بەناوی خودای بەخشندە و میهرەبان
سوپاسی بێ پایانی خۆمان ئاراستەی هەموو هاووڵاتییانی خۆشەویستی کوردستان و لایەنە سیاسییەکانی کوردستان و عێراق و کونسوڵ و نوێنەری وڵاتان و پیاوانی ئایینی و نوێنەری پێکهاتە نەتەوەیی و ئایینییەکان و ڕێکخراوەکانی کۆمەڵگەی مەدەنی و کەسایەتییە سیاسی و کۆمەڵایەتی و فەرهەنگی و ئاکادیمی و وەرزشی و فەرماندە و هێزە قارەمانەکانی پێشمەرگە و ئاساییش و پۆلیس و بەرپرسانی ئیداری و سیاسی و هەموو چینوتوێژەکانی هەرێمی کوردستان و عێراق و سەرجەم کوردستانییانی ئازیز لە هەر چوار پارچە و دەرەوەی وڵات دەکەین کە زەحمەتیان کێشا و تەشریفیان هێناوە بۆ بەشداریکردن لە پرسەی خوالێخۆشبوو #دلۆڤان ئیدریس بارزانی# و هاوسۆزی و هاوخەمیان دەربڕی و لە خەمی ئێمەیان کەم کردەوە.
لێرەدا بە پێویستی دەزانم سوپاسی هەموو ئەو بەڕێزانەی دەرەوە و ناوخۆی کوردستان و عێراق و سەرکردە و بەرپرس و کەسایەتیی وڵاتان بکەم کە لە ڕێگەی تەلەفۆن و بروسکە و پەیامی سەرەخۆشی یا بەهەرشێوەیەک کە بۆیان کرابێت لە خەمی ئێمەدا شەریک بوونە.
پێزانینم هەیە بۆ هەموو ئەو خەڵکەی لە ڕێگەی نزیک و دوورەوە هاتبوون و ئەرکیان کێشا و لە خەمی ئێمە بەشدار بوون. سوپاسی تایبەتم بۆ خانەوادە و کەسوکاری شەهیدان و ئەنفالکراوان کە هاوخەمیی خۆیان بۆ ئێمە دەربڕی.
هاوسۆزی و ئەو هاوبەشییەی خەڵکی ئازیزی کوردستان، لە خەم و پرسە و کۆستەکاندا بۆ ئێمە هەمیشە جێگەی ڕێز و تەقدیرە و مایەی شانازییمانە. سوپاسی هاووڵاتیانی خۆشەویستی شارۆچکەی سەلاحەددین دەکەم کە لەو چەند ڕۆژەدا تەحەمولی زەحمەتی و قەرەباڵغییان کردووە، و میوانداریی خەڵکیان کردووە.
هەروەها سوپاسی ئەرک و ماندووبوونی هێزەکانی ئاساییش و پۆلیس دەکەم کە ئەرکی ڕێکخستنی ڕێگەوبان و ئاساییشیان لەسەر شان بوو. هیوادارم گشت لایەک لە ئازار و ناخۆشی بە دوور بن و خودای مەزن خێری هەمووتان بنووسێت و، ڕەحمەتی خودا لە کۆچکردووی هەموو لایەک بێت.
#مەسعود بارزانی#
#05-04-2018#