دیوانی ئێستا کچێک نیشتمانمە
#شێرکۆ بێکەس#
بەیانیت باش!
من ناوم بولبولە
خەڵکی ئەم باخچەیەم
دەمێکە باخەوانێکی تووڕەمان لێ پەیدابووە
نە گوڵێ نە دارێ نە مەلێ
بێ ئاگابوون چۆن هاتووەو
کێ کردوێتی بە باخەوان.
بێجگە لە خۆی.
باخەوانی لەخۆبایی
ناهێڵێ بە دڵی خۆم بخوێنم
ئەڵێ تۆ فڕینت شوومەو گۆرانییەکی لاساری.
ئەڵێ تۆ بە قەد ڕیقنەیەک ڕێزی نیشتمان ناگری.
پێم ئەڵێ ئەم هەموو ناوزڕاندنی
سەروو سنەوبەرو دارسێوانە لە پای چی؟!
پێم ئەڵێ تۆ وەڕسکەری وەڕسکەر.
بەیانیان زوو پێش) با (و پێش کازیوەو
بەر لە نیشتمان خۆی، لە خەو هەڵئەسی.
بەجووکەجووک مێشکی ئەم درەختانەت بردووە!
تۆ خەوت لە ئاو، لە گوڵ، لە گیا زڕاندووە.
ئەم هەموو زەردەزیڕەی پرسیارانە چییە
ئەیانوروژێنی و
پێم ئەڵێ ئەو دەنووکە دەنووکی خۆت نییە!