دواڕۆژ، #بورهان یەحیا#
وەزاەرتا سامانێن سروشتى د بزاڤا زێدەکرنا بەرهەمئینانا گازا سروشتى ل سێ کێلگەهان دایە و وەزارەتا کارەبێ ژى پێشبینییا زێدەبوونا 500 مێگاواتێن کارەبێ ل دووماهیێ سالێ دکەت.
محەمەد ئەمین هەورامى پەیڤدارێ وەزارەتا کارەبا هەرێمێ بۆ دواڕۆژ رۆهنکر پشتى کۆمپانییا دانا غاز و حوکمەتا هەرێمێ شیان کێشەیێن خۆ چارەسەر بکەن ورێکبکەڤن د نوکە دا ئەڤ کۆمپانییە کار لسەر زێدەکرنا بەرهەمێ گازا سروشتى ل سێ کێلگەهان ب تایبەت کۆرمەى دکەت و کار قۆناغ بۆ قۆناغ پێشڤە دچیت و ب گۆرەى پێشبینییا ل دووماهییا ئەڤ سالە دێ بەشەکێ باش ژ گازا سروشتى بۆ وێستگەهێن بەرهەمئینانا کارەبێ ل هەرێمێ هێتە دابینکرن.
دیارکر ئەگەر ئه و گازا سروشتى بهێتە دابینکرن وەزارەتا کارەبێ دشێت ل دووماهییا سالیێ نێزیکى 500 مێگاواتێن دى یێن کارەبێ بەرهەم بینیت و لسەر وێ 2500 مێگاواتێن نکە هەى زێدە بکەت و ب شێوەیەکێ گشتى رێژە ببیتە 3000 مێگاوات کو ب ڤى رەنگى ل دەمژمێرێن پترین خواست لسەر کارەبێ هەیە کو ئێڤارانە دشێت ب بەردەوامى کارەبێ دابین بکەت و دێ رەوشا کارەبێ گەلەک بەرەڤ باشیێ چیت.
ئاماژەکر کارێن دانا غاز بۆ ئەڤ سالە ب دووماهى ناهێت بەلکو گرێبەست وەسا هاتییە ئیمزاکرن کو قۆناغا دووێ بۆ سالا 2019ێ ژى بکەڤیتە کارى و رێژەیا بەرهەمئینانا گازا سروشتى ل کێلگەهێن هەرێمێ زێدەتر لێ بهێت و هەلبەت مفادارێ سەرەکى ژى دێ وەزارەتا کارەبێ بیت چونکو دێ شێت وێستگەهێن خۆ پێ بدەتە کارى.
خویاکر مەزاختیێن بەرهەمئینانا کاەربێ ب گازوئیلێ گەلەک پترە ژ گازا سروشتى و ب ڤى رەنگى حوکمەتا هەرێمێ ژى دێ شێت مەزاختیێن خۆ د بوارێ کارەبێ دا کێمتر لێ بکەت و داهات بۆ پێدانا مووچەى بۆ حوکمەتێ ڤەگەریت.
راگەهاند ل سنۆرێ پارێزگەها دهۆک ل وێستگەها کواشێ بۆ بەرهەمئینانا کاەربێ 5 ماتۆرێن مەزن هەنە کو ب هەر دوو بەرهەمێن گازا و گازوئیلێ کار دکەن کو دشێن 700 هەتا 1000 مێگاواتان بەرهەم بینن و نوکە بتنێ تۆربینەک ژێ کار دکەت ئەوژى ب گازوئیلێ و ئەگەر هات و رێژەیا پێدڤییا گازا سروشتى بۆ بهێتە دابینکرن دێ شێت کارەبا پێدڤى بۆ هەموو پارێزگەهێن هەرێمێ دابین بکەت.[1]
#11-04-2018#