بەداخ و پەژارەیەکی زۆرەوە ئەمڕۆ لە شاری #ڕانیە#ی دەروازەی ڕاپەڕین جارێکی تر لە ئەنجامی تەقەکردن لە خۆپیشاندەران، 5 هاوڵاتی شەهید بون و، ژمارەیەکی زۆری تریش هەر لەم شارە خۆشەویستە و شارەکانی تر بە تایبەت شاری کۆیە، بریندار بون.
لە هەمان کاتدا ئەمشه و هێزێکی ئەمنی هەڵی کوتاوەتە سەر دامەزراوەی ئێن ئار تی و، پەخشی کەناڵەکانی ڕاگرتوە. هەمو ئەمانە هاوکاتن لەگەڵ هەڵمەتێکی دەستگیر کردنی هاوڵاتیان لە شار و شارۆچکە جیاوازەکانی هەرێمی کوردستان.
لە کاتێکدا ئیدانەی ئەم کردەوانە دەکەین، دوپاتی دەکەینەوە کە ئەم کارە نادروستانە چارەسەری کێشە و قەیرانە کەڵەکەبوەکانی هەرێم ناکات و، هێندەی تر پەرە بە ناڕەزایەتیە جەماوەرییەکان دەدات.
تەنها هێنانە کایەی گۆڕانکاریی ڕیشەیی لە سیستمی ئابوری و سیاسیی هەرێم و هێنانەکایەی حکومەتێکی بەرپرسیار دەتوانێت زامنی پاراستنی قەوارەی هەرێم و چارەسەر کردنی گرفتەکان بکات.
جارێکی تریش داوا لە هاونیشتانییانی خۆشەویست دەکەینەوە کە داوا و خواستە ڕەواکانیان بەشێوازێکی ئاشتیانە بگەیەنن و، دور بکەونەوە لەهەر توندوتیژییەک و، مولک و ماڵی گشتی و تایبەت و بارەگا حکومی و حیزبیەکان بپارێزن.
پێویستە هەمومان بە خۆشەویستیەکی زۆرەوە نیشتیمانەکەمان بپارێزین.
د. #یوسف محەمەد سادق#
سەرۆکی #پەرلەمانی کوردستان#
#19-12-2017#