دواڕۆژ، نوسینگەی هەولێر
بەپێی ئامارەکانی وەزارەتی پیشەسازی و بازرگانی لەمساڵدا زیاتر لە 37 کارگەی نوی دامەزراون زۆربەشیان لە بواری خۆراک و پاککەرەوەن.
تەیب کەژۆ، بەڕێوەبەری گەشەپێدانی پیشەسازی هەولێر بە دواڕۆژی ڕاگەیاند "قەیرانی دارایی و کەمبوونەوەی خواست لەمساڵدا بووە هۆکاری داخستنی زیاتر لە 40 کارگەی جۆراوجۆر، بەڵام هەر لەمساڵدا زیاتر لە 37 کارگەی نوێ دامەزراون و زۆربەیان لە بواری خۆراک و پاککەرەوەن".
ئه و بەڕێوبەرە گشتییە ئەوەشدەخاتەڕوو، وەزارەتی بازرگانی و پیشەسازی پلانی هەیە پشتیوانی بەرهەمە ناوخۆییەکان بکات تاوەکو کارگە داخراوەکانیش سەرلەنوێ بخرێنەوەگەڕ.
تەیب کەژۆ، ئاماژەش بەوەدەکات، زیاتر لە 34 هەزار کرێکار و کارمەند لەسەرجەم کارگە بچووک و مامناوەندی و گەورەکانی هەرێمی کوردستان کاردەکەن.
وتیشی "کارگەکانی بواری بەرهەمهێنانی بیناسازی توانیویانە زۆربەی پێداویستییە ناوخۆییەکان پڕبکەنەوە، بەڵام کارگەکانی بواری بەرهەمهێنانی خۆراک تەنها توانیویانە لە 15% پێداویستی ناوخۆ پڕبکەنەوە".
کەژۆ، ڕایدەگەیەنێت، شەڕی داعش و قەیرانی دارایی و کۆنی یاساکانی گەشەپێدانی پشەسازی لە کوردستان بونەتە هۆی کەمکردنەوەی خواستن بۆ دامەزراندنی کارگەی پیشەسازی لە هەرێم.
لەبارەی ژمارەی ئه و کارگانەی مۆڵەتیان پێدراوە، بەڕێوەبەری گەشەپێدانی پیشەسازی هەولێر وتی "تائێستا نزیکەی سێ هەزار کارگە مۆڵەتیان وەرگرتووە، بەڵام له و ژمارەیە شەش سەد تاوەکو حەوت سەدیان مۆڵەتیان وەرگرتوه و کاریان نەکردوە، ئەمەش بوەتە هۆی سستی گەشەپێدانی پیشەسازی".
ئاماژەی بەوەشکرد، ژمارەی ئه و کارگانەی کە لەلایەن بیانییەکانەوە خاوەنداریەتی دەکرێن، بریتین لە 10 کارگەی جۆراوجۆر.
- 01-12-2016