ئەنجومەنی هەڵوەشاندنەوەی پاشەکەوتی مووچە، لەکۆبوونەوەی ئەمڕۆیدا، بەپێویستی زانی سەرنجی ڕای گشتی بۆ ئەو خاڵانەی خوارەوە ڕابکێشێت:
1- سوپاس و پێزانینی خۆمان بۆتەواوی مامۆستایان و فەرمانبەران و خانەنشینان و تەندروستیکاران و چالاکوانانی مەدەنی و میدیاکاران دەردەبڕین، کە بەدەنگ بانگەوازەکەی ئێمەوە هاتن و توانیمان پێکەوە دەنگی ناڕەزایەتی خەڵک، بەهەموو چین و توێژەکانەوە، بگەیەنینە دەسەڵات، هاوکات هاوخەمی و هاوسۆزی گیراوو بریندارەکانی ڕۆژانی گردبوونەوەو خۆپیشاندانین.
2- بەتوندی دژی هەر جۆرە سزایەکی ناڕەواین، کەبەرامبەر مامۆستایان و فەرمانبەران و پزیشکان پەیڕەوکراوە، بەهۆی بەشداربوونیان لەگردبوونەوە جەماوەرییە شارستانییەکاندا، داواکارین بەزوویی ئەو سزاو بڕیارانە هەڵبووەشێتەوە.
3- هەنگاوی یەکەمی حکومەت وەک دەستپێکێک بۆهەڵگرتنی بەشێک لەپاشکەوتی مووچە بەئەرێنی هەڵدەسەنگێنین.
4- داوا دەکەین حکومەتی هەرێم پابەندبێت، بەدابەشکردنی ئەو مووچەیەی ئێستا لەکاتی دیاریکراوی خۆیدا، بەجۆرێک هەموو وەزارەتێک و هەر مووچەخۆرێک مانگانە ڕۆژی وەرگرتنی مووچەکەی بێ دواکەوتن دیاربێت، ئەمەش لەپێناو زیاتر دروستبوونەوەی متمانە.
5- سوورین لەسەر داوا ڕەواکانی گشت مووچەخۆران، بۆهەڵگرتنی تەواوی ستەمی پاشەکەوت، بەرێگای زمانی تێگەیشتن و کارو چالاکی شارستانی، دووپاتیدەکەینەوە کەلەسەر فشاری مەدەنییانە بەردەوام دەبین، لەپێناو مافە ڕەواکانی تەواوی مووچەخۆران.
ئەنجومەنی هەڵوەشاندنەوەی پاشەکەوتی مووچە
هەولێر
#05-04-2018#