت و بنارێک لەدایکبوون چونکە ئەو دەروێشێکی کوردایەتی و پێشمەرگەیەکی شەو بەکێو بووە دژ بە داگیرکەرانی کوردستان.
بەداخەوە ئەو کەڵەمێردە خۆنەویستە دوای ئەوەی لەچەندین داستان و نەبەردیدا لەهەردوو شۆرشی ئەیلول و نوێدا (1968-2016) یەکبینە بەبەردەوامی 48ساڵ خەبات، نەخۆشی زۆری بۆ دەهێنێت و دوای ململانێیەکی دژواروسەخت، لەپێش نیوەڕۆی(29-7-2016)لە نەخۆشخانەی(پار)ی شاری هەولێر دڵەگەورەوماندووەکەی لە لێدان دەکەوێت و لە گۆڕستانی ئیلنجاغی شەهیدان بەخاک دەسپێردرێت.