بەرپرسێکی ئەنجومەنی وەزیران ڕایدەگەیەنێت، بە ڕێککەوتنی #حکومەتی هەرێم# لەگەڵ کۆمپانیای دانە غاز دانەوەی 26 ملیار و 500 ملیۆن دۆلارە کە لەسەر هەرێمە نامێنێت، تەنها دوو ملیارو 239 ملیۆن دۆلار دەداتەوە بەو کۆمپانیایە و دەشڵێت ڕێککەوتنەکە چارەسەری بەشێکی کێشەی کارەبا کوردستان دەکات.
د. ئامانج ڕەحیم، سکرتێری ئەنجومەنی وەزیران بە دواڕۆژی ڕاگەیاند، ڕێککەوتنەکەی حکومەتی هەرێم و دانەغاز بە ڕەزامەندی هەردوولا بووە و بەهۆی ڕیککەوتنەکەشەوە حکومەتی هەرێم تەنها دوو ملیارو 239 ملیۆن دۆلار دەداتەوە بە کۆمپانیاکە، لەکاتێکدا پێشتر کۆمپانیای دانەغاز لە ڕێگەی سکاڵاوە لەبەرامبەر کاری وەبەرهێنانی نەوت و ماوەی وەستانی کارەکانی داوای 26 ملیارو 500 ملیۆن دۆلاری وەک شایستە داراییەکانی لەسەر حکومەتی هەرێم کردبوو بە ماڵ و داوای دەکرد.
ئاماژەی بەوەشکرد، هەر بە پێی ڕێککەوتنەکەی پێشوو بڕیاربوو سوتەمەنی بۆ هەر دوو وێستگەی بەرهەمهێنانی کارەبا چەمچەماڵ و هەولێر دابین بکرێت، بەڵام بەهۆی قەیرانی دارایی حکومەت نەیتوانی لەگەڵ کۆمپانیایەکە بەپێی ڕێککەوتنەکە بەردەوام بێت، بۆیە دابینکردنی سوتەمەنیش بۆ دوو وێستگەی کارەباکە ڕاگیرا، بەڵام لە دوای ئه و ڕێککەوتنە تازەیە ئەم کێشەیەش چارەسەر دەبێت و بەمەش کێشەی کەمی بەرهەمهێنانی کارەبا لە هەرێم بەشێکی زۆری چارەسەر دەبێت، چونکە بەپێی ڕێککەوتنەکە دەبێت کۆمپانیای دانەغاز هەمان بەرنامەی پێشوو جێبەجێ دەکاتەوە.
پێشتر بەپێی ڕێککەوتنێک کە ساڵی2007 لە نێوان حکومەتی هەرێم و کۆمپانیای دانەغازی ئیماراتی واژۆکرابوو، بڕیاربوو کۆمپانیای ناوبراو بەرهەمهێنانی لە کەرتی نەوت و غاز بکات و سومەتەنیش بۆ ویستگەکانی کارەبای هەرێم دابین بکات، لەبەرامبەریشدا حکومەتی هەرێم شاییستە داراییەکانی بە کۆمپانیەکە بدات، بەڵام بەهۆی پێنەدانی شایستە داراییەکانەوە لە لایەن حکومەتی هەرێم کۆمپانیای دانەغاز لە دادگای نێودەوڵەتی ساکاڵای یاسایی تۆمار کردو داوای پارەکانی کردەوە.
رۆژی چوارشەممە 30ی ئابی2017، حکومەتی هەرێم و کۆمپانیای داناغاز ڕێککەوتنێکی تازەیان واژۆکردو، بەپێی ڕێککەوتنەکە دانەغاز لەبری ئه و 26 ملیارو 500 ملیۆن دۆلارەی داوای دەکرد، تەنها دوو ملیارو 239 ملیۆن دۆلاری پێدەدرێت، لەگەڵ چەند ئیمتیازێکی دیکە.[1]
31-08-2017