دواڕۆژ، نوسینگەی هەولێر
وتەبێژی وەزارەتی تەندروستی هۆشداری دەدات لە بارەی وازهێنان و وەرگرتنی مۆڵەتی بێ موچە لەلایەن پزیشک و کارمەندانی تەندروستی و ئاماژەبەوەدەکات، لەماوەی سێ ساڵی ڕابردودا نزیکەی 5 هەزار پزیشک و کارمەندی تەندروستی وازیان لە کارەکەیان هێناوە، یاخود مۆڵەتی بێ موچەیان وەرگرتووە.
بەپێی ئامارەکانی وەزارەتی تەندروستی حکومەتی هەرێمی کوردستان، لە هەردوو ساڵی 2014 و 2015 زیاتر لە 2 هەزار 447 پزیشک و کارمەندی تەندروستی وازیان لە کارەکانیان هێناوە، یاخود مۆڵەتی بێ موچەیان وەرگرتووە. لە ماوەی 11 مانگی ڕابردووش زیاتر لە دوو هەزار و 500 پزیشک و کارمەند وازیان لە کارەکەیان هێناوە، یاخود مۆڵەتی بێ موچەیان وەرگرتووە، له و ژمارەیەش هەزار کەسیان پزیشک بوون هەزار 500 کەسەکەی تر کارمەندی تەندروستی کارگێری و هونەری بوون.
د. خالس قادر، وتەبێژی وەزارەتی تەندروستی حکومەتی هەرێمی کوردستان بە دواڕۆژی ڕاگەیاند "ژمارەی پزیشک و کارمەندانی دابڕاو لەکارەکانیان بەهۆی وازهێنان یاخود مۆڵەتی بێ موچە بە بەراورد بە دوو ساڵی ڕابردوو دوو هێندە بووە بەهۆکاری قەیرانی دارایی و پاشەکەوتی موچە و خوێندن".
خالس قادر، هۆشداری دەدات و ئاماژەی بەوەکرد، ئەگەر دۆخەکە به و شَێوەیە بمێنێتەوە شوێنی زۆربەی ئه و کەسانە بە تایبەت پزیشکان بە چۆڵی دەمێنێتەوە و دواجار کێشەی میلاک لە وەزارەتی تەندروستی دروستدەبێت و دۆخی کەرتی تەندروستی بەره و خراپ بوون دەچێت.
ئەوەشی خستەڕوو، لەئێستادا پێدانی مۆڵەتیان بۆ پزیشک و کارمەندان سنووردار کردووە و داواشیان لە ئەنجومەنی وەزیران کردووە لە بڕی ئه و کەسانە پزیشک و کارمەندی تریان بۆ دابمەزرێنن.
وتەبێژی وەزارەتی تەندروستی وتیشی "بەشێکی زۆری ئه و پزیشک و کارمەندانەی وازیانهێناوە ڕوودەکەنە کەرتی تایبەت یاخود دەرەوەی وڵات".
- 08-12-2016