دواڕۆژ، عەلی حەمەسەعید
لەمیانەی سەردانێکی ئەمڕۆیاندا بۆ پارێزگای هەڵەبجە و لێکۆڵینەوە لە کێشە و گرفتەکانی کەرتی کشتوکاڵ لەسنورەکە، بڕیاردەری لیژنەی کشتوکاڵ و ئاودێری پەرلەمانی کوردستان ڕایگەیاند نزیکەی دوو هەزار کارگە لەبوارە جۆراوجۆرەکاندا پەکیان کەوتووە.
دوابەدوای کۆبونەوەیان لەگەڵ بەرپرسانی ئیدارەی پارێزگای هەڵەبجە، خەلەف ئەحمەد بڕیاردەری لیژنەی کشتوکاڵ و ئاودێری لەپەرلەمانی کوردستان، لە کۆنگرەیەکی ڕۆژنامەوانیدا ئەوەی خستەڕوو، لەهەرێمی کوردستاندا 3800 کارگە بونیان هەیە کە بەداخەوە له و ژمارەیە نزیکەی دوو هەزاریان پەکیان کەوتووە کە دەکاتە زیاتر لە 60% کارگەکانی هەرێم کە بەشێکی زۆریان کارگەی کشتوکاڵی و پیشەسازین.
ئاماژەی بەوەشکرد، لەگەڵ ئەوەی کارگەی دۆشاوی شارەزوور بە جۆرێک لەجۆرەکان کەوتوەتەکار، بەڵام بۆ هێنانی ئه و قتووەی کە پێوستە بەرهەمەکەی تێبکرێت وەزارەتی دارایی کۆمەڵێکی زۆر کێشەی بۆ وەبەرهێنەرەکە دروستکردووە لەبری ئەوەی ئاسانکاری بۆ بکات، لەکاتێکدا حکومەتی هەرێم، ساڵانە بڕێکی زۆر باج له و کارگانە وەردەگرێت.
بڕیاردەری لیژنەی کشتوکاڵی و ئاودێری وتیشی "بەداخەوە ماوەی 12 ساڵە کارگەی ڕۆنی عەربەت پەکی کەوتووە هیچ کەس و لایەنێکی حکومی ئاوڕیان لێنەداوەتەوە لەکاتێکدا وەبەرهێنەران و کەرتی تایبەت ئامادەن جارێکی دیکە وەگەڕی بخەنەوە، بەڵام ڕۆتینات و بەربەستەکانی حکومەت بەجۆرێک زۆرن وەبەرهێنەرانیش پاشەکشەیان کردوە".
خەلەف ئەحمەد ئەوەشی خستەڕوو، بەهۆی نەدانی موچەوە هاوردەکردن کەمی کردووە و خەڵک پارەی پێ نییە، بۆیە دەبێت بەجدی وەزارەتی کشتوکاڵ و پیشەسازی و بازرگانی ئاوڕی جدی لەکارگەکان بدەنەوە و هەلی کار بۆ هەزاران بێکاری ئەم هەرێمە بڕەخسێنن، ئەوەش بە ئاسانکاریکردن بۆ وەبەرهێنەران و کەرتی تایبەت.
- 13-11-2016