کاروان ساڵحی
لەماوەی چوار ڕۆژی جەژنی قورباندا 219 منداڵ لەنەخۆشخانەکانی کەرکووک لەدایکبون و 6125 کەسیش سەردانی نەخۆشخانەکانیان کردووە، ئەوەش بەپێی ئاماری بەڕێوەبەرایەتی تەندروستی کەرکووک.
لەماوەی چوار ڕۆژی جەژندا 82 برینداری چەند ڕووداوێکی جیاواز لەنەخۆشخانەکانی کەرکووک چارەسەریان وەرگرتوه و 187 نەشتەرگەری "گەوره و بچوک" ئەنجامدراوە.
سەباح ئەمین، بەڕێوەبەری گشتی فەرمانگەی تەندروستی کەرکووک بەخەندان-ی وت کە پلانەکەیان کە بۆ چوار ڕۆژی جەژن دایان نابوو "سەرکەوتووانە" جێبەجێکراوه و له و ماوەیەدا 6125 کەس سەردانی نەخۆشخانه و بەشەکانی فریاکەوتن و دەرمانخانە ئێشکگرەکانی نێو نەخۆشخانه و بنکە تەندروستیەکانیان کردووە.
ئەوەشی خستەڕوو کە 219 منداڵ لەڕۆژانی جەژندا لەنەخۆشخانەکانی کەرکووک لەدایکبوون و لەکۆی ئه و 82 بریندارەش کەگەیەندراونەتە نەخۆشخانەکان 72یان بەڕووداوی هاتووچۆ بووە.
هاوکات سەرچاوەیەکی ئەمنی لەپۆلیسی کەرکووک کەنەیویست ناوی ئاشکرابکرێت بەخەندان-ی وت "لەهەر چوار ڕۆژی جەژندا دوو حاڵەتی کوشتن هەبووە کەیەکێکیان گەنجێکی تەمەن 17 ساڵ بووە لەبەردەم دەرگای ماڵی خۆیان کاتژمێر 1ی شه و فیشەکێکی بەخۆیەوە ناوه و خۆی کوشتووە، ئافرەتێکیش لەیەکەم ڕۆژی جەژن بەهۆی دەمەقاڵێی شۆفێرێکی تەکسی و شۆفێری ماتۆڕسکیلێک کوژرا بەناوی دونیا بابەکر ڕەسوڵ".
- 16-09-2016