ئامادەکردنی: #زریان سەرچناری#
2018
ستایشی یەزدانی مەزن
شاعیری هەست ناسک و بلیمەتی کورد، مەلا غەفوری دەبباغی ناسراو بە (حافزی مەهابادی) لە ساڵی 1927 ی زاینی لەدایک بووە، بە داخێکی زۆرەوە هەر لە منداڵیەوە بینای چاوەکانی لە دەست دەدات، ئیتر بە شێوەیەکی کولەمەرگی ژیان بەسەردەبات، تا لە ساڵی 1990 زاینی کۆچی دوای دەکات، ئەم ستایشەی نوسیوە، ویستمان دوبارە بیخەینەوە بەر دیدەی خوێنەران وە هەندێک لە وشەکانیشی لێکبدەینەوە.
حەمد بۆ خوای بەرز و بێ هاوتا
خالقی مەخلوق بێ باک و تەنیا
ڕاگری زەوی و حەوت ئاسمانە
بەری لە وەهم و شک و گومانە
بە قودرەتی خۆی لەیەک قەترە ئاو
جوانترین بەشەر دێنێتە بەر چاو
رۆزی ئەو دەخۆن گەلێ گیانلەبەر
هەربەدەس ئەوە قازانج و زەرەر
هەرچی ئەو بیدا نابڕێتەوە
هەرچی ئەو بیبا ناگەڕێتەوە
بەیەکێ ئەدا ماڵی زۆر و گەنج
بەیەکێ ئەدا موشەقەت و ڕەنج
یەک بەخێو ئەکا بەنازو نیعمەت
یەکێ دەخاتە ژێر باری زەحمەت
یەکێ تێر دەکا لە گۆشت و پڵاو
یەکێ کوێردەکا بۆ چۆڕێ شۆرباو
یەکێ گەڕانی بە کادیلاکە
یەکێ بە پێیان، ماندو و هێلاکە
یەکێ ڕادەخا فەرش لەبەر پێ
یەک لەسەر حەسیر گیانی دەردەچێ
یەک سوڕانەوەی بە تیوتا یە
یەک ماندو و مردو هەتاهەتایە
یەکێ بەدەنی وەک گرێ دارە
یەکێ دوازدە مانگ لەشی بیمارە
یەکێ منداڵی زۆر و بێ خێرە
یەکێ تا دەمرێ هەر وەجاخکوێرە
یەکێ لە باخەڵ ناسک و نازدارە
یەک هاوڕێ لەگەڵ ورچی نێو غارە
یەکێ پەری ڕو دێتە باوەشی
یەک دێڵە دێوێ بۆتە هاوبەشی
یەکێ دەکاتە گەورەی خاس و عام
یەکێ دەنوێنێ لە تونی حەمام
بە یەکێ ئەدا عەقڵی ئەفلاتوون
یەکێ دەکاتە واریسی مەجنون
یەکێ دەکاتە قوتبی ڕەببانی
یەکێ دەکوژێ بە بێ ئیمانی
یەکێ زانایە ژیانی تاڵە
یەک گەوج و نەزان بە ماڵ و حاڵە
یەکێ دانیشتوی کۆشک و تەلارە
یەک بە ئەرمەنی و جوش قەرزدارە
یەکێ حسابی ڕەد بو لە میلیارد
یەکێ شک نابات لە ماڵ پۆتێ ئارد
یەکێ شیک ترین جل لە بەریایە
یەک لە تەندورخەی بۆسۆی لێنایە
یەک گرانترین پارچەی دادڕی
یەک تورەکەی سوار ئەستۆی دابڕی
یەک کۆشک و سەرای لێ بەجێ ماوە
یەک شارەداری لە قەبری ناوە
یەک بەدەست و دڵ یەکێ چروکە
یەک ئێسکگران یەک ڕەزا سوکە
یەکێ دەست لەمل یاری چاو بازە
یەک چاوی خێل بو لە بەر دەروازە
یەک ماڵی پڕە لە نەفت و گازۆل
یەک هەڵدەلەرزێ لەبەر سەرماوسۆڵ
یەکێ خاوەنی سەروەت و ماڵە
یەکێ تا دەژی ڕوت و ڕەجاڵە
یەکێ خاوەنی بێژو و پەیکانە
یەکێ لارەمل لە قوون دەرکانە
یەک بەدەستی پڕ بۆ ماڵ دێتەوە
یەکێ بە بێ شێو سەر دەنێتەوە
یەکێ بێ حەد و حیسابە ماڵی
یەک بەخێو دەبێ بە نانی سواڵی
یەکێ دەباتە نێو ئاپارتومان
یەک دەخزێنێتە بەندیخانەکان
یەکێ ئارەقەی نایەتە نێو چاو
یەکێ دەبرژێ لەبەر سورەتاو
یەکێ خاوەنی سەروەت و ماڵە
یەکێ تا دەژی ڕوت و ڕەجاڵە
بە یەکێ ئەدا دینار بە خەڵوار
یەکێ سەگ و نان دەکا قەرزدار
یەکێ نان لەدەم سەگ دەڕفێنێ
یەک هەزار هەزار پوڵ دەدۆڕێنێ
یەکێ سوبحانەی هەنگوین و ڕۆنە
یەکێ سێ ژەمە سیرێژە کۆنە
یەک پارچەی نایاب دەکاتە بەرگی
یەک لەبەر ڕوتی دەخوازێ مەرگی
یەک پوڵ و پارەی بەسود دەگەڕێ
یەک سەری مانگێ ڕەنگی دەپەڕێ
یەکێ ڕۆژ و شەو مەست و سەرخۆشە
یەک لە سوێی گۆشت و جەوری، نەخۆشە
یەکێ نەهاری قەل و مریشکە
یەکێ دۆی ترشە یا نانی ویشکە
یەکێ مەکینەی بەرگی دەشۆرێ
یەک لە دەست تەنگی ژنی دەتۆرێ
یەک هەمو ساڵێ دەچێ بۆ حەجێ
یەکێ بەربینگی دەگرێ پورخەجێ
یەک پوڵی زۆرە ژنی دەدەنێ
یەک ماوەی ژینی دەنوێ بە تەنێ
بەیەکێ ئەدا چەند دەستە خانو
یەک دادەمێنێ بۆ کرێ خانو
خۆی لە هەمو کەس باشتر دەزانێ
مەرد دەباتە لای نامەرد بۆ نانێ
کەسیش بۆی نیە بڵێ خوایە
بۆ؟ وات کردوە؟ لەبەر چی؟ وایە؟